ياللي ليا منّي ذكرتك .. من البال..=يغيب كل الكون عنّي .. وأجيلك!
ياموصـّلٍ قلبي إلى حدّ الإهمال=(عطني من أيامك نهار) .. أشتكيلك!
ضامي لقا .. وأشفق على قطرة وصال=من صدتك ماعدت أطمع في سيلك!!
أروح بك عنّي .. وأجي لك وتختال=ما كنّ فوق الأرض واحد مثيلك!
يحق لك .. لكن على كلّ الأحوال=ما أبي كثيرك .. مدّ لي من قليلك!!
خذني وحقّق لي معك بعض الآمال=لا ياخليلي .. لاتخلـّي خليلك!
ياوحشتي من دون صوتك .. وش يقال=عنّي .. سوى إني ياحبيبي .. قتيلك!!
من غاب صوتك .. والليالي والأزوال=سودا .. كذا بالضبط تشبه جديلك!!
والدمع الأزرق ذقت ملحه .. ولا آزال=ياعذب ليتك ماتقصـّر بنيلك؟!!
هذا حصيلي .. وأنت ياعذب الاقبال=من غيبتي قلـّي وشنهو حصيلك؟!!
إن كنت مثلي .. ماعلى حبك جدال=وإن كان غير .. الله يسهل سبيلك!!
تعيش وتقابل لك ألوان وأشكال=وأعيش ماأدوّر حبيبٍ بديــــلك!!!