كلمات عوام مع ترجمة معانيها؟؟؟؟؟

هلا والله وسهلا فيكم حبيت سلمكم الله اعطيكم كلمات عوام مع معانيها للي مايفهمونها، واللي عنده زود لايبخل علينا
الارض كلها طهات : يعني مبتله ماء مع طين
الشعيب عاض : يعني مليان ماء
افهقه عن وجهي : يعني ابعده عن وجهي
امشق الارض : يعني احرثهابالحراثه
إلفقه : يعني اسكت ابرك لك
ابنجضع شوي : يعني ابنسدح شوي
اباخذ غفوه : يعني نومة ذيب
انهج : يعني بسرعة
ابتمقله : يعني ابشوفه زين
هقوتي انه بذا : يعني اتوقع انه هنا
ابتمشرق : يعني ابجلس بالشمس الصبح
تراك معزوم القابله : يعني تراك معزوم بكرى
إلبخه : يعني عطه صفقه مع وجهه
لطسته : يعني سكرت العيب اللي فيه
إرثمه : يعني رد عليه رد قوي
حلتيته : دواء شعبي مفيد
ابتفنجل :يعني ابغى اشرب قهوه
انطح فالك : يعني كل او اشرب من اللي قدامك
عرجد : قنى النخله بعد ماييبس
برتسه : مسبح
خو أثل : مجموعة كبيرة من الأثل
محدره : الزبيل اللي يوضع فيه التمر
الجصة : مكان يوضع فيه التمر في الزمن القديم
الصميل : الوعاء اللي يخضون فيه اللبن بالزمن الماضي
الليوان : مانسميها اليوم الدكه
لصب : شعيب ضيق بالحيل بالحيل
انطحن : قابلن
نخيتك : استفزعت بك
هرجه قد النجمه : يعني كلامه كذب في كذب
درب البرميل وإلحقه : يعني اضحك عليه ولايهمك تراه مادري عنك
الثوب مابه احد : يعني اللي قدامك مهب رجل
قمط : يعني خاف
إلهدن : يعني غثني واشغلني
حجرّت عليه : ضايقته بالكلام
إرشخن : عطني بوسه
نبي نتجربع : نبي نصيد جرابيع
يزمر علي : يرفع صوته علي
وشضه : انحته
ختاريش : يعني شيبان كبارين
المطاريش : الضيوف اللي جو (طارشين يمنا)
خمخمه : اللي يحطنه الحريم في أذانهن
فتخه : خاتم اصبع اليد
كنديشا : مكيف صحراوي
القز : الفرن حق الطبخ
جلال صلاة : اللفاف اللي تصلي فيه المرأة
مقطع صلاة : نفس التعريف
صجه : يعني ازعاج
صتيمه : يعني كمخه مايفهم
المحّالة : بكرة السواني
جلف : الجافي الغليظ لاتحسبونن اعني نفسي
جفس : مايعرف يمزح
جفلت الغنم : اذا شافت ذيب يعني خافت
المثعب : هو مايُطلع ماء المطر من السطح
البهم : أولاد الغنم
أبرمه : اي افتل الحبل
برك : يقال للجمل اذا جلس على الارض
لاتبربس بالماء : لاتخرب الماء وتدمره
فلان أبخص منك : يعني أفهم منك
هاالنخله عيدانه : يعني هاالنخلة طويلة بالحيل
ماء فاتر : يعني مهب حار ولا بارد
كيت وكيت : يعني كذا وكذا (لمن يروي سالفة)
إلبد : يعني اجلس بمكانك
لزّ : يعني قربوا بعضكم لبعض
إلسبه : يعني اضربه بالعصى
مرق : لها معنيين يعني مرقة الطماطم أو اذا مر الواحد من عندك بسرعه يطلق عليه مرق
ممشق : يعني وجهه فيه مشق يعني حساسية
نبط : يعني ظهر فجأة أو نبط بالنباطه حقت البزارين
فلان يجخ أو يزبعها : يعني وين هو عند روحه
نقوه : يعني اختيار موفق
انكس : يعني ارجع
هلقماني : يُقال لصاحب الكلام الكثير
هيّن : يعني بسيط
الوتد : العود يرز بالجدار يسمونه وتد
الوثارة : اللي يحطونها فوق ظهر الحمار وانتم كرامه
وذف : يعني خفيف دم
الحقيقة هذا اللي يحضر في مخي واللي عنده زياده تكفون لايبخل علينا ، وماقصرتوا

الحقيقه اخوي انك ماقصرت والف شكر على معجم مااستعجم اللي سويته .. الا متى بتطبعه .. عشان اشري نسخه منه .. تدري شلون انا راح انشد جدتي عن المصطلحات القديمه اللي كانوا يحكون فيها .. تصدق عاد انه حكي جدتي الان تطور ماتصدق :D

:D:D:D

تسلم اخوي هيكل .. فعلاً معجم جميل وقيم :D


يعطيك العافيه ..


مظلــــــــــــــــــوم

ابشري يا اردينا إن شاء الله بأطبع الكتاب بأقرب وقت ممكن




إن شاء الله يعجبك

الله يعافيك