1.. الغــــزل

هنا نستقبل مشاركاتكم حول هذا الغرض الشعري





الغــــــــــــــــــــــــــــــــــزل

خلاص يا سيّدي ارجـوك تعفينـي = مادام حبل الرجـا مقطـوع بالمـرّة
ايام راحت بنـار الشـوق تكوينـي = واليوم مرتاح يوم النفـس منضـرّة
في سجن الاحباب ياعمري دفعتيني = أسير مخفور بيـن الصـدر والغـرّة
يابنت خوفي من المولـى ذبحتينـي = شوفي معاليق قلبـي ليـش مصفـرّة
ضميان واطرد سراب القاع يروينـي = ارقا المخاطر عشانك وادفن الجـرّة
اطيع قلبـي علـى كيفـه يمشينـي = يبحث عن الجوهرة مدري عن الدرّة
من غبت زولك بقى مرسوم في عيني = حتى تقاطيع وجهـك مانقـص ذرّة
تنـام ليلـك وليـل الهـم يطوينـي = من عاش قبلي بدرب الحب ماسـرّة
اداري الوقت عمري يسبـق اسنينـي = ايام صارت بحلقـي طعمهـا مُـرّة
يجرح يداوي بحلو الهـرج يغرينـي = خدّاع ليته يفـك النـاس مـن شـرّه
من سحر ياقوت بيده قام يسقينـي = تبغاني اتبع هواهـا واطلـب الكـرّة
راع المثل قال قول ٍ بـات يعنينـي = ماكل مـرّة تطيـح وتسلـم الجـرّة

(( البجادي ))

ماكل مـرّة تطيـح وتسلـم الجـرّة

صح لسااااانك .. ابو خالد

//

ماضـواك الشعـر ... ياقلـب الخيـال ..! = ولانصيتك ...... قاصد ٍ منّـك .... دوى !
شاعـرك مجنـون ... لاميّـل اعقـال ..! = كيف أجل ..... ( لاحب) واغواه الهوى !؟
جيـت أذوّق حضرتـك شعـر ٍ زلااااال .. = واسمعه لاجيت أغنّى في ...... " ضـوى "
غادة ٍ لامـن مشـت شـارع ... تعـال ! = شوف وشلون " الزهر " ! يقلب هـوى !!!!
كـل هـذا لاجـل ..... لاجاهـا مجـال .. = وشمّت انفاسه يجـي " معهـن " سـوى !
والشجر لاميّلـت مـن صـوب ... مـال ! = ولابعدت عنّه ... تنهّد ! ....... ثم ْ ذوى !
وحبتين التـوت ... بيـن .. / البرتقـال ! = أذكر إن الغيم .... سمّاهـا .. / الـدوى !!
وأذكر إنه دار .... فـي ذهنـي سـؤال !؟ = ( أرتوى !؟ يمكن ! ... لا لا ! مارتوى ) !!
ثوبهـا اللـي ينعـم ! بعـز ... ودلال !! = واااااهنيه بس ! ...... ملعووون الثـوى !
ولاحكت .. ( هـذي ولا فيهـا جـدال ) != تطبخ اعصابك على..... جمـر النـوى !!
كـل شـي ٍ لامشـت .. تمتـم ! وقـال ! = ( ودك إن كل النسا ...... تشبه ضوى ) !!

//

بركات الشمري

\\

.

صح لسانك ياابو خالد

الكرز .. واحد وعشرين حبة =رفرف الغصن .. واورق عندليبه
افتحو للشبابيك المحبة = واصدحو بالهلاهيل الرطيبه
غافل الشمع في عيده تنبه = راح ياخذ من الظلما نصيبه
طفل من عادته يكسر العبه = وش عليه ان كسر خاطر حبيبه
سنة من سننه المستحبة= يترك قلوب عشّاقه عطيبه
ضاع من قال انا من قال انا ضايع بحبه = والله ان الدلاله ضيعتي به
قبلة الله عليه ... شلون ربه= خالق بيسمه يوم يحكيبه
لو مكنته .. تغافلته ( بحبّه) = مير هو شايف فالامر ريبه
محسن الظن في ريح تهبه = يحسن الظن في مثلي .. مصيه
(المسبّه) به الطرف (المسبه) =ما سوى طرفه الساهي يعيبه
( عجزت مرايته فيه اتشبه = حاولت فيه ما قدرت تجيبه )
ضامر.. مثل رجل براس قبّه = ينفح ( بغيمتين الصدر) طيبه
بعد هذا .. وش اللي ينكتب به = قبل هذا .. وش اللي ينقري به
منبع النهر .. والنهر.. ومصبه = مشرق النور.. والنور.. ومغيبه
ان بغى .. يسلب الرمّان لبّه = وان بغى .. صابت النعناع خيبه
وان حلا اللعب والميدان طبّه =مالك الا تقول الله حسيبه
والله ان القلوب المستتبه = تصطفق .. تقل ناهبها نهيبه
ياهل العرف ما قبله يجبه=كيف أجل بالحشا مركي صليبة
الكرز واحد .. ومليون أحبه = من هنا لين سكره وحليبه

فهد عافت

::

قالوا كذا مبسم هيا .. قلت لا لا= بين البروق وبين مبسم هيا .. فرق
ويالله .. بنوٍ مدلهم الخيالا=طافح ربابه .. مثل شرد المها الزرق
لا جا على البكرين بنا الحلالا=ولاعاد لا يفصل .. رعدها عن البرق
يسقي غروسٍ .. عقب ماهي همالا=وحط الحريق ديار الاجواد .. له طرق
يسقي نعامٍ .. ثم يملا الهيالا=ويصبح حمامه ساجعٍ .. يلعب الورق
جريت انا صوت الهوى .. باحتمالا=في وسط بستانٍ .. سقاه أربع فرق
طبّيت مع فرعٍ .. جديد الحبالا=وظهرت مع فرعٍ .. تناوح به الورق
روشن هيا .. له فرجتينٍ شمالا=وبابٍ على لقبله .. وبابٍ على الشرق
مبسم هيا .. له بالظلام اشتعالا=بين البروق .. وبين مبسم هيا فرق
برقٍ تلالا .. بأمر عز الجلالا= وأثره جبين صويحبي .. واحسبه برق
يا شبه صفرا .. طار عنها الجلالا=طويلة السمحوق .. تنزح عن الدرق
له ريق .. أحلى من حليب الجزالا= وأحلى من السكر .. إلى جاء من الشرق
حنيت انا .. حنة هزيل الجمالا=ينقض ردي الخيل .. قد حسه الفرق
ويا قلته .. في عاليات الجبالا=ماها قراح .. مير من دونها غرق
ماعاد للصبيان .. فيها احتمالا=من كود مرقاها يديهم .. غدن طرق
قالوا تتوب من الهوى .. قلت لا لا=إلا إن تتوب .. ارماح علوى عن الزرق
قالوا تتوب من الهوى .. قلت لا لا=إلا إن يتوبون .. الحناشل عن السرق
قالوا تتوب من الهوى .. قلت لا لا= إلا إن تتوب الشمس .. عن مطلع الشرق

::

للــرآآآئـع محسـن الهـزآآنـــــي

قالوا تفكر يافتى قلت لا لا= ماهي بفكرة مير شيً غشا البال
ساعة نحاني وانتحى بالمجالا = ضاق الحشا مني وقمت أعول إعوال
ومن العنا أصفق يمين بشمالا = والعي من الفرقا على راس ماطال
ماني بمن يقوى العزا باعتزالا = صادفت من هجره تصاديف وأهوال
هو يحسب إن الحب ظلٍ وزالا =أويحسب إنه عن حشا الروح ينجال
حبة يوازن نايفات الجبالا =متمكنٍ رسمه كما حبة الخال
ماجور ياساعي بصلح الزعالا=يامخبرٍ عني حسين التبهذال
قل له عشيرك بماضيات الليالا =ماعاد له من طربة الكيف منوال
من عقبكم حاله سواة الخلالا = ماهو بهانيه الجفا عقب الإقبال
مايحتمل معشار مابه محالا =ولايحتمل من وزنة المن مثقال
علية ليعات التجافي تتالى= والوجد رده زود الأول على التال
عساة يصفى لي عقب الملالا= ويرجع بوصل مولع ماله أمثال

الشاعر حمود الناصر البدر..رحمة الله.......

صح بدنك سديم

ومشكورة على شعورك الطيب ..

وأذكر إنه دار .... فـي ذهنـي سـؤال
( أرتوى !؟ يمكن ! ... لا لا ! مارتوى

اختيار أكثر من رائع سديم

يعطيك العافية سيدتي

صح بدنك ملكة

وشكرا لهذا الشعور تجاه محاولة اخيك ..

محسـن الظـن فـي ريــح تهـبـه
يحسن الظـن فـي مثلـي مصيـه

يا سلام على الذوق الرائع والإختيار الجميل

سلمت اناملك ملووووووكة

يابنت خوفي من المولـى ذبحتينـي
شوفي معاليق قلبي ليـش مصفـرّة
.
.
.
تنـام ليلـك وليـل الهـم يطوينـي
من عاش قبلي بدرب الحب ماسـرّة



الله الله
صح لسانك يابو خالد
ورائعه غير مستغربه منك

سديم
احترت اي بيت اقتبس
القصيده لاتتجزأ
بدييييييييييييييييييييعه كصاحبتها
ماشاء الله