ما هو الضب

باب او دريشة ماجاء في الضبان

هذي مجموعة معلومات عن الضب من حد الراس الين آخر شوكه في العكرة يعني تشريح كامل متكامل واتمنى اني اكون وفقت في تقديم هالمعلومات المفيده عن هالحيوان الزاحف


--------------------------------------------------------------------------------

اسم الضب

يسمى ذكر الضب عير وخاصه اذا كان سافط العداد في الكبر والأنثى اسمها ضبه ، ومكون ، وولدهم الصغير اسمه سحيلي يعني الابو ينادونه ربعة ابو سحل اما البنت فاسمها ضبيبة لكن صعب جدا في علم الضببه انك تعرف الذكر من الانث وخاصه اذا كانت الضببة توها في مقتبل العمر الا عاد اذا بغيت تخربها وتسوي حركات وسخه فهذا شي ثاني

راس الضب باللي فيه

دايم العير يكون في راسه ورقبته حدود سود وبعضهم يحسبها لحية من بعيد وهذي ميزة الذكر الشايب ، وسنون الضب قوية مع انها صغيره لكن اذا قرطك وانت تبيثر عليه فاحسن حل انك تنخج خشته بعود او تكب عليه فلفل الين يعطس وتطلع يدك منه ، ودايم تلاحظ الضب يشرب هواء ثم يبخه بقوه وخاصه اذا كان مطرود ومقفله معه ، اما عيونه فهي غالبا ما تكون حمر وصبياته عسليه وله اذان على شكل خياشيم وسمعه احيانا يكون الله بالخير لأنك ترمي عليه بالشوزن وتسف من عنده وما جاب خبرك بس عنده حاسه قويه بمجرد انه يلمح قرطاسه تدربى يجحر وما تشوف الا عكرته سابقته


--------------------------------------------------------------------------------

بطن وأحشاء الضب

آآآآآآه هنا مربط الضب هنا لندن قصدي هنا كلش المكينه والقير ونبدا بالمصارين اللي مالها داعي انك تخليها فيه بعد الذبح اكتم نفسك واقطعها وانطلها بعيد واهم شي في البطن هو السلايق هي بمثابة الكنز الثمين في احشاءه واذا كنت محظوظ بضب مربع ومزغدد من الربيع فتبي تلقى سلايقه حول ما تطلع مع اذانه من كبرهن وطولهن وفيه شي لازم تنتبه له في بطنه اللي هو المراره وهي عباره عن تفيفيخه صغيره لكن اذا انفقعت في البطن فسدت اللي فيه اقطعها بشويش واغسل البطن عقبها

------------------------------------------

عكرة الضب

هنا الزبده وهنا مطلب الضب وهالعكره تتكون من واحد وعشرين عقدة تقريبا وتعتبر سلاحه في وقت الزنقه وضربة العكره تسمى لسبه مشتقه من لسب يلسب لسبا اي رصعه و فيه طريقة ممتازه لتحريك الضب اذا شصب مكانه وهي انك تحرش عكرته وتدغدها مع جوانبها وبكذا يبي يمشي طبلونه في أي اتجاه تبيه ، بالاضافه الى ان العكره تعتبر اطعم مافي الضب لدرجة ان بعضهم اذا صاده يقطع عكرته ويطلقه الين يطلع شكله كنه موتر بدون نسافه


--------------------------------------------------------------------------------

جلد الضب

جلده طبعا احرش وخشن ويستخدمون جلده في تزيين النعال والشنط وابواك الفلوس ، وميزة جلده انه ما يتأثر بالماء هذا غير تحمله للحرارة


--------------------------------------------------------------------------------

بيض الضبه

يقولون ان الضبه تبيض حول سبعين بيضة او اكثر ويكون بيضها في حجم حلاو الصعو للي يعرفها او كبر المصاقيل وطبعا الضبه ما ترجن على بيضها لكنها تدفنه في مكان معين او مثلث الين يفقس ويبي له حول الاربعين يوم عشان يفقس يعني نفاسية بالضبط مثل حريمنا ويقال ان الأم تاكل عيالها اذا طلعوا من البيضه الا اللي وفق وعط قبل ما تطيح فيه


--------------------------------------------------------------------------------

حياته واطباعة

يقولون ( ايه لزقها في يقولون ) ان عمر الضب ياصل 300 سنه ؟ او اكثر والضب معروف عند الناس بطول العمر، هذا غير انه يبطي في موته لدرجة ما نتصورها واغلبية اللي ذبحوه وقطعوه وفي القدر سقطوه لقو بعض اجزاءه تتحرك ؟ وقالوا الاولين في احد امثلتهم (لزق المثل في الاولين ) يموت الضب وعكرته تلسب ، كنايه عن صعوبة موته ، ومن أطباعه انه ضعيف الذاكره وعشان كذا تلقاه ما يبعد عن جحره لكن اذا داخ مع الربيع وخربها بعيد عن الجحر وطردته فهو يبي يسحب السيفون على جحره وارض الله واسعه، ومن اطباعه انه ما يتواطن مع الورر وقبلهم هواش ولعنة خيّر مع انهم يتشابهون شوي في الشكل لكن الضب يفضل العقرب على هالحيوان الزاحف المعصقل وبينه وبين العقرب صداقه ومصالح فهو يسكنها جحره مقابل انها تقرص كل من حاول يدخل يده يتلمس عكره، ومن اطباعه ايضا انه فيه شوفة نفس وكبر وخاصه وقت الخضره والعشب وتشوفه يختال في مشية يسحب عكرته ويمشي بشكل متغنج ، ايضا له قدره عجيبه في صبره عن الاكل فتلقاه يجلس في الجحر كم شهر بدون اكل ، ، هذا غير انه ما يحتاج للماء لأن جلده خالي تماما من الكحول قصدي من المسام


--------------------------------------------------------------------------------

طرق صيدة

له كم طريقة واولها انك تجيب المسحاة والعتله وتبدا تحفر جحره لكن مشكلة جحره انه يكون طويل وعميق ومتعرج وهالطريقة انقرضت هالحين لكثرة العجازين في هالوقت ، والطريقة الثانيه هي انك (تغرّه ) بالماء الين يطلع وبعض الضببه هالحين تنبه للطريقه هذي وحط له خزان تصريف في جحره يعني يبي يقضي الماء ما طلع ، والطريقة الثالثه انك تشكمنه والمعروف انها مضره للضب وتفسد لحمه ، وفيه طريقه (المكناس ) وهو عصى تشبه وراعيه اذا شاف الضب خارط الريوس في جحره يختل له بشويش ويمشي على اطراف اصابعه و يطعنه طعنة غدر

	الرسالة الأصلية كتبت بواسطة سهران لوحدي وفيه شي لازم تنتبه له في بطنه اللي هو المراره وهي عباره عن تفيفيخه صغيره لكن اذا انفقعت في البطن فسدت اللي فيه اقطعها بشويش واغسل البطن عقبها ------------------------------------------ ، بالاضافه الى ان العكره تعتبر اطعم مافي الضب لدرجة ان بعضهم اذا صاده يقطع عكرته ويطلقه الين يطلع شكله كنه موتر بدون نسافه --------------------------------------------------------------------------------

ياعالم جاني غثيان ,,, وعععععععععع

قال ايش قال : إغسل بطنه ,,,

لاويقول : العكرة أطعم وألذ مافي الضب ,,,,, يعععععععع الله يكرم النعمة

أقول حبيب سهران ,,, والله شكلك مثل سفاري راعي ضبان

أقول عندي سؤال محيرني وبما انك خبير في الضبان فياليت تجاوبني حبيب ألبي :

هل الضب يشرب ماء ؟

بس الصراحة موضوعك ممتاز للي مايعرفون شيء عن الضبان مثلي

يسلمووووووو الأيادي يااااااااااااارب

سهــــــــــــران لوحـــــــــــــدك


يـــــــــــــ حـــــ تسبــــــدتي ــــامت ــــــــــــع

هااااااع هااااااع هااااااع هاااااع 0000

خويي سهران لوحدك ياقمر00

المهم جواب سمير يشرب الضب شوي مويه بعد فتره طوييييييييييييله

--------------------------------------

حلو سهران لوحدك كثر من المواضيع هذي اترك المشرفين عنك وعن قرفهم هههههههههههههههههه

اما التشبيه اللي بدون عكره هههههههههههههههههههههه الله يرجك 0000

صراحه تحفه هذي

تسلم ياقمر موضوع حلووووووووووووووووووووووووووووووووووو

هلا والله سمسم

اسف لعدم الرد في الفتره السابقه لعدم تواجدي للسفر الى مدينة الحبيب عليه السلام

اشكرك على اطلاعك بس ياخي الضب على فكره لذيذ ( رغم عدم حبي له وعدم اكله )



تحياتي مع احتراماتي

هلا ردونــــ ( العصفوره ) ـــــــــه

اسف لعدم الرد في الفتره السابقه لعدم تواجدي للسفر الى مدينة الحبيب عليه السلام

سلامت سبدك



تحياتي مع احتراماتي

هلا والله بسفاري

اسف لعدم الرد في الفتره السابقه لعدم تواجدي للسفر الى مدينة الحبيب عليه السلام

شكراً لك على اطلاعك على الموضوع





تحياتي مع احتراماتي

الضب ومعلومات قيمة
شكرا لك

شكراً لك عطارد على مرورك




تحياتي مع احتراماتي