هنا الحراج ------------>

أحبابي الأخوة والأخوات في هذا المنتدى :
سلام عليكم ........
تصدقون اني مقصر معكم .. وما دخلت هذا المنتدى الا هذا اليوم
لا تلوموني ارجوكم أنا صرت اكره السيارات لإني محمل بالأقساط
لتويوتا - ومازدا - ونيسان .......
وكنت خايف لا يكون هنا من الأعضاء بعض وكلائهم يكفشوني ...
المهم ما أكثر عليكم حكي :
انا اقترح أن نضع في صفحتي هذي حراج للسيارات اللي عنده
سيارة يبغى يبيعها يجيبها هنا في المزاد .. وأن شيخ الدلالين ...
ابغى سفاري - وسميرووه يكون على المايكروفون لأن عندهم
حناجر ماشاء الله تبارك الله ..
------------------------------------------------------------------------------

لا إله الا الله
بسم الله
يا شريطيه يا حرامية يا مدورة فضل الله
الحقوا الطيب هنا
ونيت غمارتين
موديله يا راعيه ؟ 2000
الفين الموديل الفين المودييييييييييييييل الفين
مجدد ومفحوص
يمشي ولا يحوص
عليه اربع كفرات ضد البنشر
معباه خرصان واسمنت
وينكم يا اهل الخطوط وينكم يا شريطيه يا حراميه
من يفتح الباب
خمسة الآف ريال
وخمسة آلاف ريال فتح الباب .. وخمسة وخمسة وخمسة
وسته وسته وسته
وثمانيه وثمانيه وثمانيه وثمانيه وثمانيه وخمسمية وخمسمية
وتسعه وتسعه وتسعه خلك برا وتسعه وعشرة وعشرة ما شاء اللن
وعشرة أنت لا أنت لا .. هنا وعشرة وعشرة
واحدى عش واحدى عش أحدعشر الف ريال يا راعيه يا وكيله
ابارك اسجل يا راعيه يا راعيه ..
لا تكفخها لا تردها اول سومه من ذهب يا رجال طع شوري
هاه من يزيد على الدلال بأحدعشر الف وخمسمائة
هاه يا راعيه بعت اقول بيع اقول بيع خيرة الله لا تردها
الله يبارك له الله يبارك له سجل يا كاتب سجل ياكاتب

___________________________________________
يالله تقبلوها عربون صداقه
تخاريف مزعجه
كل واحد يتذكر الحراج

حبيبي المحارب

في المنتدى هنا ما عندك احد رز الموضوع في الاستراحه وابشر في الردود وبما انك من طويلين الاشناب

( يعني اللي من زمان وهم في المنتدى) اتحدى اي واحد ينقل الموضوع لمنتدى السيارات




تحياتي سفاري

ههههههههههه

والله انا آسفه لاني دخلت مكان ماقد دخلته في حياتي
لكن لحظة ماقريت موضوعك قررت ارد عليك في الحراج
اللي عمري ما طبيته لكن شفت عجب اثاريكم ياالرجال
تشوفون العجب لكن احمده واشكره ان الله فرض على المرأه
بان تقر في بيتها ولا تخرج للحراج وانا اسمعهم يقولون الحراج
احسبهم في سوق عادي اثاري فيه مكرفون وصياح يالله لطفك

المهم والله موتني من الضحك اخي الكريم
وارجو المعذره لاني دخلت مكان ما يستوجب ان ادخله

اكرر اسفي
علىالفضول

زنوبيا

الله يسعد مساءكم
أخوي نمر
وملجلج
وأردينا
وكل أعضاء وضيوف الساحة
والله ما حبيت اغثكم
لكن الحبيب سفاري طلب مني أنقل الحراج هذا عندكم
وتراه شامل للسيارات والأواني المنزلية وكل شيء
يعني اللي عنده خرده يحرج عليها هنا
وسلامتكم
سامحوني على غثاي
كان في منتدى السيارات لقيت السوق نايم
وأنا بيني وبينكم ابغى زباين صادقين

شكرا لك
حبيب قلبي سفاري
والمايكرفون معك الله لا يهينك
حرج وشوف الله يربحنا ويربحك

الغالية زنوبيا
خلاص أبعدناكم عن غثيث المعارض
وجينا هنا في البرحه ( أقصد الساحة )
عادي لا يردك الا فلوسك ادخلي واشتري من الحراج
اللي تبغين
فيه جميع انواع السيارات والبركة في المحرج سفاري
تحياتي أختي الكريمة

هلا المحارب
انت شريطي اكيد وجاي هنا تترزق الله
طيب يا خوي ما فيه ددسن 82
نظيفة ما تحوص حسب خبرتك
________
الحين ليش يدخلون البنات
يبون يشترون سيارات
ولا يتفرجون

حياك يالبدر
عندي وأنا خوك دتسن غمارتين 82 نظيفه
كانت مخزنة عند واحد من الربع
ما يشيل فيها الا غنم
ومخزنها تراها لقطه لا تفوتك
حادها الله يطول عمرك بثماية آلاف
تبغى شيارتي لا تفوتك
..........
البنات الله يطول عمرك
ما يبيعون ولا يشترون
لكن يتفرجون منابحة المكرفونات هنا في الحراج
ويقولون الحمد لله رب العالمين مثلما قالت زنوبيا
هيا هيا في أمان الله
شف سيارة جات من هناك
يا راعيه
ادخل هنا
ادخل يا رجال مالك الا قيمة طيبه
وقف في ذا وقف وقف
وخر عنه

ايه يالمحارب اعترف عندك سيارات مخزنه
وتقول عند واحد من الربع
ددسن غمارتين ... اف والله الكشخة
اهم شيء اللون كستنائي
على شان اقهر الشياب في سوق الغنم
لأنهم مدمنين دداسن ومستحيل يغيرها سيارة العمر
وفلوسه متلتله وما استفاد منها الا البنوك



يقول لك فيه ثلاثة بخلاء اتفقو يسبحون ويغطسون تحت الماء واللي يطلع الاول يجيب لهم عشاء.. ولا واحد فيهم طلع...

تحياتي

مع احترامي للجميع هذا الموضوع شكلا وموضوعا يروح منتدى

السيارات والشريطية هناك تلقونهم ارجو تفهم هذا الوضع

واتباع التنسيق في المواضيع حسب المنتدى الخاص بها

واذا حبيتوا احطها لكم في الشعر ماعندي مانع بس شوفولها صرفة

قبل ما اشوف انا


للكل تحياتي