رسالة تبكي وخبر يفرّح ...

رسالة بدأت بالأمنيات


ودي وودي



ودي أرجع لأهلي ودي بأمي .. ودي أحضنها بقووووة .. ودي بزوجي أحب على راسه .. ياما وقف معي .. وياما هلّ بسببي مدمعه .. من ست سنين وأنا ما أعرف إلا الموت .. والخوف هو الوحيد اللي أعرفه .. ست سنين وانا ما أعرف إلا ثلاث حروف .. ميم وواو وتاء .. موت !! كلها حتوف وخوف وأحزان جارفة .. صدر الحكم .. وصدقته المحكمة !! مابقى على الموت شيء .. يمكن اليوم .. أو بكرة ! بس الأكيد إني مت قبل بكرة .. كل يوم أموت في يومي .. وكل يوم أموت البارحة !! لله حكمة بالغة .. يمكن أكون عبرة لكل بنت صغيرة ! تعيش لحظات سكرة ولهفة .. مع شاب يغازلها وهي تبادله .. وتصغي لكلام الحب والعشق وتصدقه .. ثم تمر الأيام وتتزوج .. ويوم تبغى تعيش .. تدري إن الماضي شبح يظهر لها كل لحظة في عمرها !!! وفي لحظة خفت فيها على نفسي .. وخفت على بيتي وزوجي اللي حبيته .. وروحي وروحه متآلفة !! بعد ما هددني .. أنه بيفضح سري الطاهر !! ويفقدني حياتي الحالمة .. ومادريت ان الانسان .. لو نسى هو الماضي .. الماضي هو اللي ماينساه .. وبيظل طول عمره يلاحقه !! وفي لحظة استسلمت فيها للشيطان .. قررت اتخلص منه ّ!! وجت اللحظة الحاسمة .. ولحظتها مافكرت في عواقب فعلتي .. والخاتمة ! قتلته !!! أيه قتلته !! والله يرحمه ...هو اللي بدا ! هو قتل فرحتي !! ونظرتي ...ولحظتي ! وقتل أحلى لحظات عمري ! من يوم زفافي ...إلى هاليوم ! عشت أيام وسنين .. لا ليلي ليل ولا نهاري نهار !! طول وقتي خايفة .. عشت ايام وسنين .. أدفع ثمن لحظة خاطفة .. لاتتركوني مع الموت والعذاب !! وأنا انتظر لحظة يقولون اسمي ! لحظة أتقابل أنا والسياف ... والسيف !! كل يوم افكر في هاليوم .. وعجزت أبعده .. أتلمس حلقي .. رقبتي .. وأتخيل أن السياف بيقطعها قريب .. وأتخيل راسي يتدحرج .. وعروق دمي .. نافرة .. وأناظر وجهي في المراية ! عيني !! وفمي وخدي .. حتى شعري .. وكل جسمي !! وكل جزء أتحسس موضعه .. ياخسارة .. جسمي بيفقد راسي .. وراسي بيفقده ! وأتخيل جسمي لحظة الموت .. ينتفض ويرتجف .. ورجلي جافة .. ثم تلين .. ثم تسكن .. ثم تموت.. ثم انتهي ! ينتقل جسمي المذبوح لبيت أهلي .. وأمي تغسله .. وتكفنه .. واخوي يدفنه ! وأتخيل الناس تصلي علي .. اللي يبكي بحسرة !! واللي يدعي علي ويقول .. تستاهل أحسن !!! هذا جزاها القاتلة !! لاذكرت الموت طار النوم عن عيني .. وسالت دمعتي .. ولا نمت .. حلمت .. وعشت مع أمي وأبوي وأهلي في النوم .. أشوف أحلام .. تعطيني الأمل.. وتخليني متفائلة !! شايفين كل هالكون الكبير؟؟؟ وكل هالدنيا الوسيعة !! كأنها عندي خرم ابره .. وودي لو اني أطير .. وأطير وأطير !!! ودي أذوب .. ودي أختفي من هالوجود !! ودي أن كل شيء في هالكون ينسى ينسى اني .. كنت في يوم .. قاتلة ! وياحر قلبي على أمي .. تدمع عيوني .. وأنا اتخيل منظر عيونها وهي تبكي على فراقي ! أخاف عليها تموت .. بعد ابوي .. وفاة عاجلة ! يمه .. يمّه .. يا يمّه .. ابوي بعد سجني .. مات بحسرته !! عارفة .. اعذريني .. تراني خذيت منك كل شيء .. أبوي .. وبنتك اللي هي أنا .. والبسمة .. وخليتك في هالديرة سالفة !! يمه .. الله يخليك يا يمه .. أدعي لي .. تكفين يمه !!! تكفين يالغالية .. وادعي لكل القلوب اللي معي متعاطفة !! وينكم ؟؟ وين الرجاجيل ؟؟ ارحموا بنت ضعيفة .. ارحموا بنت هي في الأصل مظلومة .. لكن البندق خلاها في لحظة ظالمة .. وين النشامى ؟؟؟ وين الرجاجيل اللي إذا صاح الغريب وصاح الأسير .. يفدونه بارواحهم الغالية !! ياأبوي عبدالله .. بنتك بيقتلها السيف .. وأنا بك منتخيه .. وبعيرنا عند بابك ناخية !! نصيتك ياسلطان الخير .. ودي بخير منك ... وأعظم خير ياسلطان .. أنك تعيشني مع السيف بأمان !! يا نايف .. أمن قلبي.. ترى قلبي من الموت خايف !! ياسلمان .. ماودي أمي تذوق حرقة فراقي !! وفراق الضنا مامثله فراق .. حزنه اعظم الاحزان ! ودي أجلس مع اهلي وزوجي .. ودي أعيش .. ودي أعيش ... ودي أصوم رمضان ! ياعبد العزيز .. ياولد فهد .. الأمير اللي إذا جاه الفقير .. يقول له : ابشر .. وسم ! وين اللي كنت أشوفه في الجريده ؟؟ يحط يده على خشمه .. ويقول للناس : على هالخشم .. ثم تقول أفعاله : تم !! وين المشايخ اللي عرفوا بقصتي ؟ وعرفوا .. قبيلتي .. وأهلي و الخال والعم !! ياشيخ عايض .. وياشيخ سعد ! الوقت يمر .. والموت حكمه .. تم ! وصدقته المحكمة ! يمكن أموت في أي لحظة .. الدقيقة غالية !! ست سنين والموت يلاحقني .. ست سنين وأنا في سجني في هم وغم !! ست سنين وأنا مايعرفني إلا الموت .. والخوف هو الوحيد اللي أعرفه !! ست سنين وانا في سجني .. ما أحدن تحرى .. ما احدن راح لابو القتيل يستسمحه ويقنعه ! ودي المروة تدخل قلوب الرجال !!! و ينسون الكرامة .. اللي مالها هالحين لزمة !! ودي بالشهامة وتروح للأبو تستشفعه !! وياحظ من أحيا نفس بتموت .. كأنه احيا كل الكون بأجمعه .. وياسعد من قدم في الدنيا هالمنفعه .. يارب .. يارب .. اعتق من عتقني .. واحيي من احياني .. ويارب .. تمد في عمر من يمدد لي سنيني الخالية .. ويارب .. تعطي من عطاني الأمل ! جنة عالية .. جنة عالية .. جنة عالية ! يا أهل القتيل .. سامحوني .. أنا قاتلة .. واعترف أني قاتلة .. قتلت ولدكم .. لكنه هو قتلني قبل وبعد ! ثمان سنين عشت فيها الموت ! ثمان سنين متواصلة .. أخذت جزاي .. وإذا أنتم تبون تأدبوني .. تراني تأدبت ! والله العظيم تأدبت .. والله تبت ... والله ندمت ! والله تبت .. والله ندمت ! والله أني نادمة ! خلوني أعيش .. واتركوا الموت يجيني في ساعته !! يكفيني السجن .. يكفيني الخوف ... يكفيني الوعد بالموت !! يا أهل القتيل .. سامحوني .. لا تعدموني .. عدوني .. ميته ! وش تخسرون لو عتقتوا رقبة بنت ضعيفة !! بحبل الموت عالقة .. اعتقوني لوجه الله .. لوجه الله .. لوجه الله .. لأجل الله .. لأجل الله وبس .. يعتقكم الرحمن من نار حارقة .. لا ذكرت كل هذا .. أصيح .. وأصيح وأصيح .. بصوت عالي ! اتمنى الكون كله يسمعه .. ويجيني بكى .. ما اقدر أدفعه ! لا ذكرت الموت .. تخنقني العبرة .. تخنقني خنق!! ويوقف الزاد في حلقي .. وما أقوى أبلعه !! وكل ما تضيق .. وتضيق .. وتضيق .. أفك عن نفسي .. وأردد .. لو يضيق الكون كله .. عند الله سعة !! ولا فكرت بالموت .. ذكرت الله .. وذكرت أن راسي ما يتقطع إلا بأمره !! هو اللي خلقني وراسي هو اللي ركبه .. وهو اللي إن شاء ... وأراد .. هو بس اللي يقطعه ! بعدها ...اتنفس براحة ... وأرتاااح وأحسن ظني بربي .. وظني ان ربي بيعتقني ! إيه هذا ظني .. وربي عند حسن ظن عبده به .. و من نصاه ما ضيعه ! وأنام وأعرف أن بكرة بيجي الصبح .. وكل صبح رزقه معه !! يارب مالي إلا انت .. اعتقني أنت .. اعتقني أنت .. اعتقني أنت .. في الدنيا الحين .. وفي الآخرة ! يارب صوت العفو .. ودي هاللحظة أسمعه !! ودي هاللحظة اسمعه !! ودي هاللحظة اسمعه !!

الرسالة تنسب لسجينة خميس مشيط الخبـــــــــــــــر المفرح هو العفو عنها رسمياً حسب ماقرأت نقلاً عن مصادر شبه موثوقه


اتمنى ان يكون الخبر صحيحاً


( الرسالة والخبر منقوله )

يااااااهـ
الرساله بجد تبكي وتعور القلب
..

الف شكر
لك أستاذي

..

أشاركـ الجميع أمنياتهم بصدق العفو عنها



رسالة حروفها ألم



الف شكر وافـــــــــي

	الرساله بجد تبكي وتعور القلب

ايوالله تبكّي ياخيتي

الله يفرج كربتها ويارب يكون خبر العفو صحيح





شرفتي جوري


...

..

وافي .. فعلاً رسـاله محـزنه وسبق لي قرأتهــا

ولكن خبر العفـو " خطـأ" وتمـ القصـاص منذ سنه تقريباً ..

الله يرحمنـا برحمتـه
..

	أشاركـ الجميع أمنياتهم بصدق العفو عنها

نتمنى ذلك


شرفت محسون

...

	وتمـ القصـاص منذ سنه تقريباً

لأ عاد يامتعاطفه !!

أخبار العفو وردت من كذا مصدر ومن ضمنها قناة العربيه
خلال هذين اليومين

معقوله كل هالمصادر الشبه موثوقه ماعندها علم عن ماتم قبل سنه !!


ان شاء الله تكون معلومة خاطئة




شرفتي خيتي


...

8
8
انا قريتهـا العـام .. بالضبط بالاختبارات النهـائيه .. من موقع " منتديات عسير" ..

وكذا ورد في الموضوع ان البنت كتبت هذه الرساله قبل خضوعها للقصاص ..

والله أعلم ..
..

من ضمن بشائر الخير

http://www.sabq.org/inf/news.php?action=show&id=848

	انا قريتهـا العـام .. بالضبط بالاختبارات النهـائيه .. من موقع " منتديات عسير" .. وكذا ورد في الموضوع ان البنت كتبت هذه الرساله قبل خضوعها للقصاص ..

والله صادقه ياخيتي
كم مرة قالوا نفذ الحكم وكم مرة قالوا صدر العفو
والى الآن لم نجد الا اخبار مايعرف صدقها من كذبها


...