السلام عليكم
سؤال مهم وطرح راقي من الجميع
رأيي في الموضوع يعتمد على حسب السوق والوقت
يعني
أحيانا مستعجلين بالسوق ونبي نخلص وجايين نقضي أغراض معينة ماني فاضي لمسكة اليد وأمشي على بيض
وفي هالحالة بيني وبينها حوالي مترين بالسوووق
وكل شوي ألتفت عليها بسرعة يالله أخلصي
وأحيانا عندنا متسع من الوقت ونمشي على مهلنا ونتماسك بالأيدي ونسولف ونتمشى .. عادي جدا بالعكس المرة تنبسط في هالحالة
ودها إني دايم كذا
أما في الحدائق في الغالب إنت طالع تتمشى يعني ليه ماتمسك بيدها وش المشكلة فيه .. مسكت بيدها ماشية بجنبك .. مافيه شي عادي بس لا تمسك بيدها كثير بتعرق يدك
يعني شوي وشوي ..
شوف أبو منذر أنا في الحرم وإحنا ناخذ عمره ماسك بيد المرة مسكة ميب صاحية
عشان ماتضيع وقعدت ثلاث أيام تشتكي من يدها
الظاهر بعض المسكات مالها سنع
خلاصة القول إن المرة تنبسط كثير لما أمسك بيدها ونمشي على مهل بعكس السرعة ويالله يالله .. لذلك أنا افضل أن الواحد يمسك بيد زوجته شوي ويفك شوي وعلى مهل ... الدنيا ميب طايره .
بعدين تعالوا وش فيها العادات والتقاليد .. أعتقد اللي يسوي كذا يظهر للناس مدى إحترامه لزوجته وإتفاقهم وأعتقد الناس تأخذ الأمر بسهولة .. وأنا عني إذا شفت إثنين ماسكين بأيدي بعض أقول في نفسي ( ياحليلهم ) أو ( ياحلوهم ) الله يوفقهم ويخيلهم لبعض .
وبالنسبة للأهل يختلف الوضع
قدام أهلها أمسك بيدها وإذا هي تبي تفك لا تفكها
عشان يحسون أهلها إنك تحبها وماشاء الله عليكم .. ويدعون لكم .. وأكيد بيكونون فرحانين لكم .
أما قدام أهلك أنصحك ماتمسكها إلا في الحرم عشان ماتضيع
وغيرها لو مسكت بيدها قالوا أهلك : الله يخلف على ولدنا خذت عقله فلانة .. ماتشوفونه مايفك يدها .. الله يخلف
طولت عليكم
بس جاز لي هالموضوع
يعطيكم العافية
بااااايو