فوق السطح -- ممنوع طلوع الورعان

بما اني مملوحه وكلامي هذا يشهد عليه الكيبورد والكاميره اللي لاطستها بلزقة جروح عقب ما سمعت باللي يفتحون الكاميرات بدون ما ادري وتعرفون عااااد الوحده الزم ماعليها سمعتها <<<< الخطر على اللي يبي يشوفتس
ايوه نرجع لموضوعنا
بما اني مملوحه وكيوت وكلش وملش لازم اي واحد يرد علي يغمض ويذكر الله ويجيب معه قاروره صحه صغيرة ويتفل فيها عشان اذا حسيت بشي اقرطعها <<< الكلام ببلاش والا الزين من جنبها
خلوني احلم لو احلام يقظه اني مملوحه

الموضوع

فوق سطح بيت من بيوت الحارة <<< ودي اقول حارة الضبع واني انا وابو العز نلعب مصاقيل بكل براءه وه بس
كانت الساعه الخامسه مسيان كنت في ذيك الحزه جالسه مثل اي بنت تدور رومناسيه منجطله على ذاك الجلال الاحمر ومعي باليد اليسرى شمعه <<< الشمعه عشان ما اطيح وانا نازله مع الدرج لان اخوي عزوز كاسر كل لمبات الدرج يعني لاحد يفهمن غلط تؤبرو تسبدي
وباليد اليمنى سندوشة كراث وقدامي طاااسه كلها فصفص وبيالة شاهي باقي بها نصفها وفيه كم ذباب يخطط يخطف له رشفه بس معصي << وش رايكم بالوصوف مانيب تسني اجاثا غرتسي
كانت عادتي اليوميه من يوم اني صغيره
مالكم بالطويلة المهم انه في ذاك اليوم وانا جالسة ولاعندي من الشيطان طاري جالسه لا لي ولا علي من الدنيا اهم شي عندي البيالة ماتخلص وبنفس الوقت ما يقربها شي مالي خلق انزل واتخرفع بالدرج زي العادة على الاقل ااجلها شوي لين المغرب وباقي الليل املط كل الفكس اللي بالبيت بجسمي عقب الصعارير اللي بتجيني
كنت جالسه ومره انجطل ذات اليمين ومره ذات اليسار عشان البشره تاخذ حقها لاني ناويه اقلب لوني طيني وشمسنا لو اغلط واجلس دقيقة زود يصير لوني فحمي صابين عليه ماء وماينفع ولا اقوى ديتول بالعالم
وبينم انا جالسه والا ذيك الشوشه اللي كنها ظهر خروف ما شاف الماء من سنة نوح كل مالها تطلع
طارت عيوني وش ذا ؟؟
انا ماخبرت حولنا حوش غنم وحتى لو عندنا انا بالسطح وش يجيب الخروف للسطح !!
عدلت جلستي وتلحفت جلالي وكبيت البيالة على تنورتي <<< ملزمه ان الذبابين ماتشرب شي
بسم الله وش ذا لايكون بس ملك الموت جاي وانا ماتبت وتحللت من ام الجيران لاني مستلمتها حش من الصبح عند امي
بدت الدموع تطلع كنها بزبوز مويه يهرب
مقدر اتحرك لان هالشوشه من جهة باب السطح قلت مالي الا امسك البيالة واصكه فيها واطب محيفره مع الدرج لو بعدها يدخلوني ورشه موب مستشفى
مسكت البيالة وقريت كل شي حافظته من القرآن ووقفت انتظر
بدت الشوشه ترتفع شوي شوي وانا كل مالها تكبر عيوني شوي شوي وجدايلي ترتفع لفوق صرت كني معلقه مع جدايلي من مواصير الخزان
شوي شوي وكل مالها ترتفع الشوشه تطلع بداية الجبهه <<< مشاء الله اجل وشلون باقي الخشه
صارت الشوشه واقفه بوضع عامودي كنها غطاء الدشوش الاسود اللي ماطلع الدش
والجبهه صارت تروح وتجي انا ارتحت شوي قلت ايه آدمي تهون <<< هذا معروف وش يبي امره سهل ويمكن اقوى اسطره اما الموت ماحد يقواه
وصلت اليد اليمنى من فوق السور ولحقتها الثانيه ويوم طلعت الخشه اثره ولد ويوم فتح عيونه المسكين وشف الجدايل الظاهر هو اللي توحش واطلق كل يدينه وزود على كذا كان فيه شويه هوا والشوشه مشاء الله صايره كنها برشوت مادريت الا والولد طاير كنه كيس زباله بالهواء وطراااااااااااااااااااااااااااااخ باخر حوش بيتنا
وانا اللي انزل مع الدرج ركض للحوش اشوف لا يكون مااات الولد وابتلش فيها عاد انا ناقصه ام الجيران متهمتني اني صاكتن بقرتها عين واني انا اللي موتها جعلها تلحقها
نزلت وعلى طول للحوش والا اشوفه متكوم بزاويه كنها قشاش الارض ماتدري اوله من اخره تجاسرت امسكه واشوف هو حي او ميت مادريت الا وهو يلتفت لمي وهو يشاهق من الروعه
طلع ولد الجيران الله يبارك فيه لاهو ولا امه وصارت شوشته اللي هو حطها خيره صارت ايرباق زي اللي بالسيارات وماجاه الا كم فلقه يوم شفته كذا طلعت كراعيني بكمل عليه ولد الذين
مادريت الا وامه داخله مع باب البايكه اللي يالله ياخذها ها الشيول ولسانها سابقها الظاهر عيال الحارة شايفينه يوم يطيح وعلمو امه
بدت تسبني وتقول كملت يالسربوته بعد ما طيحتيه من السطح بتكملين عليه عشانه ماعطاك وجه بالسطح <<< ياخزياه بس وش ذا الحتسي
ناظرتها بنظرة شايفتها بفلم هندي بس للاسف مافيه موسيقى
الحين من زينك انتي وولدك شبيه البربري عشان اناظره
الا هو وش مطلعه للسطح مع المواسير كنه جرذي !!
وبدينا بالسب ومعط الشوش انا والتفخه ام الجيران لين دخلت امي توها راجعه مسيرة فقيت كشرتي قلت اخيراً بفتك مادريت الا وهي تكمل علي مع ام الجيران بعرجد النخله وخذي ياجلد لين تفلت العافيه وكملتها امي تقول لي هماي انصحك تزوجي واقبلي باللي يجونك وانتي بس تتسدحين بالسطح واخرتها كذا تلاحقين البزارين
مير انا اوريك وش اسوي فيك خلاص مافيه سطح ولا فيه حوش ولا شي لين تعرسين ها المره الولد ماجاه شي وسلمنا المره الثانيه وش بتسوين فيه جعلك الماحي

انسجنت بغرفتي بعدها لمدة ست شهور حتى الدريشه بنوها وصرت اشارك الذبابين بكل شي بعد ماكنت عزيزة نفس بس وش اسوي الظروف حكمت ينعل ام الظروف اللي زي كذا

ودي اعرف بس شي واحد قبل اكل ذباب وانتحر ها الولد وش يبي طالع للسطح !!

يمكن سامع بجمالي الرباني وطالع يشوف بعينه ؟؟

هذا قدر السعوديات المزايين حتى السطح محرم علينا <<< صرنا نحط جلال عشان القوقل ارث بس ما افتكينا من اللي عندنا مشاركة استهباليه

اعجبتني في احد المواقع

هههههههههههههههههههههههه

اهم شي ساندويش الكراث

بس تتوقعيـن حكـايه ولا عطوووف اللي قااعده تبلعهـا


يسلمـوووا ياام شوووشـه

::

هههههههههههههههههههههههههههههههههههههههههههههههههه ههههههههههههههههههههههههههههههههههههه روعه ...

ضحكني الجلال الحمر خخخخخخخخخخخخخخخخخخخخخ

وش الكراث ؟؟

<<== ماشدها الا الأكل هع هع

	المشاركة الأصلية كتبت بواسطة المتهور

	هههههههههههههههههههههههه اهم شي ساندويش الكراث بس تتوقعيـن حكـايه ولا عطوووف اللي قااعده تبلعهـا يسلمـوووا ياام شوووشـه ::

ماكنت شايفتها زين

لانها على جنب

يمكن غزول او شموخة

لان شوشتها طايرة

	المشاركة الأصلية كتبت بواسطة أحلــى من العقد

	هههههههههههههههههههههههههههههههههههههههههههههههههه ههههههههههههههههههههههههههههههههههههه روعه ... ضحكني الجلال الحمر خخخخخخخخخخخخخخخخخخخخخ

بس والموضوع كله وين راح!!!

	المشاركة الأصلية كتبت بواسطة الدلع شرقاوي

	وش الكراث ؟؟ <<== ماشدها الا الأكل هع هع

الكراث " بصل اخضر"


احيانا ناكله مع الرزاو مع التميس الحار

واحيانا نقطعه ونحطه بالمطبق

نحبه يا اهل نجد

ما ادري ينتبت عندكم في بلدكم هناك