((..ليلة زفاااف // ليلة ودااع...))

السلام عليكم ورحمة الله وبركاته ... اما بعد


الله يصبحكم بالخير والرضا والسعادة والصحة والعافيه


مع



الياسمين والكادي واليشموم والعنبر والكنمودي والمسك والريحان والعود الازرق



قصيدة رائعة من شاعر رائع له مع الحرف صولة وجولة وخوة عاني ومتعني في ميادين المشاعر والاحاسيس تاريخ جميل وابداع وله مع السبك والحبك وسلاسة الاحرف وتناغم القصيدة والمفردات الرنانة والتي تبقى في الوتين . أكيد ان كلامي وتشخيص حالة القصيدة مع هذا الشاعر بالذات اعجز كثيرآ من تشخيصه .

اريد منكم قراءة القصيده وانا متأكد انها سوف تنال إعجابكم


وتقبلوا خالص تحياتي

الجرح الكبير
مبارك القحطاني


وقتآ ممتعآ مع القصيدة الشامخة من الشامخ




قالهـا شامـخ عـلـى الله ..ياعنـيـدات اللـيـال
ماحوى مقبـل سنينـي ..يجبـر الجـرح الدفيـن

لا تلاشـت لـي مصيبـة .. حملهـا هـد الجبـال
تبتـدي ثانـي مصيبـة .. قـو الأولـى مرتـيـن

العمـر رحلـة تجـارب .. والوفـاء كلـه خيـال
والزمن لو طـال عمـره ..مابقـى شـيء ٍ ثميـن

عمت الفوضاء بدربي .. والرجوع اصبـح محـال
والمكان اللي حواني .. ( صرختيـن و دمعتيـن )

المسـاء هـذا كئيـب .. وذكرياتـي بـه طـوال
والثوانـي ..والدقـايـق ..بالخـطـى متثاقلـيـن

والسماء ضمت قمرها .. مـع بـزوغ اول هـلال
((شهـر خمسـه)) والدمـوع الغاليـه بالوجنتيـن

الفتـاة اللـي سكنهـا العيـن ..واجفونـي ظـلال
اعزفوا ليلـة كفنهـا .. نغمـة الصـوت الشجيـن

والله انـه مـا نفعهـا ..لـو تصـل حـد الهبـال
والله انـه مـا منعنـى ..غـيـر رب العالمـيـن

قـدر الله ..وانكتـب عنـوان هـذا الـحـب زال
والقـدر لا حـل حكمـه ..كلنـا لــه مذعنـيـن

كنت شـاري حبهـا ..فيـه الدلـع ..فيـه الـدلال
لكن انه ينتهـي حـب انعمـر طـول السنيـن..!؟

هذا والله .. هو سبب خوفي .. وجرحي .. والهوال
هذا والله .. هو سبـب دمعي..وحزنـي والونيـن

هذا والله .. هو سبب مـا حدنـي فـوق احتمـال
يوم شفت الموت .. وانتي يا حياتـي ترحليـن ..!

ان رحلتي .. ليش بأبقى ..والقمر شد الرحـال..!؟
وان بقيتي.. ليش بأرحل .. والقمـر تـوه مبيـن؟؟

وان سألتي ليش بأرحل ؟؟ قلت لـك هـذا المقـال
((الرحيل اسهل طريق ٍ ..لأجل ماتبقـى سجيـن ))

وأن سألتـي ليـش تتركنـي بسـاحـات القـتـال
قلت لك مـا تّـل قلبـي ..غيـر نـاس ٍ خاينيـن

الخطا غامض .. ولكن .. تسمحـي لـي بالسـؤال
هل رضيتي يوم قالوا .. ( هل بغيـري تقبليـن)؟؟

كانك انتي راضيه .. ما عـاد باقـي لـي نضـال
لأرتحل عبر الصحاري ..وانتهـي وابقـى حزيـن

لأرتحل عن دار حايل .. واهجـر ادروب الشمـال
لو بهـا نـاس ٍ عزيـزة ..فـي غلاهـم واصليـن

لأرتحل فوق الخيـال ..ولأندثـر تحـت الرمـال
ولأنتهي عن كـل سكـة ..فـي دروب العاشقيـن

وكانك انتـي رافضتهـم .. واجبـروك ِ بالحـلال
واصدروا عقد النكاح .. ولا سألو _ هل ترفضين )؟

الله اللـي راد يـا عيونـي ..ولا فيـهـا جــدال
واسحبي ذيل الهزيمـة .. وافعلـي مـا تؤمريـن






مادريت الا كروت افراح ..تدعوني تعال
حفلها ليل الثلاثاء ..والخبر صبح الثنيـن




لا





لا ولايمـدي ..ولايمـكـن.. لتحقـيـق الفـصـال
دام باقي ليل واحـد ..يـا عيونـي وش تبيـن .؟؟؟

أومريني ((شخـص)) طايـع ..قيـده وقتـه غـلال
واقتلينـي وسـط دارك ..واشربـي دمـي الل؟يـن

دامنـي عـن ديرتـي يـا بنـت قطّعـت الحـبـال
كيف ابـدري للفـرح يـا بنـت وانتـي تعرفيـن ؟؟

اعذرينـي ..مـادريـت الا بكسـوفـك والــزوال
اعذرينـي ..ماجـداي الا صـدى صـوت الأنيـن

واعذريني .. لو رحلت وغـادرت سفـن الوصـال
واعذريني .. لو قطعت الوصـل بالنـاس اجمعيـن

واعذرينـي لـو سقيتـك مـن بحـر هجـري زلال
واعذرينـي كانـك انتـي يـا حيـاتـي تعـذريـن

واعذرينـي يـا حياتـي ..كـل ماجالـك مـجـال
واعذريني يا حياتـي قـد مـا انتـي تقدريـن ...!؟

والا انا يـا عزتـي لـي ..حالتـي ماهـي بحـال
زيـن اكمـل بعـدكـم يـانـور عيـنـي ليلتـيـن

وادري ان صـرت بغيابـك.. وفــي ٌ لا يُـطـال
للوفـاء مضـرب مثـال ٌ فـي عـلـوم الطيبـيـن

واسمعي بآخـر قصيـدة .. بعدهـا قطـع الوصـال
بعدهـا .. مافيـه شـيءٍ يربـط لآخـر يقيـن ..!


( الطمـوح اللـي بنينـا ) ينهـدم قبـل الــزوال)
ينهـدم قبـل الغـروب .. ويندفـن حلـم الثنـيـن

( ينهدم لأجل الشريعة ) ( ينهـدم لأجـل العـدال )
( ينهدم لأجل الأمانـي ) ( ينهـدم لأجـل السنيـن)

( ينهدم يـأول حبيبـه ) ( ينهـدم يأغلـى غـزال )
(ينهدم ياأجمل عيون ) ( وينهدم يـا أوفـى ضنيـن )

ينهـدم .. لأن القلـوب أولـى بتحقـيـق المـنـال
ينهـدم .. لأن التـعـازي مــا تــرد الميتـيـن

مابقـى غيـر الـوداع .. وكفنـي حسـن القـبـال
وسامحينـي كـل لحظـة .. واسمعـي هالكلمتيـن

و الله انه مـا مـلأ عينـي .. بعـد حسنـك جمـال
والله انـه مـا سكـن قلبـي بعـد رحتـي عويـن

بأوعدك ..يبقى مكانـك والهـوى مـا اعطيـه بـال
ولايحرك من شعوري بنت .. واحلـف لـك يميـن

أرحلـي والله معـك فـي غيبـتـك والارتـحـال
وارحلي ..لآخر مدى والدرب ( ورد وياسميـن..!)

ارحلـي ..بالذكريـات وباقـي الـحـب الـمُـزال
وارحلي.. تكفين لا يردك على الشامخ حنين ..!

وارحلـي .. واتجاهلـي كـل الكـلام اللـي يقـال
لو سمعتي ( حـال شامـخ ماتسـر الناظريـن ..!)

صدقينـي .. لـو تشوفينـي علـى جـرف ٍ هيـال
ما انتظرت .. الا وانا اعرف وش يكون المسلكين ..!

صدقينـي .. ( مرحلـة بتُمـر ) والصبـر ابتـذال
بأبتسـم رغـم الجـروح .. ولاعقـدت الحاجبـيـن

صدقيني .. لا سمـح قلبـي .. بـأدور لـك بـدال
يا عسى قلبي يلين .. ويـا عسـى ربـي يعيـن ..!

من شبابي والحـزن .. فـي خوتـه خـوة رجـال
مايفارقنـي .. ودايـم عـن يسـار وعـن يمـيـن

لاغفيـت اشوفهـا بالعـيـن .. تبـكـي للـطـلال
ولا صحيـت .. اشوفهـا قـدام وجهـي باليـديـن

اكتفيـت ارجـوك يـا سْنينـي .. عذابـي لايـزال
يا عذابي .. وش بقى بـي يـا سنينـي تجرحيـن ؟

كيف اصدق ما حصـل لـي .. والله انـه كالخيـال
كيـف اكـذب والنواظـر ..والجـوراح ..شاهديـن

انتبهت لدنينـي .. والحـزن مـدري ليـش طـال؟
واعتزيـت .. وقلـت يـا الله عـن كـلام العاذليـن

لـو خذلنـي فـي تعاملهـم .. ردييـن الـرجـال
و الله انـي مـا اتهـاون .. عـن علـوم الطيبيـن




الـــــشـــــاعـــــر/
شـــــــامـــــخ الــــــشــــــامــــــخ

هلا والله ومليووون هلا بمبارك صبي قحطان


حياك الله وبياك وآخر الغيبات إن شاء الله

قصيدة راااائعة كروعتك

جزلة كجزالتك

اختيار اكثر من راااائع


لشاعر اكثر من شامخ

سجل اعجابي

وتقبل تحيااااتي

	ان رحلتي .. ليش بأبقى ..والقمر شد الرحـال..!؟ وان بقيتي.. ليش بأرحل .. والقمـر تـوه مبيـن؟؟

والله قصدية جميلة جداً ومن أجمل ما قرأت...

صح لساانه شاامخ وتسلم يديك على هالنقل المميز أخوي مباارك...

الله يعطيك العاافية...

هلا يا مبارك ..
حيّه وحيّ ما جاب ..
قصيدة جميلة وحزنها لذيذ وأحبه ..
صح لسان شامخ ودمت ودام لنا ذوقك ..

تحيّتي

راااااااااااااائعهـ

كلك ذووووق .. مبارك ..

صح لسان .. الشامخ ..

و تسلم يديك
.
.
.

بسم الله الرحمن الرحيم

مبارك القحطاني

السلام عليكم ورحمة الله وبركاته



يا سلام عليك وعلى روعة اختيااااااااااارك
اختيااااااااااااار رائع وذوووووووووق عالي معهود منك
بارك الله فيك وفي جهووووووووووودك


تقديري واحترامي



اخوك
حسام الشعر