يالقوايل هبّي انفاسـك قبـل يتعبنـي = في سموم أهل الوجيه الكالحـه غربالـي
علّتي ماهـي بقصّـة عاشـقٍ سيّبنـي = كان هانت واستراح من الهواجس بالـي
وجه(ابن فهره)علامه؟يومـه يطالبنـي = والجنيه ياعالم جنيهي والريـال ريالـي
ودّه يغمّس لي اللقمـه بسـمّ الغبنـي = ثم لا هـي تنبلـع عقبـه ولا تنزالـي
شرذمه كل همّها تهدم ولا هـي تبنـي = فكر مغسول بعصارة حقد ناس أنذالـي
كان قصـده يشيّبنـي تـرى شيّبنـي = قبلها بنـتٍ سباهـا الغـادر القتّالـي
واحرقتني يوم صاحت! ياولـد يازبنـي = إلحق العـذرا تراهـا بالوحـل تغتالـي
وشيّبتنـي خارطتهـم قبـل لاتنشبنـي = الجراثيم اللي تحاول في مطيـح عقالـي
وجارة الوادي تحاول بالغـدر تسلبنـي = وسالفتها مبطيـه أول ولا هـو تالـي
اصبري يازفـرة الأنفـاس لا تشجبنـي = العجوز اللي تفكّر في رغيـف عيالـي
لين أحرر ذاتـي ولاعـاد يستقطبنـي = ماتدبّر لي مـن الأصفـاد والأغلالـي
ذو شجون الهرج.. لكن دون مايطربني!! = والحكايه ما انتهت دام الخطـر لازالـي
دام في صدري(مثاني سبـع) مايكربنـي = مابغوا.. والله معي رب الجـلال الوالـي
محمد الفارس
.
.
.