ما كامل الا وجه جزل التواهيب

البرق لعيون المولّع مناديب
والبيد لقدام الخلاوي ركايب

وارواحنا لهموم بقعا معازيب
ومعزّب الارواح قبر ونصايب

سبحان من يخفي عن العالم الغيب
وخلاّ الوعد من نازع الروح غايب

كلً يسوق الرجل ويروح ويجيب
احدً يجيب بسلم واحدً نهايب

واحدً يجيب الفود والعز والطيب
واحدً يذله كل ما كان جايب

من لا ستر وجهه عن الذل والعيب
ما عاد يلقى لذل وجهه طبايب

ومن لا حمى وجهه قبل طلعت الشيب
محدن يعوضه وجه لا صار شايب

ولا صار ذكرك فوق روس المراقيب
خلك على دربك ترى الدرب صايب

تصير بعيون النشاما كما الذيب
وفعيون عدوانك عطيب الظرايب

موت الفتى بالمرهفات المحاديب
آخير من حيً مع الناس خايب

موتً تباكا له عيون الاجانيب
ولا عيشتً تدعي عليها القرايب

ولّي نفوسً ما تروم المواجيب
وولّي يدينن ما تسدّ النوايب

عذر الردي ما كل من يجهد مصيب
عود الحماطة كاسرته الهبايب

ما يخلف الهقوه طوال الأشانيب
صحيح من قال المراجل وهايب

يربى على الشاهوق عكف المخاليب
والاّ الوطى يرباه بوم الخرايب

من راقب العالم يشوف التعاجيب
ومن طاول الدنيا يشوف الغرايب

غير النبي محدً بليّا عذاريب
وكلً على الثاني سيوله جذايب

ما كامل الا وجه جزل التواهيب
ولا رابح الا اللي من الذنب تايب

كلٍ ذنوبه تغرق الكم والجيب
وكلٍ عليه من الليالي مصايب

ليه؟ الحسد؟ والغل؟ والشك؟ والريب ؟
وليه ؟ القطيعه واندلاع الحرايب ؟

يولد الاحقاد شذب العراقيب
والحقد سمً في المعاليق ذايب

شرارةٍ من ملحقين المشاهيب
من ناشته خلّت ضلوعه حطايب

يومون بالأمواس مثل القصاصيب
ذنبً يوقّف منه قطر السحايب

لعل من يفرح بشيل المشاعيب
ويصير في فرقا الرفاقه سبايب

تقطع عراويّه من الرزق والصيب
ويموت ما تنظر عيونه حبايب

وتصفى النفوس ويركدنّ المشاريب
لابه ذنَب عقرب ولابه نشايب

هذا بعض ما علمتنا التجاريب
اللي من الايام جتني جلايب

ولا كامل اإلاّ وجه من يعلم الغيب
ولا رابح إلاّ اللي عن الذنب تايب

خالد مدعث الدوسري

...............

...


اختيار موفق

ولكن

المعذرة . الموضوع مكرر


http://www.alweam.net/vb/showthread.php?t=90217

...

صحيح القصيدة مكررة يالنهر الخالد

لكن يبقى ذوقك هو القمة