قصيدة تحكي واقعنا اليوم

بسم الله الرحمن الرحيم

قصيده برغم طولها لكنها اعجبتني اتمنى ان ترتقي لذاائقتكم
&&&&
يالله وانا طالبك تغفـر لـي ذنوبـي يـا غفـور
ارجيك والجا لك وانـا سالـك واعيـدالمسأله

لوما تطهرنـي بعفـوك مـا تطهرنـي البحـور
جيتـك وذنبـي قـد تعـلاّ غاربـي يـا مثقلـه

أنا من الطين انخلقت , أخطـي ولانيـب معـذور
قامت علي الحجّـه بدعـوة رسلـك المرسلـه

مؤمن بتوراتـك و إنجيلـك و مؤمـن بالزبـور
و بسنّـة محمـد وآيـات الكـتـاب المنـزلـه

لكن خُدعت بزخـرف الدنيـا وزادتنـي غـرور
أبدت مفاتنهـا و ورتنـي مـن العمـر اجملـه

طبعاً بما إنـي بنـي آدم حصـل منّـي قصـور
واذنبت يـا مـولاي ذنـبٍ بالخفـا مـا تجهلـه

أسألك تغفر لي و تستر موقفـي يـوم النشـور
اليا القفت خلقـك صحايفهـا وهـي مستذهلـه

من يستلمها بالشمال افلس وهـو يدعـو ثبـور
ومن يستلمها باليميـن افلـح لخيـر المنزلـه

واسألك يا ربـي تعاونّـي علـى نيـل الأجـور
أحيا حيـاةٍ مكسبـي فيهـا مـن البـر افضلـه

واسألك جاهٍ مع هـل الدنيـا وحـظٍ مـا يبـور
أيضاً وعرفٍ مـع هـل الحكمـه ورزقٍ تكفلـه

من لا تهيّا لـه مقـامٍ مـع طويليـن الشبـور
يبكي على ما ضاع من عمره وخيبـات عملـه

وان شاب راسه لا ترجّى فيـه تجبيـر الكسـور
لا خير فـي تالـي زمـانٍ مـا تغانمـت اوّلـه

ومانيب ناسي قصةٍ صـارت وانـا ازورالقبـور
لازلـت افكـر فـي غرابتهـا وبالـي تشغلـه

ساعة ظهر لي شايبٍ له حول قرنيـن محجـور
في جوف قبرٍ عن هـل الدنيـا طـواه ويعزلـه

سلّم وجا صوبي يقول : ابنشـدك يللـي تـزور
عن حالة الدنيا وعن وضع الزمان وعـن هلـه

أنا مضى وقتي ومـرّت بـي طويـلات الدهـور
والباقـي بعمـري بعيشـه بينكـم واستكملـه

قلت : الزمان اللي يبارينا علـى خبـرك يـدور
الوقت نفسـه مـا تغيّـر ماشـيٍ فـي جدولـه

أما البشر , , , لا والله الاّ غير من حد الجـذور
صار انتقالٍ مـن يميـن الـى يسـار المنقلـه

استغرب الشايب من اللي قلـت وبليّـا شعـور
حط اليمين اعلىالشمال وخاطـره فيـه اسئلـه

قال : افتني عن حالة الشيبان والشيـخ الوقـور
أهل الخبر والراي والحكمـه وضـرب الأمثلـه

القدوه اصحاب الأمور اللي تطـاع بكـل شـور
اللـي يفضّـون النـزاع ويحكمـون المشكلـه

قلت : البعض منهم على ما قلت في وصفك وقور
قدوه ولكن رايهـم مـا ينفـرض فـي مسألـه

الطاعه العميـا بقـا منهـا مجاملـة الحضـور
اللـي تلاقيهـا مـع اوّل فـرصـةٍ متنصّـلـه

والبعض لا عبـدٍ يخـاف الله ولا عبـدٍ شكـور
لا زهّـده شيبـه مـن الدنيـا ولا هـو جمّلـه

بهيمةٍ يرجـع علـى منحـاه الاوّل ومحصـور
فـي لعـب بيلوتـه وريـح زقارتـه ومعسّلـه

والبعض الآخر شابت رموشه على درب الفجـور
ينقـل جـوازه للسفـر مـن مزبلـه لا مزبلـه

أشيمطٍ زانـي قضـا عمـره بحانـات الخمـور
والعايلـه ورعٍ يغـرّر بـه وبـنـت مهمّـلـه

قال : افتني عن حالة الخفـرات ربّـات الخـدور
اللي تصـان بـبيـت عايلهـا و بابـه تقفلـه

شيهانةٍ تشمخ عفاف وتصقـل فـروخ الصقـور
بين الفريق بـبشتهـا الضافـي وثـوبٍ تسبلـه

قلت : العـذارى فـي زمنّـا ببغـاوات الطيـور
تقليد هرج و عرض ريـشٍ خلفهـا تستخملـه

تلبس عباةٍ ضيّقـت حـول الردايـف والخصـور
فضيحةٍ تكشف جسدها مـن علـوّه لأسفلـه

وموضة شيالٍ تكشف الوجنات والـوان الشعـور
والمحـرم تبـدّل بـجـوالٍ بيـدهـا تحمـلـه

لا فوّحت صفر الدلال ولا عرفت غـش القـدور
تطبـخ لـهـا خـدّامـةٍ بالعايـلـه متوكـلـه

الأم ما صانت عفاف البنت من عمـر الزهـور
والأب ديّـوثٍ تحكـمـه حـرمـةٍ مسترجـلـه

وشلـون يتربّـى عيـال ام التبـرّج والسفـور
الاّ خنـازيـرٍ دمـاهـا بــارده ومغـفّـلـه

قال : افتني بحال الشباب الصلب صيّـاد النمـور
الفـارس اللـي ينطـح خصومـه بزنـدٍ يفتلـه

الوافي الشهم الغيور اللي لعرض الجـار سـور
البار عند امّـه وابـوه وعلـم ربعـه يشغلـه

قلت : الشباب بوقتنا وجهه مثـل بـدر البـدور
والجسم من زود الرخا ما تنفتـل فيـه عضلـه

قصّـة شعـورٍ صيّرتهـم لا إنـاث ولا ذكـور
والثـوب راح ولا بقـى الاّ عـالـمٍ متبنطـلـه

ناسٍ ( فلنتينو ) وناسٍ تلبـس ( كرستانديـور )
صار التنافـس بينهـم فـي لبسهـم والجنتلـه

من كان يشرب من قرار البير مشروبه ( بيور )
والبل راعيها غدا يشـرب حليـب ( النستلـه )

مامنهم اللي قام دون اعـراض جيرانـه غيـور
من قام قالو , , وشـملقّف حضرته ؟ وشـدخّله

والوالدين حقوقهم ضاعت وعنهـم فـي نفـور
ان غـاب عنهـم لا تذكرهـم ولا جـاه الولـه

بدّا عليهم شلّـةٍ تهـوى الوطـا بيـن الجحـور
لو تعزله عنهم تبـي لـه شـان كنّـك تقتلـه

ما راح يوم يشارك ربوعه بحـزن ولا سـرور
حتى ابن عمّه يعرفه بالوجـه واسمـه يجهلـه

بدّل حكاه وضيّـع سلومـه وحالـه فـي دبـور
وان شاف ضيف يخش حتى انّه يفـارق منزلـه

ناظر لي الشايب بعينٍ تجمـع السبـع البحـور
يقول : انا لا يمكـن ادخـل مجتمعكـم واقبلـه

انتو لكم وقتٍ تصـدّع مـن بلاويـه الصخـور
ما يقعد الجمّال به ساعـه ولـو ضـاع جملـه

الشاعر/ ظافر القحطاني

رااااااائعه ياشمووووع

اشكرك على ذوقك الرفيع

قصيده جزله ومعناها جزل
وصح لسان شاعرها

وسلم ذوق شمووووعه

ولاغرابه دمتي بخير


وتحياتي لك

طبعاً بما إنـي بنـي آدم حصـل منّـي قصـور
واذنبت يـا مـولاي ذنـبٍ بالخفـا مـا تجهلـه

الف الحمدلله على السلامة شموع

قصيدة رائعة حقيقة لكن الطول في القصيدة

يجعلها معرّضة للحشو وتكرار القافية ,,

تسلم هذه الأنامل ...

أسألك تغفر لي و تستر موقفـي يـوم النشـور
اليا القفت خلقـك صحايفهـا وهـي مستذهلـه

من يستلمها بالشمال افلس وهـو يدعـو ثبـور
ومن يستلمها باليميـن افلـح لخيـر المنزلـه

واسألك يا ربـي تعاونّـي علـى نيـل الأجـور
أحيا حيـاةٍ مكسبـي فيهـا مـن البـر افضلـه

قصيده رائعه يا اشعشع
يسعدك ربي

السلام عليكم ورحمة الله وبركاته



(( وربي ذوق))


بصرحه نقل جميل ورائع يعطيك العافيه أخت شموع الغربية

	المشاركة الأصلية كتبت بواسطة خلف الجابري

	رااااااائعه ياشمووووع اشكرك على ذوقك الرفيع قصيده جزله ومعناها جزل وصح لسان شاعرها وسلم ذوق شمووووعه ولاغرابه دمتي بخير وتحياتي لك

هلا وغلا بك اخوي خلف الله يحييك
ولو العفو الشكر لله ثم لك على المرور الطيب
سلمت وربي يسلمك من النار وعذابها
يدوووووم لك الخير يارب
تشكرات خيي على المرور
اسعدك المولى بكل خير

	المشاركة الأصلية كتبت بواسطة أبو خـ البجادي ـالد

	طبعاً بما إنـي بنـي آدم حصـل منّـي قصـور واذنبت يـا مـولاي ذنـبٍ بالخفـا مـا تجهلـه الف الحمدلله على السلامة شموع قصيدة رائعة حقيقة لكن الطول في القصيدة يجعلها معرّضة للحشو وتكرار القافية ,, تسلم هذه الأنامل ...

هلا ومرحبا اخي ابو خالد الله يحييك
الله يسلمك من النار وعذابها
الاروع مرورك سيدي،،صحيح وهذا من العيوب المخله بالنظم
الله يسلمك ويسمنك يارب
مشكور خيي على المرور الله يحفظك

	المشاركة الأصلية كتبت بواسطة ملكة الاحساس

	أسألك تغفر لي و تستر موقفـي يـوم النشـور اليا القفت خلقـك صحايفهـا وهـي مستذهلـه من يستلمها بالشمال افلس وهـو يدعـو ثبـور ومن يستلمها باليميـن افلـح لخيـر المنزلـه واسألك يا ربـي تعاونّـي علـى نيـل الأجـور أحيا حيـاةٍ مكسبـي فيهـا مـن البـر افضلـه قصيده رائعه يا اشعشع يسعدك ربي

هلا وغلا بالغلا كله ملووكه
الاروع مرورك سيدتي،،
ويسعدك دنيا واخره
تشراات مليكات على المرور ربي يحفظك

	المشاركة الأصلية كتبت بواسطة ...hamody...

	السلام عليكم ورحمة الله وبركاته (( وربي ذوق)) بصرحه نقل جميل ورائع يعطيك العافيه أخت شموع الغربية

وعليكم السلام ورحمة الله وبركاته
حياك ربي اخوي حمودي
الذوق مرورك سيدي وهو الاروع
وربنا يعافيك ويسعدك بكل خير
شكرا اخي حمودي على المرور

الله الله

تسلمين يا شموع على الثقل

وصح السان الشاعرضافر القحطاني

وليس غريب عليك اختي شموع التميز بحق انتي رائعه بكل حلاتك


تقبلي مروري المتواضع