يا مل قلبٍ كل ما حل طاريك = لالا الضلوع تثبّته بالحشاء جاك
يفز لك لامن سمع من يناديك = وقمت اتلفت وانظر لمن مسماك
مدري علام القلب هو وش يبي فيك = وانته على جرحه طعنته بيمناك
طعنة قفا بالغدر ما اقشر مراميك = وشلون تطعن قلبٍ أدمنك واغلاك
غرسك في جوفه وبالحب يسقيك = ومن كثر ما يحبك يموتك ويحياك
قلبٍ طليقٍ حر حتى نظر فيك = صوّبته بعينك واخذته من اسراك
ما همه الا يظفر بشيء يرضيك = كل امنياته بالزمن يكسب رضاك
يا قلب بيع اللي من الناس جافيك = بيعه مادام إنّه غدربك وخلاك
لاتشتري بايعك وتبيع شاريك = ولا تتبع اللي مقفيٍ عنك ما جاك
ولو كان قلبي ميتٍ فيك يبغيك = نذرٍ علي إني ما اجي واترجاك
كرامتي يا بنت ماهو تساويك = الا تساوي كل ربعك ودنياك
كانك غرورك عن وصالي بيعميك = انا غروري ينسي القلب ذكراك
وكان العناد اللي برأسك معديك = إنكانها جت للعناد اتحداك
وكان الجمال اللي مكبر هقاويك = لقيت منك اجمل ومثلك وحلياك
لو ان قلبي كل ما حل طاريك = لالا الضلوع تثبته بالحشاء جاك