حبيبي الغالي .. ما أبيع ولا أشري به

السلام عليكم ورحمة الله وبركاته

أخواني الشعراء والاعضاء الكرام

أضع بين أيديكم هذه القصيدة المتواضعه لعلها تحضى باعجابكم .

كما أرجو ابداء ملاحظاتم وانتقاداتكم عليها بكل صراحه (حتى لو قلتوا هذي ماهي قصيده خرابيط ــ ترى ما راح يكون فيه زعل ولا تنحرجون الصراحه راحه ) وكل شي مقبول بما في ذلك اقتراحاتكم حول التعديل على الابيات لتكون على نحو أفضل مماهي عليه من ناحية المعنى أو الوزن ومنكم نستفيد ..

ولكم جزيل الشكر


ترى انا ماني شاعر لكن هذه من ضمن محاولاتي ..


[poet font="Simplified Arabic,16,orangered,bold ,normal" bkcolor="" bkimage="http://www.mahroom.net//backgrounds/27.gif" border="groove,10,tomato" type=2 line=200% align=center use=ex char="" num="0,black"]
حبيبي الغالي والله ماني عليك زعـلان=الـزعل بـيننا يـالغالي الله لا يجيبه
الزعل لو يطري على البال قلت غلطان=هذا حـبيبي والـزعل وش نـبي به
طبعك حبيبي ماشفت مثله أبد بانسان=أنت الوحيد اللي أخذ من قلبي نصيبه
تشفّقني اسامح وانت اللي علي زعلان=وتعجبني الفكره ويحـلا لي التغلي به
واسامحك وتبيِّن لي إنك بعدها فرحان=ومن الفرح تضحك وتتبسم وتهلي به
حبيبي لك ضحكة تروى ضما العطشان=اللي له معك زمانين ما هو متهني به
مفتون بعيونك اللي لها سحــر فتّان=وسهوم نظراتها .. يا ويل من تصيبه
وبنور خدك اللي كما نور البدر لا بان=يسطع اشعاعه على البعد ويضوي به
وبعودك اللي كما الموز فارع ورويان=من لينه إذا تمايل ياخذ القلب تطريبه
واذا شفتك من لهفتي لك كما الشفقان=ولك ريحة من دهن العود يفوح طيبه
واذا غبت عن ناظري أتم سرحـان=خيالك حبيبي افكاري تروح به وتجيبه
وفي بحر حسنك أنا كلي معك غرقان=وضحوك لعوب والدلع يسحر باساليبه
ولك من الزين شئ ما يبي إعلان=المختفي ظاهر عليك والكل يحكي به
ديـن وعقل وخفت دم وبالمزح فنّان=ومتعة السامع اطراف حديثك تجاذيبه
وكلامك له معاني … عندي لها شان=من معانيه أبد ما أبيع ولا أشري به


وســـــــــــــلامتكم

طـــــــــــــــارق
[/poet]


تحياتي للجميع

هلالالالالالالالالالا فيك اخوي طاااااااااااااااااااااااارق


جاك يا مهنا ما تمنى ..... جاك الموت يا تارك الصلاه ..

امثال ما لها علاقه بالموضوع ..

في الأمس القريب .... وضعت مشاركه اقل من المتواضعه

وعرظتها للإنتقاد .. والنقاد ... وطلبت منهم الحياد والحياد

لكن لم أرى إلا التشجيع .... والكلام الرفيع ...

ما رأينا نقدا ... ولا شفنا منهم حقدا ...

الكل يتجنب النقد ... لماذا تقول ما فيه احد

لكن انا عاذرهم ... وشاكرهم ... رغم أن احب شيء

عندي إن احد ينتقدني .... وافرح .. وما ازعل ..

المهم ترى طولت الكلام ..... وانشاء الله ما القى ملام

هذه مقدمات لما حبرته ,,, وكل ماهو اتٍ ات

كلما اردت أن كتب يعصي لساني ... وقد اجبرته ...

وها أنا .... اقول .... اخوي طارق ...

بارك الله فيك ...

بالنسبة للتعديل ... فالقصيده من وجهة نظري البسيطه

والمتواضعه تحتاج ... إلى تعديل .. وتمحيص .. وتنقيح ...

وسأحاول التعديل حسب فراغي ... لأني مشغول ... والمعذره

في هذا الوقت بالذات ...

على كل حال . القصيده معانيها راقيه ... وكلماتها جميله ..

ليست مجاملة أو جبرا للخواطر ... اقولها وبكل صراحه ...

اعجبتني كلماتها ... وتناسقها ... لكن بالنسبة للوزن ...

تحتاج إلى وزن ...

انشاء الله ما أكون طولت ... تحياتي وتقديري

الحسام

عزيزي طارق .. بعد التحية ،،،

الحمد لله انني لست بناقد .. والحمد لله انني التقيت بك هنا من اجل ان استمتع بنقاء كلماتك .. استاذي لكل صنعته وصنعتنا هي الاستمتاع اما النقد فله اصحابه وهم من يقولون لك ذلك ( راجع رد الحسام ) .. نعم استمتعت بالفكرة والكلمة واللحن العذب واستمتعت اكثر انك كاتبها .. الف شكر سيدي ...

لاتسالني الا اللي اعرفه بمعنى الكلام
انا اتذوق الكلمة والنقد ترى له اصحابـــه

اهلين..طارق..
بوح مشـاعر جميل..
كلمات جميلـه..
تسلــم..
تحيااتي

..........

...

هلا بك طارق


قصيدة رائعة ومعبرة

وبوح جميل وصادق


بالنسبة للنقد مثل ماذكرت في ردي على الحسام
ياليت نقدي يكمل في نقدي
لكن على شان خاطر طارق ولان هذه القصيدة الثانية له
واذا نظرنا اليها من هذا المنطلق
وباعتبارها نقطة البداية
فنستطيع القول بانها جيدة
وبصرف النظر عن بعض الملاحظات التي ستكتشفها بنفسك
كتلك التي اشار اليها الاخ الحسام
وهذه ستتلاشى مع الاستمرار والممارسة
والقصيدة بشكل عام جيدة في التناسق وفي المضمون

وبانتظار القصيدة الثالثة

سلمت ياطارق


كلك ذوق ...

اخوي طارق
لست من اهل الادب حتى استطيع النقد او التعليق
ولكن القصيده في وجهة نظري قصيده رائعه من جميع الجوانب
واتفق مع استاذي الوافي في لنك قد تتلافى مافيها في المستقبل القريب مع الخبرة والممارسه
واحمد ربك انهم انتقدوك
لاني كتبت قبلها وطلبت النقد او التعديل ولم ينتقدني احد؟؟
اخوي
قصيده رائعه ومضمون اروع
الف الف شكر
لولــlulwaــــــوة

ياهلا والله باخوي الحسام

أولا:
أنا آسف اني أشغلتك معي

ثانيا:
أشكرك الشكر الجزيل انك كنت اول من رد ، واشكرك بتفضلك وتكرمك بفتح باب الانتقاد بنقدك هذا ، لأنه كسر حاجز المجامله وراح يكون مشجع لأخواني انهم يدلون بدلوهم ايضا .. والباب مفتوح للجميع والهدف الفائده والاستفاده ممن لديهم العلم والمعرفه وجزاكم الله خير .

ثالثا:
في كلامك بعدم انتقاد الجميع لموضوعك اللي طرحته سابقا ، ترى الجميع ما عليهم ملام (لأنه من الصعب ان اقوم بانتقاد موضوع كاتبه هو اعلم مني به .. وانا شخصيا .. ودي انتقد اذا كان فيه شي يدعو للإنتقاد ولكن علمي ومعرفتي قليله في هذا المجال ان لم تكن شبه معدومه ). أعتقد أن الآخرين لهم نفس الرأي !.
وشاكر لك روحك الطيبه لحب الانتقاد وكذلك الصراحه التامه ... ترى هذا يسعدني ..


رابعا:
اما جاك يامهنا ماتمنى ----------------> عز الله هذا اللي تمنيت .
وجاك الموت يا تارك الصلاة ------------> هذا عاقبته مهب سهله . والله يستر القصور واجد الله يرحمنا برحمته .


خامسا:
هو مربط الفرس .......

أنت ياخوي ذكرت انها .. تحتاج ... إلى تعديل .. وتمحيص .. وتنقيح ... وذكرت في الأخير أنها تحتاج إلى وزن أيضا .

يعني الله يهديك يالحسام .. ما خليت لي شي هههههههههههههههه

إلا وش رايك أغيرها يمكن احسن ...... تراي امزح

إلا نبي نحوسها حوس ونقلبها يمين وشمال وفوق تحت لين تصير قصيدة سنعه والا شفنا لها حل ..

بس انا يهمني أعرف الآتي :-

1- التعديل : سببه وكيف اقوم بوضع تعديل مناسب ؟

2- التمحيص : تراى والله ماعرفت وش المقصود منه ؟

3- التنقيح : مثل سابقه يعني وش المقصود منه ؟

4- الوزن : هذا الوزن حبيبي .. هو له ميزان ؟؟ وماهو هذا الميزان ؟؟ وكيف استخدمه لعملية الوزن ؟؟

سامحني أسأله تدل على الجهل التام بالشعر .. لكن عندي رغبه اني اتعلم .. أرجو الافاده .



وأشكرك لأطرائك في آخر المطاف .. وتراي بعد منتظر التعديل اللي قلت عليه لو ماستعجلت خذ راحتك .


عاجز عن الشكر لك ياخوي الحسام وكثر الله من أمثالك .

وبارك الله فيك



أخــــــــــــــــــــــــــــــــــــــــــــــــ ــــــــــــوك
طـــــــــــــــــــــــــــــــــــــــــــــــــ ـــــــــارق

أخوي محمد خميس

ياهلابك والله


أشكرك لكلماتك الرائعه واللي جت في الصميم ــ وتراي راجعت رد أخوي الحسام

وأشكرك لإطرائك العذب والجميل أخجلتني والله .. الله يحفظك

تحياتي لك



يا محمد على اللي مثلي ماعليه ملام
..................... رغبتي بالعلم يشرفني اني طارق بابه
سألت أهل العلم وردّ منهم الحـــسام
..................... وكل من يفيدنا بالعلم حنا من أحبابــه

هلا فيك طارق .


الله يعطيك العافيه


ترى ردي كان على استعجال .. اخوي لا تشره على اخوك

احيان يرد ... على الطاير ....


المهم .... بالنسبة للقصيده كما قلت سابقا جميله ...

أما بالنسبة لأسئلتك ..


التعديل ... التعديل .. في البيت فبعض الأبيات تحتاج تعديل

حتى يتم التقويم ... والتناسب ..

التمحيص .. والتنقيح ... ليس في المضمون وإنما في في الوزن ..


أما الوزن ... فقد حاولت أن آتي بشيء يسير ..

وانشاء الله اكون قد حالوت النقد ... والتعديل .. على

حسب رأيي ... وعلمي المتواضع ... في الشعر

وربما تعديلي يحتاج إلى تعديل ... لكن مثل ما بينت سابقا

تفضل

[poet font="Simplified Arabic,16,blue,bold ,normal" bkcolor="" bkimage="http://www.mahroom.net//backgrounds/6.gif" border="double,4,gray" type=0 line=200% align=center use=ex char="" num="0,black"]
يا غلى حبيب اقول ما ني بزعلان = خل الزعل تالي ولا لا تجيبه
زعلك ما يطري على البال لو كان = انته حبيبي والزعل وشتبي به
طبعك حبيبي ما سمعته على انسان = انت الوحيد اللي قليبي نصيبه
تبغيني اسامح ولا أنته بغلطان = وتعجبني افكارك ويا هي عجيبه
واقول روح امسامحك وانت فرحان = تضحك وتتبسم وحالي غليبه
لك ضحكة تروي من الصيف عطشان = الله يا ضحكة حبيبي سليبه
مفتون بعيونك لها سحر فتان = وسهومها خطر(ن) على اللي تصيبه
خده كما بدرٍ سماء ليلته زان = بعد ثمان وسبع نوره اسريبه
والعود عود الموز في وسط بستان = دايم عليه الماء وتسمع صبيبه
وليا نظرته صرت بالحيل شفقان = وراع الهوى مسكين نظره تجيبه
وإن غاب عني دايم الدوم سرحان = تصير عشري خمس علمٍ احكيبه
في بحر حسنك صرت انا اليوم غرقان = وامواج حبك يا حبيبي عطيبه
زينه تعدى الوصف ما فيه نقصان = مشي الغزال إليا مشى في شعيبه
وإن حط كحل ٍ ثم ناظرت الأعيان = اصير مثل اللي حلاله اغديبه
كامل حبيبي دين والعقل رجحان = ما هو ابمطفوق اعلومه صعيبه
هرجه تقول ايركبه وسط ميزان = معنى وادب واخلاق يا غلى حبيبه

وسلامتك اخوي طارق ..
الحسام

[/poet]

يا عيني

يا عيني



ياعيني


ياعيني


ياعيني


ياعيني

ياعيني
يا عيني على الكلمات يا أخ طارق
تسلم والله يا طارق تسلم وتسلم وتسلم
هذا الكلام يخفي خلفه شاعر كبير

نعم كبير لكن يحتاج لشوي أقول((شوي)) من الممارسه والخبرة بس في الوزن
وزن القصيدة يعرفه الشاعر المتمكن بالبديهه
وإذا بتعرف يا اخ طارق الوزن حق القصيدة مضبوط ولا لا, قل القصيدة بتلحين فإن تناسقت إيقاعاتها فهي موزونه واذا أحيان تنقص أو تزود ولو ليسير فان الوزن يحتاج لتعديل
عموما هالكلام لا يكون محبطا لك فأنت كما أتيقن شاعر ,فالكلمات جزلة وما عليها غبار بس المشكله البسيطة في الوزن وهذا ستتلافاه باذن الله مع الزمن والممارسه
آآآآآآآآآآآآآآآآآمل أن نرى الجديد عزيزي

كما لا يفوتني أن أشكر الاستاذ الحسام على هالتعديل الطيب الذي أتمناه منه في قصائدي التي يرد فيها من العيوب ماالله به عليم

تحياتي
والسلام

المنسدح