ياهل الكيف..!!

القهوة العربية رمز الضيافة والكرم
حديثنا عن القهوة التي سطر كثير من الشعراء الابيات فيها منذ القدم فدعونا نستعرض الابيات التي ذكرت فيها لمجموعة من الشعراء


* يقول الشاعر محمد بن احمد بن محمد السديري:

يا بجاد شب النار وادن الدلالي =وأحمس لنا يا بجاد ما يقعد الراس
ودقه بنجر يا ظريف العيالي =يجذب لنا ربع على اكوار جلاس
وزله الى منه رقد كل سالي =وخله يفوح وقنن الهيل بقياس
وصبه ومده يا كريم السبالي =يبعد همومي يوم اشمه بالانفاس
فنجال يغدي ما تصور ببالي =روابع تضرب به أخماس وأسداس

* وهذا الشاعر الفارس تركي بن حميد حيث يصف القهوة وصوت النجر.

يا ما حلا يا عبيد في وقت الاسحار =جر الفراش وشب ضو المناره
معدلة تجذا على صالي النار =ونجر الى حرك تزايد عياره
النجرب طق وجاذب كل مرار =مالفه الملفوف من دون جاره
في ربعة ماهيب تحجب عن الجار =لامن ولد اللاش ما شب ناره

* وكذلك القصيدة المشهورة للشاعر: دغيم الظلماوي في القهوة:

يا كليب شب الناريا كليب شبه =عليك شبه والحطب لك يجابي
الوالمه يا كليب عجل بصبه =والرزق عند اللي ينشي السحابي
حنا علينا جيب ماها وحبه =وعليك تقليط الدلال العذابي
ادغث لها ياكليب من جزل خبه =وشبه الى منه هباكل هابي
باغي إلى شبيتها ثم قبه =تجذب سراة منبعيد غيابي
بنسرية يا كليب صلف مهبه =متلطمين وسوقهم بالعقابي
صبه لقرم صرفته ما حسبّه =يوم البخيل مدنهر الوجه هابي
وعده عن اللي مايداري المسبه =اللي يدوربالقصي الغيابي
لا جاضع المتروع خطو الجلبه =يا حلو تالي الليل خبط الركابي
اقحص لهم وابدي سلام المحبه =لا شح بالهين كبير العلابي

الى أن قال:

من لا صبر يا كليب في حكم ربه =هذاك يوم البعث ماله ثوابي

* وقول الشاعر: سعد بن حمد بن ضويان في القهوة:

ياحسين لاكني على الجمر مجضوع =من فقد خلاني وفقدي ربوعي
قم سو فنجالٍ ترى الراس مصدوع =صفه وزله عن سريب الخموعي
فنجال فيه مخموس الكيف مجموع =بدلال يشدن الخباس الوقوعي
ونجر دلاله ماو بالصوت مفجوع =يا زين حسه والخلايق هجوعي
وانجاك بالمجلس سنافي وبالوع =عده على الطيب وكب البلوعي

* وهذا الشاعر: عبدالله العلي الحرير يرحمه الله:

قم سو فنجال ونظف أدلاله =ريحه لراعي الكيف يجلي اعماسه
اشعل ولونه مثل دم الغزاله =لاذاقه الراقد يحارب انعاسه
في مجلس تدله الى جاء مجاله =اللي عن اللجات يقصر حساسه
والا ترا بعض المجالس عذاله =لا معشر طيب ولا فيه اناسه

* والشاعر: غازي بن عون

يا ريف قلبي للمسايير قم شب =وحط المنارة في طويل الظلالي
عقب تشق لها لجزل الحطب جب =وهات النجر واحضر جداد الدلالي
دنّه وخلّه للمسايير يجذب =لا قام صوته للنشامى يلالي
يوحونه الجيران لا قام يقنب =ويجيك الاقصى والقصير الموالي

* ويقول سليمان المحمد الهزاع بهذه القصيدة:

لافي على جمر الغضى سو فنجال =فنجال بن من رخيص وغالي
حيثك قديم مغربل البن غربال =حكيم عند مصاطرات الدلالي
خله على المطلوب يلفت لنا البال =يفتح لنا المعنى بمبدا المقالي
الى انطلق من ثعلب المبهرة مال =يشدي خضاب مخفرات حيالي

* يقول محمد العبدالله القاضي عن القهوة والاواني التي تجهز بها القهوة:

دنيت لي من غالي البن مالاق =بالكف صافيها عن العذق منسوق
احمس ثلاث يا نديمي على ساق =ريحه على جمر الغضى يفضح السوق
واياك والنيه وبالك والاحراق =واصحا تصير بحمسة البن مطفوق
دقه بنجر يسمعه كل مشتاق =راع الهوى يطرب الى دق بخفوق
لقم بدله مولع كنها ساق =مصبوبة مربوبة تقل غرنوق
خله تفوح وراعي الكيف يشتاق =الى طفح له جوهر صح له ذوق

إلى أن قال:

زله على وضحا بها خمسة ارناق =هيل ومسمار بالاسباب مسحوق
مع زعفران والشمطري إلى انساق =والعنبر الغالي على الطاق مطبوق
إلى اجتمع هذا وهذا بتيفاق =صبه كفيت العوق عن كل مخلوق

* وهذا راكان بن حثلين في قصيدة مشهورة:

ياما حلا الفنجال مع سيحة البال =في مجلس ما فيه نفس ثقيله
هذا ولد وهذا ولد خال =وهذا رفيق ما لقينا مثيله

* والشاعر هايس بن مجلاد يقول وهو يصف الدلة وصوت النجر:

قم سو ما يصبغ على الصين ياذياب =بدلال يشدن البطاط المحاديب
احمس الى من العرق فوقها ذاب =واستدن ما يجذب عليك الشراريب
نجر يصيح من الطرب تقل بحجاب =يصبر على طول الدهر للمواجيب

يتبـــــــــــع

وقال حمد ابراهيم العمار:

الى ضاق صدري قمت لم الدلالي =شبيت ناره يوم عني الكرى غاب
الى اصرهت بالجمر عقب اشتعالي =زليت صافيها على كيف شراب
وقلبت حمستها على شف بالي =حوش الغنم لين العرق فوقها ذاب
ودقيتها من ضيقتي باعتجالي =نجره يصيح لراعي الكيف جذاب

* ويقول الشاعر سعد بن قطنان من سبيع في وصف القهوة:

جر الفراش لنا وهات الدلالي =اربع مغاتير على النار تدنا
ترى حلاة النار دوم اشتعالي =وسوقة فناجيل عليهم من ادنا
فنجال اشقر مثل دم الغزالي =اليانقص شيء من الكيف زدنا
اتعب لها بالسوم لو كان غالي =لو كان سوقه نازح عن بلدنا
ياما دفعنابالثمن من ريالي =غير القرى نسهر لهم ما رقدنا

* وهذا الشاعر: عبدالله بن سبيل الباهلي:

ترى حلاة الكيف يا مشرب له =لا فارقوك اهل الحسد والنجاسه
لا صار شغاله ظريف بزله =وظرف بتقليبه وقيمة قياسه
الى صفا بنه على ما شغله =تلقا على الفنجال ردعة لعاسه
خطو الولد توه على شبة له =جميع هو مات المراجل براسه
يقوم بالمعروف دقة وجله =والله مهيئ له على قوباسه
وخطو الولد رجم على غيرحله =لو جازلك مبناه برّق بساسه

* قصيدة للشاعر: شليل بن عواض من بني عمرو من قبيلة حرب يقول:

يا سعود قم هات الدلال المهانيف =في ليلة ناخذ سهرها قطوعه
إحمس وكيفها ترى طاب لي كيف =واستدن (مزعل) ياشفاتي وصوعه
إلى تهيض بالعوى والزعانيف =يشدي عوا ذيب شكا حر جوعه
يشدي عواذيبٍ بروس المشاريف =حادية حادي والهبايب تلوعه
حتى يجيب مسيّر البيت والضيف =مثل العقيد اللي تلافت جموعه
مخصصٍ الى صار جماعه مواليف =ماركز الشيطان معهم بكوعه
يا زين سجتهم وزين السواليف =ما دوّروا واحد بالاخر طموعه
والى احدث الجهال بعض التخاليف =إستدركوها قبل تكثر فزوعه
تلقى لهم سمعة وهيبه وتصريف =وكلٍ يجي فعله على قد نوعه

* ونختتم مع هذه الابيات:

الكيف خله عند من يشترونه =المشكلة اللي جابها من بلدها
ياحامسين الكيف لا تحرقونه =حذراء عن الشعله تغير نقدها
حتى يجيك محمر كن لونه =مجت جراده ظاهرة من جسدها
صبه على اللي ربعته يدهلونه =له ربعة من راح منها حمدها
وعده عن اللي واقف له بشوته =يمسي ويصبح عارف لك عددها
ما غير عنده طايرات عيونه =لا باع شاته جاك حزة وعدها

منقول مع بعض التعديلات

..

صح لسانهم كلهم..

وتسلم دياتك شروق..


الله يعطيك العافيه يارب..


..

سلمت يداااك شروووق


انتقاء ولا اروع


وتستاهل القهوة ....كيف النشاما


ماهو جيل اليوووم


جيل (الموكا )


<<<< يسمع بها


سجلي اعجابي وتقبلي تحيااااتي

.................

...

ابيات من اجمل ماقيل في القهوة العربيه
رمز الكرم والأصالة


اختيار موفق


ذوق رفيع عهدناه من شروق



سلمت يداك


كلك ذوق


...

يقــــوم بالمعـروف دقـة وجــلـه
والله مهيئ لـه علـى قـوّ باسـه

وخطو الولد رجـم ٍ على غيرحـله
لو جــاز لك مبناه بـرّق بساسـه


قصائد منـتخبة بعناية أتت على شكل مقاطع تحكي

كرم العرب في القهوة وأوصافها وطريقة تحضيرها

الإخت شروووق تسلم اناملك

حقيقة عمل يستحق الإشادة والتقدير ..

ويعطيك العافية ياعزيزتي ..

	المشاركة الأصلية كتبت بواسطة دمع الغزال

	.. صح لسانهم كلهم.. وتسلم دياتك شروق.. الله يعطيك العافيه يارب.. ..

صح بدنك لحالك بالنيايه

الله يسلمك ويعافيك

	المشاركة الأصلية كتبت بواسطة حسن المحمدي

	ماهو جيل اليوووم جيل (الموكا ) <<<< يسمع بها

طيب عيني في عينك
ولا حتى كابتشينو؟؟



الله يسلمك
شاكره لك حضورك ياسيدي

	المشاركة الأصلية كتبت بواسطة wafei

	................. ... ابيات من اجمل ماقيل في القهوة العربيه رمز الكرم والأصالة اختيار موفق ذوق رفيع عهدناه من شروق سلمت يداك كلك ذوق ...

من امثالكم نستمد الذوق ياسيدي
الله يسلمك
شاكره لك حضورك

	المشاركة الأصلية كتبت بواسطة أبو خـ البجادي ـالد

	يقــــوم بالمعـروف دقـة وجــلـه والله مهيئ لـه علـى قـوّ باسـه وخطو الولد رجـم ٍ على غيرحـله لو جــاز لك مبناه بـرّق بساسـه قصائد منـتخبة بعناية أتت على شكل مقاطع تحكي كرم العرب في القهوة وأوصافها وطريقة تحضيرها الإخت شروووق تسلم اناملك حقيقة عمل يستحق الإشادة والتقدير .. ويعطيك العافية ياعزيزتي ..

ابو خالد
شكلك كيييييييييييف قهوه


الله يعافيك
مرور مشرف من استاذ قدير
لاعدمنا تواجدك