حدث في باص المدرسة .

12 / 10 / 2001, 59 : 05 AM

اركض بسرعة .. بسرعة .. علشان الحق الباص ....

لبست عبايتي وشلت شنطتي .. واركض بسرعة .. وعبايتي تطير وراي .. وأشر على السواق ( راجا ) بيدي .. واقففف .. الحمد الله .. ركبت .. رميت شنطتي و جلست .. هاااهوها .

وألحين .. بدت رحلت المتاعب اليومية .. (نوره) الله يذكرها بالخير .. كانت تسميه .. ( الجندول ) .. علشان سرعته المكوكية .. وتجاوزاته وقفزاته الي تكسر ظهورنا .. ليين ما نوصل للبيت .. كنا طالعين من مصارعه حره .. وتفككت (صواميلنا) ..

ماحسيت بنفسي .. الا انا نايمه من التعب . . ويوم قمت بعد دقايق .. لقيت نفسي .. يافشييييييييله .. قاعده بحضن البنت الي جنبي .. من كثر اللفات طحت بحضنها وانا نايمه .. قمت وقعدت زين وتأسفت منها .. بس ماردت .. ياربي وش السالفه .. واسمع شخيير .. يوووه حتى هي نايمه ..

وفجأه ..

طاااااااخ .. طووووب .. صقع راسي بالسقف الباص .. هاااهوها .

.. اييه متعودين .. صاقع بالرصيف .. لووووووول.. احح راسي ورم كنه الصعرور يبرز من فوق العبايه .. قعدت زين ..

شفت الشباك .. وشفت المنظر المعتاد .. شباب يلاحقوننا .. وحاطين لوحه فيها رقمهم .. وبأكبر خط .. وكنا عجايز بمحو أميه . . شفت الي وراي .. فيه شلله بنات .. يضحكوون وحركات سخيفه ..

عصبببت انا .. بروح عندهم اكلمهم ..........

طاااااااااااااخ .. اوووه ..

تخميسه فتاكه من (راجا) خلتني انسى وين انا واتمدد على الأرض .. سحبتني بنت جزاها الله خير .. وهي تلومني

(( شلون توقفين والباص يفحط )) .. كعععع

ابتسمت وانا امسك ظهري من الألم .. ايه والله .. صدق انه التفحيط بعينه ..

قامت بنت وقالت لــ (راجا) :

لحظه رفيق .. ارجع .. بيت انا يسار ..

عصب الاخ وقام يصارخ على المسكينه ..

أنت قرقر وازد والله .. بعدين مافي شوف انت بيت مالكم

(( انت تقرقرين وما تنتبهين اذا مرينا على بيتكم ))

قالت المسكينه وهي خايفه : لا والله .. بس انت يمشي بسرعه !!!

صرخ وقال : لا مافيه يرجع انا .. انت كلاص كخر نفر ..!!

(( عقابا لك انتي آخر وحده ))

المهم .. التفت يبغى يكمل سواقته .. ولا ذوليك البزارين الي يرمون صخر على الزجاج الي قدام .. وانشلخ الزجاج ...

عصصصصصصصصب (راجا) .. وتحول إلى وحش .. وما ألوم المسكين.. نزل بسرعة من الباص وهو يزأر .. ويركض وراهم وهم ينحاشون .......

فـجــــــــأة...

صرخت وحده من البنات : بناااااااااااااااات .. شوفوا .. والتفــتنا ورانا .. ولا سياره الشباب الي كانوا يلاحقونا .. وموقفين سيارتهم ورا الباص .. وجالسين يناظرون فينا ويبتسمون ..

حنا البنات خايفين .. إحنا بنات ما نتجاوز الخمسة .. ولوحدنا

وباب الباص مفتوح ....

وذولي الشباب المتسكعون نتوقع منهم الشر في أي لحظه..

يالله وين أنت يا (راجا ) .. ذاك الخبل ما ندري وين اختفى ..

وحنا متخرعين .. وفتح أحدهم باب سيارتهم .. واللي وراه ..

نزلوا منها .. متجهين لنا ..!!!

و باب الباص للحين مفتوح .. واحنا ما ندري وش نسوي ..

أما البنات اللي ورا وحده منهم قاعدة تصيح ...

وصرخت وحده منهم .. سكروا الباب .. بسرعة

ووحده مدري من وين جتها الشجاعة والسرعة .. في موقف عقد ألسنتنا .. قفزت بسرعة .. هوووووب .. وسكرت الباب في وجوههم تماما وفي آخر لحظة .....

وقفوا عند الباب وهم يضحكون .. ويعلقون بسخافة .. وراحوا ...

وشكرنا البنت .. واللي ورا للحين تصيح وصديقاتها يهدئونها

هنا استغليت الفرصة .. وقلت .. كل هذا بسببكم .. لو طنشــتوهم .. كان مالحقونا .. شفتوا وش صار كله منكم !!

المهم .....

شفت الشباك .. وكان (راجا) .. راجع وشعره منفوش ..

لوووووووووووووووووووول .. وشكله يموت من الضحك

وقلت ..

إيه أكيد تصرف هذا المتهور .......!!!

نقره لعرض الصورة في صفحة مستقلة

ســــــــــــــــــــــ نقره لعرض الصورة في صفحة مستقلة

ــــــــــــامحوني على الاطالة .

12 / 10 / 2001, 05 : 06 AM

مرحبا.....

صباحك ورد اختي الغاليه اردينا... موضوع حلووو ومشاركه متميزه...

الله يعينكم على راجا.... بس فعلاً مشاء الله طالع سواق فنان يصلح يكون في حلبات السباق.....

وهذي مشكله المفروض ان تنضر بعين الاعتبار من المسؤولن عن باصات البنات والله مساكين مصارعه وتفحيط على كيف كيف:D:D

يالله تتعودون عليها بسرعه وهذا احسن مافيكم....

اتمنى لك التوفيق والمزيد من التقدم..... وان الله يفككم من شر (راجا)

بس حرام جاي يترزق الله:D:D

تحياتي

اخوك
الهاجر

12 / 10 / 2001, 51 : 06 AM

ههههههههههههههههههههههههههههههه

هاهاهاهاهاهاهاه

نياهاهاهاهاهااهاههاه

هوهووهوهوهوهوهيييييييي

ردووونتي

حلوه هاي يوم كنتي نايمه:D :D :D :D هههههههههههههه

الله يعينكم انتو ياللي ترووحون بالباصاات :D :D :D

حلوه القصه بس انا كنت اريد التكمله

ليش ماكملتيها نقره لعرض الصورة في صفحة مستقلة

12 / 10 / 2001, 26 : 06 PM

مرحبا...ردونه... نقره لعرض الصورة في صفحة مستقلة

قصه مدرى وش اسميها حلوه ولا تحزن....

فيها من كل شى شوى.......

يعنى مو كفايه عليكم..راجا......شكله يقرب لوسواقنا..:D
كل يوم..وهو مضيعنى فى شارع ماعلينا.........
اقول .......تمسكى زين..اول ماتوصلين عطينى خبر.ولا خلى ...سياره الاسعاف.تحرصكم..للطوارى...

اما الشباب اللله يهديهم.....

نقره لعرض الصورة في صفحة مستقلة

12 / 10 / 2001, 52 : 06 PM

سلااااام

ويلوموني أول ليه مااروح مع الباص وأتشرط ..

يقولون دلوووعة .. :o

وينهم يقرون هالموضوع ويشوفون راس أردينا اللي ورم من كثر التصقيع في السقف :p

الله يعينك يااارب نقره لعرض الصورة في صفحة مستقلة

الشمــــــــس

12 / 10 / 2001, 56 : 06 PM

:D :D :D :D :D :D :D :D :D :D :D :D :D :D :D
طيب وش سويتوا بعدها ... قطيتوا لراجا يسوي القزاز مسكين .. والا ناوين تورطونه بلحالة .. مو كأنكم راكبين معاه .

لا وحلوه هالعبارة : وذولي الشباب المتسكعون نتوقع منهم الشر في أي لحظه..

أما المتسكعووون .. بس سلمي لي على البنت اللي طمرت وقفلت الباب ... أمحق .

بعدين اللي فهمته من القصة إنووووو البنات هم السبب .
هنا استغليت الفرصة .. وقلت .. كل هذا بسببكم .. لو طنشــتوهم .. كان مالحقونا .. شفتوا وش صار كله منكم !!

12 / 10 / 2001, 06 : 07 PM

ههههههههههههههههه...........احسن ما سوي راجاااااااااا

نعم اردينااااااااااا البنات هم سبب التفاف الشباب عليهم.......لانهم ولو كانو مؤدبات ما كان احد تجراء من الشباب

ولحقكم.........ويقول المثل:

امسكو عنزكم تيسنا ما يجيكم :D تشبيه معيب لكن يفي بالغرض.........

بعدين ليه يا رادينا ما تلبسون .......لباس واقي :p

سواقين مستهترين ويجب ابلاغ ....المسئولين عنهم

12 / 10 / 2001, 30 : 08 PM

هلابك ردونه

يسلام عليك ذكرتيني بذيك الايام

عاد يازينها من ايام 0الله يخلف

لا وكله كوم والتكيف كوم ثاني

عز الظهر والشمس مشاء الله شاده حيلها مهي مقصره (الشمس تراها مهب انتي لاتقولين اني اتحرش :D )

والتكيف يااااسلام على التكيف

الوحده مايمديها توصل البيت
الا يستقبلونها اهلها بطاسه
لانها بتصير ذايبه من الحر :D

لا وكله كوم
ولما يتعطل الباص بنص الطريق

ونقعد الف ساعه على مايجي باص الانقاذ

وياحلاااااوه لما يجي نقره لعرض الصورة في صفحة مستقلة

الفين طالبه (والله من التهوله مدرستنا كلها ماتجي ربع هالعدد :D )

ايه خليني اكمل ياشينكم لاقاطعتوني

اقولكم الفين طالبه يركبون بباص ماياخذ الا عشر طالبات :p
تخيلو عاد الشكل كأننا سكري مكنوز
مانوصل الا الدبس يقطر :D نقره لعرض الصورة في صفحة مستقلة

ايييييه دنيا

الله يعين عليها بس
اييييييييييييه

هالايام مدري وشبي صايره اون واجد
لدرجة اني اشك اني تحولت لسيارة مرور:D :D

13 / 10 / 2001, 52 : 02 AM

... اردينا ...

يا حلو مواضيعك ..

هااااادفة وتسلي في نفس الوقت الله يسعد قلبك ..

ويوسع صدرك بالعافية ...ويوفقك ..

بس قاعدة ادعي كاني جدتي الله يرحمها ...

حبيبتي ...

سلامة راسك يا جعلها راس راجا ...اللي تنصقع ..

وثاني مرة قولي للمهبول هذا اللي اسمه راجا لا يخلي الباب مفتوح ..

والبنات هذول اشتكيهم عند المديرة ( وحدة تحب المشاكل )

عشان ثاني مرة يتأدبو ولا يجيبو المشاكل لنفسهم ولغيرهم ...

*******************************

بنت عنيزة ...

اخخخخخخخ ..سارقة ضحتك ..

سكري مكنوز عاد ..

وسلامة قلبك من الونة ...

13 / 10 / 2001, 02 : 08 AM

الأخـت/ أردينا

قصه حـلوه صراحه

وأحـلى مافيها راسك اللي تورم

والله يعطـيك العافيه ماتصدقين تركبين الباص
على طول تدعـسين

وبعدين ماقلتي بأي درجه كنتي راكبه بالباص ( أولى ولا أولى) هههههه

إنتبهي لراسك مره ثانيه ولا عاد تنامــين

تحيات الهجــــيني ............

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رسمي عالجدار في المدرسة ..~	رآنيا	‏ \|\| روائعْ الفنْ التشْكِيلي والفوتوغرافِي	9	08 / 12 / 2013 30 : 10 AM
الهروب من المدرسة	المهذب	تطوير الذات	22	15 / 02 / 2007 34 : 01 AM
كيف تنطرد من المدرسة باربع عشر طريقة !!!!	دانه الخليج	‏ \|\|ترفيه وَمسآبقآت	6	15 / 10 / 2003 36 : 06 AM
الهروب من المدرسة	المهذب	‏ \|\| اوْرآق مُلَوَنة ..	6	25 / 03 / 2003 02 : 06 PM
العودة إلى المدرسة والمستقبل!	الحارث	‏ نفَحَآت إيمَآنِية	2	06 / 09 / 2001 26 : 02 AM

الذين يشاهدون محتوى الموضوع الآن : 1 ( الأعضاء 0 والزوار 1)