أبوسارة وكتاب تحفة العروس

اللي يبي يضحك بس يقرا قصة المجنون ابو سارة من طق طق الى السلام عليكم

اترككم مع ابو سارة الهلالي وقصته



مـــــدخـــل :-

في بلاد اليمن السعيد حيث الحلبة الجميلة والقات الرائع ,, في ديار العم علي عبدالله صالح ,, تهور الأخ علي صالح ورفع سعر البنزين ‍‍..

ما أمداه يعلن هالقرار إلا و 80 يمني مجتمعين عند قصره ، كل واحد معه عجراء أطول منه واللي جايب معه مشعاب واللي متفلت ومطلع الخنجر ناوي يقلبها خبيتي فوق راس عبدالله صالح ‍ وعياله .

داهمتهم قوات مكافحة الشغب والاستخبارات اليمنيه وتلاعنت هي وياهم ,, تلاقط الطرفين وتدابغوا وكل واحد لعن أم أم مرسول الثاني ,

انتهت المواجهة للأسف بوفاة ثلاثة من المتظاهرين وجرح 30 واحد ..

تدرون وش الطريف في الموضوع ؟ الطريف ان هالثمانين نفر اللي محتجين على رفع سعر البنزين ما فيهم الا خمسة أشخاص يملكون سيارات ‍‍..

سلموني عليهم يا شيخ شوفوا الناس اللي تعشق شيء اسمه حرش ومحارش , 75 واحد ما عنده سيارة ولا يهمه القرار ومع ذلك جاءوا يوقفون في وجه أطلق شنب في الدولة وتلاعنوا هم وياها ..

يمكن ينط لي واحد منكم ويسأل سائل ويقول وش دخل موضوعك يابوسارة الأطخم في هالسالفة .؟ اوكي راح أقوله :

انت ملقوف أولاَ ,, وحشري ودمك ثقيل على هالسؤال قسم بالله ,, وثانياَ : راح أبين لكم في نهاية الموضوع وش الرابط بين هالمدخل وبين موضوعي ,,

والآن ندرعم على الموضوع طواالي ثاني لفة يمين قبل تقاطع شارع الدوحه مع صيدلية السقاف ,

--------------------

الفصل الأول :-

شوفوا ما راح أهذر عليكم خذوا الموضوع من نسخته الأولى دون أي تعديل أكتبه لكم وانا مستعجل ,, لأن المثل يقول :

لا تكثر بربرة ترى يمّلونك , قلت وان ملوا مني ؟ قال: يحوسونك ., قلت وإذا حاسوني؟ قال أقول كمل موضوعك لألعن جدك والله انك ماتنعطى وجه !!

ذاك الأربعاء كنت طفشااان ,, من جد من جد طفشاااان ,, طفشاان وبقوة أقسم بالله يا عرب كنت طفشان (( يا شين كل تراب درينا ))

يمكن يرجع الملقوف اللي فوق ويسألني ليه كنت طفشان . أوكي راح اقول لكم :

خويي الروح بالروح "أ بو فهيد " رايح مكة عشان ياخذ عمرة الله يجزاه خير ,, مع العلم أنه كان في الاربعاء اللي قبله متكي في البحرين ,,

وخويي الثاني أبو " خدرة " محتاس هو ويا اهله وبالمستشفى عند أمهم ,, الله لا يهينها أمهم شافت ماحولها أحد وهي اللي تدق في تمر السكري لين صفق السكر عندها 500 درجة فهرنهايت وطاحت عليهم ,,

إربعاء وإجازة واخوياك واحد في مكة والثاني مع أمه وش هالحظ المقرود وش السواة يا بوسارة يالأطخم يازينة الشباب ؟

جلست في البيت معصب ونفسيتي قالبة وطالع وجهي كأنه وجه تيس شاف فاتورة جواله خمسة آلاف, أبد ماغير أنزل وأرقى ومن غرفة لغرفة وطفشان وكل شوي أجلد لي بزر من بزارين أخواني وأنواع الملل ,,

دخلت غرفة أبوي قعدت أبترم وأتفرج أدور شيء أكسره أو بزر أقوله وش مدخلك غرفة جدك ثم ألعن أصل أصله بس خسارة مالقيت أحد , وقفت عند مكتبة الوالد وهي عبارة عن مكتبة كبيره مليئة بالكتب (( أكيد مليئة كتب أجل مليئة عسكريم ! )) , لقيت كتاب مدحدح دبدوب على الرف باين أن ابوي قاعد يقرأ فيه لأنه مو مصفوف مع الكتب ,,

قلت يا بوسارة يا وجه العنز ما عمرك قريت في حياتك الا جريدة الجزيرة تدخل على الصفحات الرياضيه ثم كاركتير الهليل وبس ,, جرب اقر واحد من هالكتب تقرقرت مصرانك ,, وانا اللي آخذ هالكتاب الدبدوب وااناظر وش اسمه واتفاجاأ ان اسمه /

تحفة العروس

عرس , عروس , معرسة , أي وحده من هالمصطلحات دورني عندها تلقاني ,, قلت هلا والله واطمر لغرفتي ومعي الكتاب ,,


-----------------


الفصل الثاني :-


فتحت الكتاب وقعدت أقرأ ,, أم الكتاب الخاثر يا شيخ ,, يا إني رحت غلطة يوم قريت هالكتاب ,, نصفه عن آداب الزواج والنصف الثاني عن ليلة الدخلة ونصايح وبلاوي تخلي الراس يشيب ,,

أخبر أني كنت أقرأ المقدمة حقت الكتاب وشوي الا وانا واصل الفهرس وخاتم الكتاب ,, يا إني والله مسكت خط معه وخشيت جو ,,

خذوا مثال :

في الصفحة السابعة والسبعين بعد الألف يقول المؤلف الله يجزاه خير : " ... على الرجل أن يكون رقيقاً في تعامله مع زوجته فلا يندفع نحوها بقوة وقسوة ,, بل يبادرها بلطف ويقبلها بكل حنان ومودة و (( ... طوط طوط كلام مشفر ... )) ثم إذا أحس أن زوجته بدأت تتقبل عواطفه ومالت إليه وقتها يجب عليه أن ((... كلام مشفر ألعن من اللي قبل .... )) ... "

في الصفحة الثمانون بعد المئة قرأت من زود قرادتي : " .. تفاعل المرأة مع زوجها في ( .... ... ) يجعله يحبها أكثر وأكثر , فعليها أن تبادله الـ ( ... مقطع داشر ... ) و أن ( ... طوط طوط استغفر الله بس !! ) وتبادله الآهات و( ___ ) ثم إذا وصلوا إلى(( ذاك وذاك )) فعليه أن لايقوم من عندها إلا وهي ( .... من جد كلام واطي!! .. )) .. "!!

كله كوم والصفحات الأخيرة كوم ثاني , يقول المؤلف حسبي الله عليه ياهو أجرم فيني :

"... عليه احتضان زوجته والرفق بها والهمس في أذنها برفق ولا مانع من ( ...... .... ) وعليها ان تتدلل له وتتغنج أمامه وتلبس له ما يجعله ( ........ آلله ابوك كتاب ... ) ثم قام المؤلف يشرح الغسل وكيفيته عقب ما خلص شارح الأشياء اللي قبل الغسل (( والله يا هو غسل مخي بعد ))


طبعاَ فيه فصل كامل في الكتاب خاص بطريقة ( الـ ... ) ودي أحدثكم عنه بس اخاف يطير يوزري .,


وفيه خمس صفحات في الكتاب لو قلتها لكم يمكن بعدها ماتدخلون موضوعي هذا الا ببروكسي لأنه بيصير محجوب ولايمكن الوصول له !


صكيت الكتاب ,, قعدت أدور في غرفتي وانا مندهش منلحس منفرش منبرش وأقول : يا حظ اللي عنده حرمه أخ بس يا حظ اللي عنده حرمه والله لو عندي حرمه الحين إن كان , إن كان .. إن كان لعبنا أونو !! ,, تصدقون حسيت بأشياء غريبه وانا أقرأ الكتاب :-

أحسست وانا قاعد اقرأ بمغص في بطني ,, قلت الله يستر يابو ساره لايكون هذا اللي يسمونه الطلق اللي يجي قبل الولاده , , والله اللي نكبت عفش اهلي لو صرت أم وأنا مابعد أعرست (( قام يهلوس !! ))

أحسست برغبة جامحه في الزواج خلاص أبي أعرس يعني أبي أعرس وأطبق الكتاب حرفياَ ,, انهبلت قعدت أناظر الدولاب حق غرفتي نظرات غير بريئة ,, الله ياخذك يا ابو فهيد ليتك ما رحت مكة كان الحين جالسين في الشوارع ندور ولا قريت هالكتاب البثر .


والله يا إخواتي الجميلات ويااخواني الملاعين أدري أنه كتاب ديني وأدري أنه مفيد للي مقلبين على زواج , لكن أنا عمري 23 سنة ولاعندي ولا فلس ولا حولي عرس وش أسوي ؟ أشق هدومي أو أشق هدومي ولاّ أشق هدومي (( انثبر تراك جبت العيد ))

طق ,, طق ,, سمعت الباب يطق :

فتحت الباب ودخلت علي الغرفة شغالتنا العبدة الكويحة السرلانكية رااني ,, معها كاس شاهي لي ,, حطته جنبي وديورت تبي تطلع ,

مدري وش سويت وتهورت!! وصرخت راني علي وسطرتني كف ‍( العن بليس والله تهزأت يا قدعان ) قالت : واللهي ابوسارا إنتاا هوماار كبير وطلعت زعلانه ( الله يلعنتس يا باسكال اقلبي وجهتس بس ! )


على طول قمت ورجعت الكتاب لغرفة الوالد وقعدت أسبوع كامل أهوجس في العرس ونفسيتي صارت زفت ودمار صدقي !

-----------------------------

الفصل الثالث :-


بعد إسبوع من قرائتي للكتاب المطرطع,, دخلت غرفة ابوي عشان أسرق الكتاب واقراه ثانيه ( اعنبوا بليسك لوه قرآن ما حرصت عليه هالحرص ! ) , لقيت أبوي منسدح الله لايهينه وماسك له كتاب ويقرأ بتركيز شديد وماهوب يمي ,,

قعدت ادور كتاب تحفة العروس مالقيته في المكتبه ,, قمت بإلتفاته سريعه نحو أبي وإذا بي أتفاجأ أن الكتاب الزاحف مع ابوي ,,

ناظرت أبوي بنظرات مثل هذا الوجه الخاالع >> ( ) !!

قال خير يا الهيس الأربد وش تبي .؟ قلت وانا ابتسم بخبث : أبي الكتاب اللي معك ,,

قال: وش كتابه وانا ابوك هذا علاج لو تشربه نعلم عليك الدكتور ثم يدقك ابرة (( والله يا هالأبو عليه تصريفات ! )) ,, قلت وانا ابتسم بخبث ماكر :

دكتور مين وعلاج مين ,, هذا كتاب يا حلو مو علاج وش شايفني بزر قدامك تصرفني !

تلخبط الوالد وحس أنه جاب العيد قال وهو يزين طاقيته : ههه ايييه الله يقطع سوالفك ياولدي هذا كتاب فتح القدير لتفسير القرآن العظيم ما يصلح لك قم وانا ابوك خلني أقرأ واغنم الأجر .

فقعت امها ضحك وقلت بكل ميانة : فتح القدير أجل هههه ترى بأفتح جبهتك هاته بس وخل عنك الخرط ( ذب الميانه الثور ! )

ما أمداني أخلص جملتي الا والكتاب جايني يمشي مليون ويخبطني مع خشتي وانا اللي أطيح فاقد الوعي

قمت وصوبت نظراتي نحو والدي ! أخذ يناظر فيني مستغرب وامتدت النظرات لدقيقة كامله ,,

فجأة :-

اغرورقت عيني بالدمع ,, براطمي أخذت تتعرفط ,, وقمت أهز برأسي يمينا ويسارا وتدحرجت دمعتي على خدي وانا أنظر لأبي ,, أحسست أن والدي بدأ يرحمني فـ همست قائلا له :

أبتاه لا تحاول خداعي لقد قرأت الكتاب يا أبي وانا الآن أعيش قمة العذاب .. وبكيت بحرقة ،، تأثر أبوي واقترب مني وقال :

قريته يا ولدي ؟ رميت نفسي على كتفه في مشهد مصري وحظنته وأخذت أمسح خشمي ودموعي بشماغه وأخذت أشاهق وأبكي بصوت عالي وأردد :

يبه ايه قريته وانا مامعي ولا قرش والى الان وانا طالب وأبي اعرس تكفى دبرني . وقعدت أنحط وأصيح .

قال: يا ولدي من اللي يبيك وانت الله يصلحك سمعتك في الحضيض وطفران ولا عندك بيت وانا يابوك متعلق في سوق الاسهم ,

قلت: تكفى ترى بأموت ان ما أعرست ، كله من كتابك وذمتي في رقبتك انت والمؤلف ,,

وطلعت من عنده ورحت غرفتي وقعدت أصيح لحالي ( بذمتكم مارحمتوني )

-----------------

الفصل الأخير:-


من بكرة اجتمع أبوي مع أخواني الكبار وقاموا يدرسون مشكلتي ويدورون لها حلول وأخيراَ لقوا لي حل ,,

قرروا أنهم يزوجوني راني السرلانكيه ,, منها أعرس وأفكهم من صجتي ومنها أصلح غلطتي معها يوم أخطيت عليها ,,

قالوا لي هاه موافق ؟ راني السرنلاكيه تبيها ؟ قلت : الله يبارك فيكم وعقبالكم ايه موافق وين كروكي الاستراحة حقت العرس؟ قالوا يا الثور ماهنا استراحة. العرس سكاتي الله يفضحك .. موافق على الشغاله؟ قلت : تم , تم . تم . دم دم الساعه كم ؟ (( من زود الوناسه قام ينكت ))


عاد حددنا العرس الاسبوع الجاي والعرس ( سكاتي ) مافيه طقطقه ولا معازيم كثار ,, ولا عندي اغلى منكم يا أهل هذا المنتدى الرائع أبيكم تشرفوني في عرسي ترى ما فيه أجناب ,, ماغير أخو راني اللي يشتغل سباك في المربع وخالها راعي الدشوش اللي في سلطانه (( حمولتن طيبة ))

الله يحييكم والغايب يعلم الحاضر !

---------------


ما يستفاد من موضوعي الفاشل :-

1- إذا كنت عزوبي فـ انحش عن هالكتاب , وإذا كنت متزوج فداوم عليه وطبق كلامه حرفياَ صدقني راح تدعي لي انت والمدام .

2- إذا كنت عزوبي وقرأت هالكتاب فـ من حقك أن ترفع قضيه على المؤلف الله يرحمه وإن شاء الله راح تكسبها خابرن لك محامي مصري صلعته أكبر من راسه فتيت قضايا !

3- إذا رأيت نيوب الليث باسمة ,, فلا تحسبن الليث يبتسمُ ! -----> ممكن تنقطنا بسكاتك ؟ !

4- رجاءا لا أحد يغلط على السرلانكيين تراهم منا وفينا

5- قسم بالله إني مستعجل وآسف إن كان خنبقت عليكم ,

6- قال وش حدك على المر يا شريم قال ما من برطم والقناعة كنز لا يفنى .!


------------

نقطة استدراك :-

ارجعوا للمدخل اللي فوق حق أبو يمن , فيه واحد سألني قال وش علاقته بالموضوع وقلت له في نهاية الموضوع راح أعلمك ,.

تبون الصدق؟ قسم بالله عجزت ألقى رابط يجمعهم حاولت أنصب عليكم وأجيب رابط من راسي بس ماااش من جد ما له سنع


---------------

قفلة :-

راني , حبيبتي ,, إني قادمُ ُ إليكِ يا فتاتي لنرقص على سطح القمر ونغني ونقول :

بالروح بالدم نفديكي ياسرلانكا

التاج



يمين الله انك لحست مخي هذا إن كان فيه اصلآ مخ مافيه إلا مدري وش؟؟؟





دخلتنا في حاره وطلعتنا في مستودع الله يرحم من عقبك ياشيخ


وش هالكلام الحين لي يومين اقراها ومفهمت شي



يخرب بيتك


ولا اقول


يخرب خيمتكم



تحياتي

هههههههههههههههههههههههههههههههههههه

موضوع رايح فيها ليييييييييييييييييييييييين الياء

وجاااااي منها علشان ياخذ الهمزة اللي طاحة من حرف الألف

فعلا كلام انقال بطريقة فكاهيه رائعة .. وتطرق إلى مضمون ذلك الكتاب المدحدر (والفرامل خربان)

وجاب العيد بنصف السنه ــــ

الكتاب صحيح رائع .. لكن توقيت قراءته قد يكون خطأ

أعتقد ان هذا الكتاب يجب رفعه عن العزاب الزاحفين هههههههههههه حتى قبيل زواجهم بفترة وجيزة ليتفقهوا بما ورد بمحتواه

وطبعا الشرهه على الاب اللي حاطه قدام ابنه .. وهو يدري انه غشيم ومطرطع
هههههههههههههههههههههههههههههههههههههههه

لأن الكتاب فعلا يوجد فيه فقرات ووصف مثيرة للغرائز لاينبغي لمن هب ودب* أن يقرأها

*هب ودب = العزوبيه (بنين وبناتيت)