إهداء ليوم ميلادي
لـ 5 / 5 / 1402هـ
.
.
ياحمد ياخوك ياطول العذاب=طال ليلي واعذابي ياحمد
عايشٍ مابين ضيقه وإكتئاب=والعنا بالقلب ثاير ماخمد
الموادع موت والفرقى صواب=والجفيّا جمر نارٍ مارمد
قلبي الصحرا ولهفاته سحاب=باردٍ جوّي وجرحي مابرد
عشت أنا العطشان وهمومي شراب=تقرب أحزاني وفرحي يبتعد
(آهِ من جرحٍ أليمٍ قد أناب=عذّب القلب الحزينَ المنكمد
عشت أرنو للسعادةِ في إرتياب=خائفاً أرجو خيالاً لم يعد
أزرع الأفراحَ في مقلِ الصحاب=وجروحي في فؤادي تتقد)
الضلوع أقلام والقلب الكتاب=والحبر دمٍ نزفته ثم سرد
للبشر قصة تباريح وعتاب=قصة اللي مالقى بدربه سند
قصة اللي عانده وقته وخاب=حظه العاثر وخله إبتعد
قصة اللي عاش يتبع له سراب=قصة اللي عاش ماشاف السعد
قصة اللي مدمعه بلّ التراب=يرتجف حرفه وكفّه ترتعد
قصة اللي بالوطن عاش إغتراب=وإن قعد بالدار حزنه له قعد
وإن بغى يسافر صرخ جرحه وصاب=قلبه الموجوع ضيقات ونكد
وإن تحلوى للكرى والنور غاب=شاف طيف الخلّ مركوز النهد
المليح الترف مستور الجناب=ضاوي الخديّن بشفاته شهد
لابغى شيٍ قبل يطلب يجاب=ضحكته تذبح ودمعاته بعد
شمس وصله طالها وقت الغياب=وقربه الأول تبدّل للأبد
والخفوق اللي بحبه إستطاب=عانده حظٍ صحى صدفه ورقد
وهذا حال الجرح بالقلب الخراب=إستراح بداخله ثم إستعد
والتوجّد مانفعني والعذاب=أعلن إستيطان قلبي ياحمد