قصه محزنه ...

السلام عليكم ورحمه الله وبركاته:

نور عيني ( الشغالة ) تحمل على ذراعيها ( نزار ) ذو السنة من العمر وتحاول جاهدة إسكاته
أو تنويمه فقد اقترب قدوم أمه من العمل

تقول منشدة :

نام يا حبيبي نام

بابا مشغّل دشه و ماما في الدوام

نام يا حبيبي نام

جعلك بكره تكبر وتروح الدوام

نام يا حبيبي نام

وما تصير مثل بابا بس يأكل وينام

نام يا حبيبي نام

وما تصير مثل ماما مافيه ابتسام

نام يا حبيبي نام

تدخل ( مها ) أم نزار صارخة :

ظلام عيني !!!!!!

نورعيني : بسم الله !!!!!!!!!!!

نعم ماما

مها : حسبي الله عليك يالخايسه ... صوتك واصلني في الشارع

نعنبوك فضحتينا .. ما بقى احد الا وعرف ان زوجي ما يشتغل

والله لو يدري كان توطى في بطنك... زوجي دكتور ومتفرغ للتأليف يا السوسة النخرة ...
والله لونك على كفالتنا ما تجلسين ساعة مير ادعي بسلامة خالتي

نورعيني : ماما انا في اسف

ام سليمان : وش هالصيحه عليه ... عسى ما شر يا بنات

نور عيني باكية : ماما انا في سكت نزار ماما مها في زعلان في كلام انا خايس

مها : والله يا خاله إن ما سفرتوها إن نطلع عنكم ... هذي عقرب رمل تلدغ ولا تشاف ...
نازلة تشمّت وتطـنـّز فينا
وانتو ساكتين لها … والله قهر

ام سليمان : يا بنيتي خذي ولدك منها وارتاحي و بعدين نتفاهم

مها : لا يا خاله هلحين تسفّر وإلا ولدكم عندكم وانا بروح لهلي

ام سليمان : يابنيتي تعوذي من الشيطان وطيعيني ... وخلي التفاهم بعدين

مها : مهيب اول مره تدافعون عن هالخايسه ... صايره اهم منا

ام سليمان : يانورعيني حبي راس ماما مها وعتذري منها

مها : مانيب قابله لها اعتذار ... من زين هالخشه تحب راسي جعل راسها يكسر

ام سليمان تنصرف وتترك مها و الشغالة وتنادي على ابنها تركي

ام سليمان : تركي ... تركي ... تركي

تركي : نعم وش تبين

تعال ياوليدي حل هالمشكله الي بين زوجتك و الشغاله

مها : اسمع عاد تراني ماشية لبيت ابوي واذا سفّرت الشغاله رجعت

تركي : الله يهلك هالشغاله اللي اشغلتنا

ام سليمان : ياوليدي اسمع السالفه قبل ما تحكم

تركي : الا اسمعي انتي شغالتك هاذي اذتنا ومعاد نتحملها

ام سليمان : ياوليدي لا ترفع صوتك علي و انا امك

تركي : اذا سكتنا اكلنا وان تكلمنا ظلمنا وماسكين علينا سلاح الطاعة العميا ... والدتي
على عيني وراسي بس زودتوها مع هالشغالة
ام سليمان : هلحين وش المطلوب

تركي : يا انا يا الشغاله في هالبيت

ام سليمان : يا دكتور تبي تطلع الله يسهل عليك ... الشغاله مناب مسفرينها

تركي : ادري انها ساحرتكم ... وادري انكم ما تحبوني لا انا ولا زوجتي ... لكن عساكم
تهنون بها... انا ماشي

ام سليمان : لا تنسا تنزل دشّك من السطح ولا تشيل أي شي ما دفعت ثمنه

مها : انا قايلة لك من زمان انا جالسين على كبودهم

تركي : هاذا الدين والأخلاق اللي طالعين لنا فيه

ام سليمان : الا هذي عقوبة قل الدين يا دكتور ... لو ان فيك خير ماطردت من عملك وعكفت
على الدش والمجلات الخايسة... لو ان فيك خير كان عزيت نفسك وعملت لمستقبلك... هلحين رح
للي يشجعونك وينفخونك وخلهم ينفعونك

تركي : ايه يازمان العجايب ... انا الدكتور اللي ارج الصحف بمقالاتي اطرد عشان شغاله...
ومن من ؟؟؟ من امي

ام سليمان : رح الله يردك لرشدك

يتدخل سليمان فقد سمع اغلب الحوار

سليمان : يا ابو نزار خلك عاقل ... وين بتروح؟؟؟ ومنين بتصرف على اسرتك ؟؟؟ و..

تركي : يا أخ… وفر أسألتك …وترا ماني فاضي لك

سليمان : ياليت الناس اللي يتابعون انتاجك الأدبي يدرون ان ماعندك ادب

نورعيني : ماما انا في غلطانه... حرام خراب بيت ... انا لازم في سفر او روح كفيل ثاني

ام سليمان : نورعيني روحي لشغلك ولا عاد تكلمين في هالموضوع

سليمان : الأخوه والأخوات المتابعين لنا في الأنترنت

هذا ما حدث بين بعض افراد الأسرة

ومثله يحدث في اسر اخرى

فما رايكم؟



نقلا عن الاسره.




مظلوم

ماقول الا حسبي الله ونعم الوكيل والله طالت وشمخت هالشغالات

جايبين المرض للعالم بس ايش نعمل لو مانلقى كل شي جاهز

مابنعيش الشكوى لله ومن اهم اللحظات اللي يجب التنبه لها

ترط الطفل مع الشغالة يعني تعلمه اشياء ولو انه صغير

ومتحضنته دايم يتعلق الطفل وحالة الله يستر يعطيك العافية

مظلوم وتحياتي

المسافر...

مرحبا مظاليموو


المسافر حرام عليك ايش دخل الشغاله

الغلط مو منها من الوضع الي الام والاب

عايشين فيه .....كل واحد في وادي

واحد جالس والثانيه بالدوام ؟؟

ورايي ..ان الوضع غلط بغلط من اساسه

اذا الام هي الي تشتغل ...الاب ايش يسوي

واذا الشغاله هي الي تربي الولد..الام ايش تسوي

كل واحد معطي دوره للثاني ... انعدام المسؤليه

وانعدام العقل والتفكير ... في النتائج

واحلى شي ان الام طردتهم ؟؟.....



فرح

ايييييييييييه يافرح والله حالة من كل مكان الغلط موجود ماقول

الا حسبي الله ونعم الوكيل هم الاساس مخربين الموضوع وكل واحد مو

بفاضي حق الولد لكن مصيرهم يندمون على اللي سوه ويندمون

على هالحال والله يحيمينا من كل شر تحياتي

المسافر...

مساكم الله بالخير

انا اوافق الاخت فرح ان الاساس من رب الاسره

هو الى يسمح للشغاله انها تتمادى وتتعد

حدودها....والمفروض المراه السنعه ماتخلى

الشغاله تتحكم فى البيت وترتب البيت على

كيفها...ولا تسمح لها ان تتكلم فى امور

الاسره...بعدين انا مانى مؤيد ان الشغاله

تقوم بتربيت الاطفال او العنايه بهم..

وفيه بيوت كثيره تدمرت بسبب الشغالات