تخااااااااريف ....!!

16 / 09 / 2001, 18 : 01 AM

.........

...

بس مادري

لكن اذا صار زين الاوصاف بديرة وانت بديرة
ومع البعد تشوف ان خاطره به شيء عليك
لو انه مو مبين لك اللي بخاطره
ثم قمت تذكر وتحاسب نفسك
ياربي وش قصته ؟ !!
وش مكدر خاطره ؟
ثم خطر ببالك انكم اختلفتم اخر مرة
عند 1X1 هي تقول 2 وانت تقول 1
ايييييييييه
هذا بس اللي مزعلها
لاعادت من حالة
ثم جلست وحداني بليل اظلم
في خلا خالي وليلتين ماشفت النوم
جالس تدير التفاكير وتذكر حبيب الروح وهمساته وضحكاته
وضايق صدرك من ضيقة صدره
وونه تجي وونه تروح ثم سرت بك الافكار لين تنسى نفسك
ثم تجمعوا عليك اخوان مرة على بكرة ابيهم
ثم عطوك لين خلوك تهلها اربع اربع لين طاح مابراسك
ويعود لك فكرك
وتلتفت بتشوف الساعة كم
ياااااااااااااالهي
الساعة القشرا
قبل يومين انقطع الاستيك
وراميها بالبيت
مو مشكلة
وترفع نظرك للسماء يعني انك تعرف
الوقت بالنجوم
مالت عليك

المهم
ملامح الفجر ماتخفى عليك
قلت انا لله وانا اليه راجعون
الوقت هذا كله بهالديرة القشرا وانا تقول جني لحالي
يعني انك عقلت !!

وتقوم واقف وتلفت يمين ويسار
وترجع تناظر بالسماء ترقب النجوم
بعد ماطاب خاطرك منها ؟!
وتدربي رااسك شوي
وتشاور نفسك اسري والا اصبح
المهم
حسيت ان معك دوخة وجلست
ومع جلستك تجر ذيك الونه

ايه
تعوذت من ابليس
لكن ماجنب عنك
الله يلعنه
وحبيبة القلب وعذابها يشجعه عليك
ثم جريت الصوت بهالبيتين
عزي لقلب منكوي بالهوى كي * وكي الهوى ماهو بمثل الكوايا
عطاه لين القلب ولع كما الضي * ناره جهنم ولعت بالحنايا
وعبرت عن ماصابني من بعض شي * مابدت حروف الشعر فالبلايا
اعد فرحاتي على اصابع يدي * واعدها من عند خلي هدايا
يازين واصلني ترى مابقى في * غير الهموم اللي تبوح بخفايا
ظامي ظما مايقطعه بارد المي * الا اليا هلت مزون الثنايا
ولاني بمتضلل ولو قدمي الفي * مادام في حضنك براد الفيايا
يازين لو اغروك باموالهم عي * حنا نسوق ارواحنا لك فدايا
سويت بي هذي وسويت بك ذي * اذيتني وانا لحقتك باذايا
واليا طوى الله صفحة ايامنا طي * رجاي بالخلاق يمحى الخطايا
هذا جواب اللي كواه الهوى كي * وكي الهوى ماهو بمثل الكوايا
آآآآآآآآه
الحين تحس انك تخاطبها
وتحس انها تسمعك
بس عساك ارتحت ؟
لا
بعد براسك روووس
اخوان مرة شادين حيلهم
وماصدقوا انك رفعت رااسك للسماء
قالوا لك انظر نجمة سهيل سرت
وانت تدربي رااسك بالخلا الخالي
والله مادرت عنك حبيبة قلبك يامسكين
ويعفسون بصدرك لين قامت الاهات تصارع الونات
وتجر هاك الصرخه
صرخت لك بالصوت في تالي الليل * وردت علي الصوت بعض الدموعي
يامدور القمرا سرت نجمة سهيل * وبان الصباح اللي بنوره يروعي
حل الفراق ولا بقى لك مواصيل * وضاع الدليل وخالفن السنوعي
عذبتنــي يافتـــنة القــرن والجيل * وقتلتني برضاك ماهو بطوعي
الله حسيبك ذقت منك الغراابيل * ولا شفت منك الا العنا يالقطوعي
وبارحل عسى باقي حياتك تساهيل * وهذي بعض ذكرى بقايا دموعي
انا لله
الحين وش جاب طاري الفرااق ؟
لاوالله مانت صااحي
وبنت الحلال وش ذنبها في هذا كله ؟

بس
ماااااااااااادري

افا !!

طلعت الشمس
ويرجع العقل اللي يجي ويروح
ويالله ان العوض عليك
الحين انت وش جايبك هنا ؟
وليه كل هالعذاب ؟
والله مافيه شيء يستاهل
ارجع البيت الان واتصل بحبيبة القلب
وقول الا صح 2
وانتهت المشكلة

اقول
سامحوني
على هالتخاااااااااريف :o
واستروا ماواجهتم

وصدقوني ثاني مرة لما اقول لكم
تخاااااااااااااااااااااااااااريف

هاااااااااااااااااااااااا
صدقتوني ؟

سلاااام .....

16 / 09 / 2001, 37 : 01 AM

هلا وغلا الوافي

سلامات ..... ما ترى بأس إن شاء الله
عهدي بك الصبح عاقل !!!

وش اللي سار ياصاحبي

حسبنا الله عليها اللي خلتك في هالحالة

أقول أوديك شيخ يقرأعليك

ياخوي حستنا حوسة الله اعلم بها

قريت مرة ومرتين
وكلما قريت شوي عجزت افهم الأول

على كل حال
هذا الوضع الطبيعي للعاشقين
قبلك قيس بن الملوح
كان يخرف تخاريف الله لايوريك

رائعة ياوافي

تقبل تحياتي وتقديري

16 / 09 / 2001, 38 : 01 AM

غالينا ... صاحب اروع تخاريف ..

لو قلت لك انك رائع ما وفيتك حقك ...

ولو قلت ابدعت ما وصلت للمقصد ...

لو كان هذي تخاريفك ... ليت الكلام كله تخاريف ...

عيشتنا معك ... وسهرتنا بليلك ... وزدت شجونا بآهاتك ...

تدفينا بنارك .... وتسلينا مع خويانك ... وتعبتنا بخرجاتك ...

اااااه قمت اطالع السقف .... ادور نجم سهيل ...:o

حيرتني والله .... ويا روائع التخاريف جودي علينا ...

ابشرك...

صدقناك يوم قلت تخاريف ....

..

تسلم و يا عسى الشر يخطي دروبك ...

سلام .... نقره لعرض الصورة في صفحة مستقلة

...

16 / 09 / 2001, 45 : 01 AM

أحلى من العقد.........مرت من هنا..........

مرتفعه حرارتها.............

وشافت انو لو علقت راح تكون تخاريف مريضه.......

لذلك...قررت انها تضف وجهها ولمن تخف الحراره وتتشاوى,,,,

تقول اللي في خاطرها...........

بس تخاريفك....... مو صاحيه.....

16 / 09 / 2001, 48 : 01 AM

وافي

وفي جدا لليلته

تخاريفك ابداع
دعني اقرأها كما يحلو لي

لو جيت بيوم وقالت لك بعد عشر سنين قضيتها كلها مثل هالليله

انت تحبني
وش تقول
تشد بشعرك وتقول ايه
تقولك طيب احلف
تقولها يابنت الحلال ايه
واله احبك
تقول طيب ليه ذاك اليوم ماقلتلي صباح الخير
وانت اصلا مانت بالديره
تقولها طيب شلون اقولك صباح الخير وانتي نايمه
وانا مسافر دقيت عليك مارديتي وش اسوي
تقول كان المفروض تدق الين اصحى
ترد انت حبيبتي ماحبيت ازعجك
يااااااااااااااااااااااسلااااااااااااااام تزعني هذا صوتها انتوا عارفين
لا لالا
كان المفروض تدق الين يوجعك راسك
طيب طيب
المره الجايه بدق الين يوجعني راسي
تسكت شوي تنبسط انت تحسب انها خلاص انتهت المشكله
شوي تسمع صوت خفيف اهي اهي اهي
لاحول الله وش تسوين
تبكي
ليه تبكي
حبيبتك قاعده تبكي
افزع ياولد افزع
يانور عيني وش فيك
طبعا البكوه اي كلام بيني وبينك (شغل التلات ورئاات )

المهم انك كل شي تقوله تقول ايه حاضر ابشري

تعرف وين المصيبه
انك لو تجرأت بيوم وقلت وحشتيني
حرب تشتعل فالبيت
ليه انت وش شايف
من اللي قابلتها ووحشتك انا
يابنت الحلال وحشتيني يعني اشتقتلك
لا اكيد انك شايف لك شوفه وقلت الله يستر على حبيبتي
وش شفت علمني طبعا نفس الشي اهي اهي اهي
انت تقفل معك
وتقول بصوت مرتفع
انا طالع تسمعي طااااااااااااالع
وين تبي تروح الحين الساعه ثلاث الفجر
طبعا انت زهقان من الدنيا تقول رايح وطي تروحي معي
المهما نك تطلع مثل طلعتك هذي لكنك تكون تاكدت ان كل النساء ليس اغبى منهن الا رجل يصدقهن (لايزعلوا علي الاخوات )

صاحت دياجير الهوى عن عذب الاوهام
...................واصبح كلامك لي مجرد تخاريف
وين الذي كنا نشوفه هوى دام
.................. اصبح عذابه لالجى الكيف تزييف
لاناشد الغيمه عن اللي لفى العام
.....................ولا خاين الميعاد بحساب هالضيف
ضيفٍٍ يجي في غفلة الجود عدّام
...................... لاتنشده خله عن الشور والحيف
ياصاحبي عيت تماشيك الاقلام
.................واقبل ثلوج الود لو كان بالصيف
انت كنت تخرف وابدعت
وانا كنت اخثرد ومادري والله وش سويت
الله يستر

اشكرك الوافي
ازحت الكثير الكثير من همي هذه الليله
وش رايك نعيدها بكره

16 / 09 / 2001, 06 : 02 AM

وافي...........بلدز..........

تخاريفكم....توجع.....كفايه....ترى حرام عليكم............

والله اني مخنووووووقه.وعلى جريف ....................

فيني بكوه .بس مو التلات ورأت....

من جد...........احسني حمامه ..محمومه...........جت كذا عاد افهموها.........

أأأأأأأأأأأأأأأأأأأأأأأأأأأأأأأأأأأه اجر الصوت من جرح براني...

أأأأأأأأأأأأأأأأأأأأأأأأأأأأأأأأأأه انا والجرح اكبر من زماني...

16 / 09 / 2001, 19 : 02 AM

هلاااا والله براعي التخاريف

هلاااا والله باللى انقطعت ساعته وماعاد يعرف الوقت

ولا يهمك بكره ارسل لك ساعه من افخم محل للساعات

والله اني اقرأ في تخاريفك وانا اضحك لانها تخاريف راااااااااائعه

اللى اشركتنا فيها وشعرنا فيها روح المرح

لكن عندى سؤال محيرنى ابي اعرف منهم اخوان مره

نفسي افهم ماعليه انت بدوى في خاطرتى لعينيك

وانا جاهله في تخاريفك ودى افهم

تقبل اعجابي بتخاريفك يا ابو تخاريف

الســــ زهرة ــــــوسن

16 / 09 / 2001, 59 : 02 AM

الله وافي حتى انت صرت تخرف زي

ياسلام على تخاريفك

فا المبدع دائما يوصف ابداعه في كل شي

كلمات روعه من انسان رائع

علي علبه
معذبهم

16 / 09 / 2001, 28 : 04 AM

هلا والله بالوافي

هي تخاريف !!!!!!!!!!!!

يمكن

ولو بس ابداع منك حتى في التخاريف

لا تحرمنا ولو من تخاريفك

تسلم

وشكرا,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,

17 / 09 / 2001, 42 : 11 AM

..........

...

سلام وتحية للجميع

كيفكم ياحبايب

ومشكورين على تشريفكم لتخاريفي وتشجيعي لتقديم المزيد من التخااريف

ايضاً التمس العذر لهذه التخاريف

والله مادري وشلون جات

بس صدقوني كنت ناسي اني بالمنتدى والا كان استحي على وجهي شوي

بس تعرفون العقل يجي ويروح مرة موجود ومرة باجازة

ومرة عنده ظروف عائلية

ايه يازمن

صحيح

والله صحيح

ان بن آدم كالانسان

فعلا

حكمة

بن آدم كالانسان

صبه واحقنه هوه هوه

وللاسف انه اذا قطع راسه ماات

ادري بتقولون رجع الاخو خرف
بس هنااك فرق بين تخاريف الليل والنهار

ماعلينا المهم عدوها
عاد اخو بلابكم به النصيب

والا مو كذا ؟

تحملوا واجركم على الله

ماااشي ياحبايب

نرجع لموضوعنا

ونقول

الف شكر تطوير وزي ماقلت لك والله يعينكم على الصبر وان شاء الله مأجورين

عاشق الحجاز
الف شكر والله لايبلاك بما بلا بعض الناس
وليتك معاي والله في ذيك الليلة وتشوف العبرة بعينك يمكن تهتدي
وانت جالس تشجع وتمدح تقول اني جايب لك المراجل كلها

احلى من العقد

الف شكر وماتشوفين شر ان شاء الله وترى الحرارة هذي بداية
لتخاريف ساخنه
وبانتظار تخااريفك الله يشفيك

يلدز

الف شكر لتشريفك
ياخوك الظاهر اني سبق ان شفتك بذيك الديرة
ياعزتي لك ياصاحبي
قلبي معااك

علي علبه

الف شكر
كلنا بالهوى سوى
مشي حالك ياقمر

زهرة السوسن
الف شكر لتشريفك
واخوان مرة ان شاء الله ماتعرفيهم
وحاولي تلعنيهم قدر الامكان من غير ماتعرفيهم
ترى معرفتهم والله ماتشرف
الله يلعن الشياطين

الصقر
الف شكر لتشريفك
وياخوك لاتشجعني على التخااريف
ثم اجيب الطامة

للجميع

سعدت بتشريفكم وباطرائكم

والمعذرة منكم
ان شاء الله اخر مرة
ومااااااعودها
بس تعرفون الظروف العائلية لها تاثير نقره لعرض الصورة في صفحة مستقلة

سلااام

الذين يشاهدون محتوى الموضوع الآن : 1 ( الأعضاء 0 والزوار 1)