حان الـوداع ولا بقـى للعتـب دور=الله لنـا وفجـوج ربـك وسـاعـي
دام الصداقة ما هي إحساس وشعـور=ما للصداقـة بعـد هاليـوم داعـي
قلبي على المقفين ما هـو بمجبـور=من باع للعشـرة مصيـره يباعـي
رح واعتبر نفسك مسامح ومعـذور=قلبي على كثر الخطا مـا استطاعـي
انا على فرقـاك بالعكـس مسـرور=مثلك خسارة فيـه دمـع الوداعـي
وش عاد لو خاطرك ضايق ومكسور=مـدام خيبـت الرجـاء والمساعـي
ما كنت اصدق فيك يا ضايع الشـور=دايم وانـا دونـك مكثـف دفاعـي
وكانك على ما قايل منهـي ومأمـور=بدري على شرواك لويـت ذراعـي
فنجالك اللي سقت من يـدك منثـور=لا صار ما انتـه للصداقـة مراعـي
مَن يخدم الأنذال مـا هـو بمشكـور=ومن يزرع الصبخا جداه الضياعـي
تـوي لقيـت لعلـة النـذل دكتـور=البعد عن شوفـه يزيـل الصداعـي
ما فيه داعي ينفضـح كـل مستـور=عيني تشوف الدرب والقلب واعـي
نور الحقيقة بـان والعلـم مخبـور=شفت السباع وشفت روس الأفاعـي
افلح.. قبل يضربك رمحي على الزور=وتلقى شبيهك يـا خبيـث الطباعـي
عين بكت فرقاك تحرم مـن النـور=لا تنتظـر بعـد الـوداع اجتماعـي