ايذكر الله قبل ما اقول المعاني=في رجا اللي من يعبده خاشعله
في رجاه انه على الصح يهداني=لجل قول الحق مثلي ما يزله
ولعن الشيطان و بالله المستعاني=تحت ظل اللي كسى الاجواد ظله
فزعتي به يوم هاجوسي دعاني=بامر رب وتحت حكم مانمله
وجا العسر القاف بالصدر اصفقاني=مثل صفق الموج لجال راسي له
واقبلت شرد المثايل في ثواني=والقلم حبره على الاوراق هله
والمشاعر احظرت والعب زاني=زان عسف القاف في وقته وحله
وإن بغيت القاف عسره ماعصاني=وإن فتلت البيت يتعب من يحله
وقد خذيت من التجارب ماكفاني=والسنع ماني يدور من يدله
واقتدي بالعرف في حاضر وفاني=وللادب نور مثل نور الاهله
في زمان الفين واحد لي بياني=ابذكر التاريخ وانشر بالمجله
تابعوها يالفهيمين الذهاني=واستدلو يالعوارف بالادله
وميزو يبن الهزال من السماني=وصفها مثل الاهضاب المستحله
والمراجل ماتهيا بالهواني=من نطحها ناطح له حد سله
والردي منها تجي عشر الثماني=والسنافي لرتكى للحمل شله
وحزة الازم يبين المغنطاني=لو يدين الرجل من ماله مقله
والفخر للي لهم قدر وشاني=والثنا للي يدير الكون كله
وفي هيل وفي بن وزعفراني=والشحم والعود مع فنجال دله
من يميني لطويلين اليماني=صوب راعيه اسوقه يوم ازله
مع تراحيب الفواد المعشراني=مادخله شكوك بهل الطيب لله
وفيه لوم وفيه شرهه وسفهاني=والردى يلقى رداه بشاربله
وفعل ابو وجهين كله ماخفاني=ماخفاني سيرته مع شين دله
مهذبان اللسان وقلب قلباني=كل يوم له على مذهب ومله
وقالوا انه حر واصبح بغباني=مثل جرباء جللوها بالاجله
والقصيده اكثر من ثمانين بيت
لين يقول في اخرها
وشايفين وسامعين بالاذاني=كم ندمح زلة في ساق زله
وان رجعنا للعمل كنا وكاني=عاقبونا بالعمل قوم مهله
وعذاب اللي دوامه بالمواني=وان بغى المنهاج منها ماحصله
وان طلعله يوم دوام يوم ثاني=وان حصل تأخير سجل في سجله
يامحمد ماعلى الدنيا ضماني=كم وفين ماتهيت عشقتله
وفي ختام القول بالله المستعاني= تحت ظل اللي كسى الاجواد ظله
خالد بن مطلق بن منيجل العاصمي