بسم الله الرحمن الرحيم
الوالدة الله يحفظها من النساء القلائل في هذا الزمن من ناحية التمسك بالدين والدعوة الى الله بشتى الطرق وبكل الأساليب .
ومن ضمن الأساليب الدعوة الى الله بلغة الشعر .ساعدها في ذلك مقدرتها الشعريه التي سخرتها لهذا الغرض . وجميع قصائدها لاتخرج عن الدعوة الى الله والتذكير ووو .
وفي هذه القصيدة دعوة موجهة لأبنائها .
ياعزوتي ياوِلعة القلب / هيّا=هيّا / معي يا عزوتي والحبايب
هيّا نعّدّ البرّ من كل شيّا=زاد السفر ضد الامور الغرايب
لاخير في دنياٍ بها العيش سيّا=دار المشاكل والعنا والمصايب
دار الغرور تزوّد الناس غيّا=إلا منيبٍ كان لله تايب
يكسب بها الحسنات مادام حيّا=في طاعة الله يستلذ الصعايب
لولا العمل / ماريد فيها اتفيّا=ولولا الفروض الواجبه والرغايب
لابد نتركها ونرحل سويّا=ونلبس ثيابٍ مدرجه بالعصايب
نسكن قبورٍ للجنايز تهيّا=عنّا القمر والشمس والنور غايب
لايزورنا فيها قريبٍ يحيّا=ولا نقول فيها مرحباً بالقرايب
حتى ليا انكدرت نجوم الثريّا=وجمع القمر والشمس يوم الرعايب
نخرج سراعاً للحساب انتهيّا=يومٍ يعّم الخوف مخطي وصايب
يومٍ يلمّ المفتقر والغنيّا=يومٍ مهيل يصيّر الطفل شايب
لكن رأيي نتّفقّ من هنيّا=ونسابق الفرسان واهل الركايب
لعلّنا نظفر بدارٍ مهيّا=خضرٍ بساتينه قصوره عجايب
لا حرّ فيه إلا برادٍ وفيّا=ولا برد فيها ولا تعجّ الهبايب
ولا موت فيها ولا معاشٍ رديّا=ولا همّ فيها ولا خصام وطلايب
فيها الفواكه دانياتٍ وريّا=وفيها الرحيق الخالي من الشوايب
ومن كل مطعوم وشرابٍ شهيّا=وفيها اللبن يجري نظيفٍ ورايب
وفيها جديد اللبس من غير كيّا=وفيها الأسّرّة من ذهب والكنايب
وفيها الحلل من كل شكلٍ وزيّا=فيها البصر يسرح فالانعام سايب
سكّانها في مستقرٍ هنيّا=وموجود فيها للتزاور نجايب
هذا قليل من الخبر يابنيّا=هل عندكم رأيٍ موّفق وصايب
أنتم معي ! ولاّ اختلفتم عليّا؟=ولاّ بعض منكم عن الركب هايب
إن كان أحد منكم تخّلّف وعيّا=تابع هوى نفسه بدنياه خايب
أنا بعون الله نويت اتهيّا=وارجي ثوابي من جزيل الوهايب
وسلامتكم