اسعد الله أوقاتكم بكل خير جميعاً
مشكلتي المتأصله من يوم جيت للمنتدى
إني مانيب أصبر لاكتبت قصيده جديده
ماأرتاح لين أجي وأضعها أمامكم لأتشرف بأرائكم فيها
آخر ماكتبت .. واعذروووووووو حزني!!
.
.
يامحمّد اللي فات لايمكن يعودد=وكل شي نعيشه لازم إن له نهايه
إلا الحزن في داخلي دوم موجود=مآخذ على عروقي عهود ووصايه
والفرْح لاتنشد عن الفرْح مهدود=من قبل يبدى عاش أغرب راويه
أغتيل في مهده وهو طفل مولود=جاهل ولكن كان عنده درايه
إن الليالي المقبله كلها سود=ولاصبر يفيد ولاتفيد الشكايه
سهود يامحمّد على الغير ومهود=لكن عليّ ياكبر كبر الجنايه
الكذب طاغي والصدق صار مفقود=وطعن القفا كاثر وحكي الوشايه
والحب حتى الحب ماعاد به فود=وصار أغلبه للتسليه واللهايه
ماأخطيت لاوالله ولاصار منقود=منيّ ولكن طيبتي هي خطايه
هذا اللي عندي ولاتجي تدوّر الزود=وإن كان بكّيتك ياكثره بكايه
هذا خفوقي حيل متعب ومجهود=يشكي لي همّه لين زوّد عنايه
وصدق خفوقي قال لايمكن يعود=شيٍ مضى وكل شي يجيله نهايه
إلا الحزن في داخلي دوم موجود=ومهما إنتهى توّه بخط البدايه!!