جابك الله من غياب ٍ ضيّـق صـدور المبانـي=قبل لا الوحشه تزعزع بيتك الصلـب وتبيـده
بيتك اللي من رحلت وكـل جدرانـه تعانـي=ماتحمـل ينتظـر شهريـن وعيونـك بعيـده
الله العالـم لـو إنـك جيـت متأخـر ثوانـي=ماتشوف إلا بقايا من حصـاه ومـن حديـده
من عرفتك وأنت تايه من موانـي لـي موانـي=وتارك ٍ قلبي مولّع مـن وقيـده فـي وقيـده
ضاعـت سنينـي أحـد بهاليالـي وتحـدانـي=وأنت ماتشبع غياب ولاتخـاف مـن النقيـده
ودي أتحمـد لـك الله بالسلامـه , مامدانـي=كل ماتوصل برحله ترجـع برحلـه جديـده
دام تدري كل وجـه ٍ غيـر وجـه الله فانـي=ياخي أكسبلك ثواب وخاف ربك في عبيـده
كان فيني عيـب قلي:فينـي العيـب الفلانـي=كان هرجي مزعلك فـي شـي قلي:لاتعيـده
عيب تصغر في عيوني وأنـت برقـاب الغوانـي=كيف تستسهل طعوني وأنت خابرني وليـده ؟
لعنبوك أن مت بيدك من يفكك من أخوانـي ؟=لحزنوا ربعي على فرقاي شاللـي تستفيـده ؟
أنت منت اللي عشقته أنت أكيد انسـان ثانـي=ليه صرت بهالبرود وبهالاحاسيـس البليـده ؟
وين حبك للزعل .ويـن العنـاد الأولانـي ؟=وين حنّية زمـان وفرحـة العمـر الرغيـده ؟
وين ذاك اللي اليا أقبـل مايبـات إلا بمأنـي ؟=وين راح اللي اليا أقفى مايـروح ألا فقيـده ؟
واحد ٍ من جابـه الله بـس يامـر ويعصانـي=الوحيد اللي أخافه غصب وأمشي معه سيـده
(مابغيت أطيـح بيـده) ليـن ماربـي بلانـي=ولا أنا لو هي بكيفي (مابغيت أطيـح بيـده)
ذاك بس اللي يامـن جيتـه يلخبـط كيانـي=اللي بنظـره ينشـف دم قلبـي فـي وريـده
قبل أشوفه أجمع اله أحلـى القصايـد والمعانـي=وأن لقيته ماعرفت أقـول لـي جملـه مفيـده
الف مره قبله أعـد القصيـده مـن لسانـي=ولعنبوه أن جيت عنده قمت أخربط بالقصيـده
أمدحه وأنا أدري أنـه لـو تباطانـي نسانـي=أنطحه وانا أعرفـه مجنـون وأفكـاره عنيـده
من يسوي بي سواتك يالرهيـف الاسمرانـي ؟=منهو من الناس غيرك غلطته ترفـع رصيـده ؟
من يقص(جناح طيرك)وأنت أعز أنسان جاني ؟=ليه أخاف(رماح غيرك)وأنت ضرباتك سديده ؟
ان تبعتك .أتبعك من طيبـي وواسـع بطانـي=ولا أنا لاجيت أكيد انسـان عـزالله بكيـده
أقدر أنزع لك ثيابـي وألبـس ثيـاب الأنانـي=وأقدر أطلع من عذابي والعب بدورك وأجيـده
ومستعد أكسب رهاني لو بغيت أكسب رهانـي=وأخدعك بحساس كاذب وأتحدى من يصيـده
أبك أنا لي شفت خلّي حط غيري فـي مكانـي=والله إني لتركه وأن صد لعشـق سيـد سيـده
جيت مابيك تحقرني جيت أبيـك تعـز شانـي=جيت أبي فزعة ظلوعك من مشاعرك البليـده
خلني داخل (حدودك) وأجبر بخاطـر زمانـي=أكذب بباقي (وعودك) وأصدق بلحظه سعيده
أنتشلني مـن (بـرودك) لـو تولّـع بالمحانـي=عطني أحساس (بوجودك) وأخذ كل اللي تريده
تكفى واليا قلت :تكفى بيع خلـق الله عشانـي=لاتضيّع من يدينـي فرصـة العمـر الوحيـده
يعلم الله شفت منك ومـن غيابـك ماكفانـي=كان ماتقدر تخفـف هـم قلبـي !! لاتزيـده
شف غيابك وش مسوي بالصـدور وبالمبانـي=وأنت تدري كيف كانت صدمت غيابك شديده
والله أنك لو وصلـت البيـت متأخـر ثوانـي=مالقيت إلا بقايا مـن حصـاه ومـن حديـده