البارحه ضاقت على الصدر الانفاس=وحسيت بعروقي جفاف ويباسه
من يوم شفت الزين مدقوق الاوعاس=يمشي ابوسط السوق شايل اكياسه
يمشي ايتسوق وتحمل ايدينه اكياس=ولادري هو ساس الزين او الزين ساسه
ومن يوم شفته انشهد ان قلبي احتاس=وخفت لا قلبي توقف انفاسه
صغير سن وشوفته تجلي اعماس=وتطرب خفوق الي يحب الوناسه
وعزالله ان شوفه يونس توناس=ولاهمني الهراج واهل البلاسه
ومن لامني يبلاه ربي ابلاس=ايودي اعلومه للنشامى نجاسه
مشيه مثل مشي العسيف من الافراس=مشي الاصيل الي يشدك حماسه
ومن شاف مشيه قال سكران من كاس=ولاهو بسكرانٍ ولا ذاق كاسه
لكن دلوعٍ وخطوته بقياس=ويحسب الخطواته ويعرف اقياسه
وماشفت مثله بالخلايق ولوناس=ولا ظن يوجدله ابربعه وناسه
الله عطاه الزين في تاج والباس=طاغي جماله واااااه ياقو باسه
حتى الملابس تشتكي قوة الباس=شيٍ وسيع وشي ضيق الباسه
وجهه كما بدرٍ بعد دكة ادماس=ينور سما ليلٍ تزايد دماسه
وخدودها بيضٍ كما لون قرطاس=قبل القلم يكتب احروف الدراسه
وجناتها تلمع تقل لمعة انحاس=ولو شافها انحاسٍ تذوب انحاسه
وعيونها سودٍ كما عيون قرناس=لاحول على خربٍ نشيطٍ وداسه
ورموشها صفة عساكر وحراس=لامرها المسؤل وقت العساسه
والجفن خدرانٍ تقل ينعس انعاس=محتار مابين الصحا والنعاسه
والخشم سلة سيف في كف عنطاس=سيف الشجاع الي بعيدٍ مراسه
والفم مرسومٍ مثل خاتم الماس=لاواهني الي ضفربه وباسه
والعنق عنق الريم او ضبي الاطعاس=لامن تحدر مع مثاني اطعاسه
والنهد فوق الصدر واقف وحساس=ويخشى الملابس لا تجرح احساسه
والبطن مضمورٍ تقل مابه ارماس=بطن عنود الصيد قبل افتراسه
والوسط ماله وسط والعود مياس=رقم اربعه يالي تجيد الفراسه
وامشاط رجله تشكي الردف لاداس=اتقول خف اشوي اكثر سلاسه
وصوت الخلاخل كنها دقت اجراس=يازين خلخاله ونغمة اجراسه
والجسم مبرومٍ من الكعب للراس=كله حلا من كعب رجله الراسه
ومن يوم طب السوق كله ضرب ماس=وغطى على الكهربه من قو ماسه
حرام مثل هذا ايتسوق مع الناس=المفروض يطلع لا يسوي انتكاسه