شاعر الاسبوع .. الامير .. بدر بن عبدالمحسن ..

فم الجروح ..

نوافذ البوح ..

هـذي الثقوب في الصارخ الحي ..

نوافير من ضي ..

وجدار ..

املاها بحديث النار ..

واكسرها على اقدام الاماني ..

مره أغاني ..

ومرها .. كلامٍٍ جارح ..

وهذا القصيد ..اللي كتبت البارح ..

اليوم .. انفاس الصباح ..

تلفح جروحي ..

آه .. ياصبحٍٍ لمحت في عتمته روحي ..

طفلةٍ تصدح على خشب المسارح ..

ياصوتها الغاضب المقطوع ..

بعض السواد .. شموع ..

ومحدٍ درى وش قلتي ..

خانتني الجوارح ..

مثل القصيد اللي كتبت البارح ..

افارق .. هاالنجوم الطايحه ..

بين المدى والقاع ..

وفي قلبي من الاوجاع ..

مايكفي ..

وفي قلبي افارق ..

حزين اللي تركت البارحه ..

وجهه على كفوفك ..

غسل بدموعه طْيوفك ..

غرستي في صدره حروفك ..

بيارق ..

ورى هاذي الهضاب سفوح ..

عيونٍٍ مالها عيونك ..

ولاقلبك ..

اسافر كل قلبي جروح ..

وانا احبك ..

عسى لاطبت.. طفيتك حرايق ..

ولو بيديني غيرتك ..

ولو مثلك في هاذي الارض ..

ضيعتك.. ودورتك ..

ولكن انتي .. غير انتي ..

وانا .. مثل الخلايق ..

افارق ..

ودايم قصة العاشق .. قديمه ..

مثل كل الفصول ..

اللي على مر الزمن تنعاد ..

عزانا .. والدموع جداد ..

بأن الشمس وحده ..

وياكثر المشارق..

سيدي قم...

ما خبرت اللي يحب يشتهي النوم

سيدي قم...

لاتنام وفي السماء باقي نجوم

يا جريح البارحه

كيف طبت اليوم

سيدي .. يا سيدي قم




سيدي ...الليل للعاشق نهار

قم معي ... نجمع نجوم الظلام

سيدي ... لو عرفت الانتظار

ما غفا لك جفن .. .يا عذب الكلام

اه لو تدري الهوى والسهر مقسوم

يا جريح البارحه

كيف طبت اليوم

سيدي .. يا سيدي قم




سيدي ... لا تناظرني بغضب

ودي تحس مثلي بالغرام

سيدي ... ما وراك الاالتعب

ليت عيني مثل عينك تنام

اه لو تدري الهوى والسهر مقسوم

ويا جريح البارحة كيف طبت اليوم

سيدي .... يا سيدي قم

يا عذولي .. وش تفيد به النصيحه = لا تعذل القلب .. وجروحه طريّه
من يداوي علة الروح الجريحه = ومن يسلي دمعة العين الشقيه
ان شكيت من الهوى .. قالوا فضيحه = وان سكت استنقضوا جرحي عليه
وان نويت البعد .. ضاقت بي الفسيحه = وان بغيت القرب .. خان القرب فيه
من عذلني في الهوى الله يبيحه = ومن عذرني .. ما حصل مني خطيه

يا جاذب القوس ..

قطعت كل العروق .. الا وتر

وكل الجبال .. الا الحجر

وكل الطعوس .. الا الاثر ..

وجرحتني .. جر الربابه

يا فتى الجود ..

وبين السبابه .. والابهام

احبس القلب ثم اطلقه

صوتٍ أحسه واعشقه

هات القصيد من الكلام

والروح .. في صافي النغم ..

ذكرني .. زهر القحويان

في مبسمٍ لو قلت فم

عيا النهار

لاصابعك تلفتت (عليا )

وتنهدت (نوت )

والعشق من كل الرمال اللي مضت

كنك جمعته فـ صوت

ناظرت في حسك .. آثارهم فوق المراح

كن البدو .. اللي شربوا .. ملح وقراح ..

من أول بدايات الصباح..

أسمع حنين ركابهم

قفوا .. وانا فـ اعقابهم

أبكي على خلي .. رحل

لاجل الزمام .. ودق الوشام ..

وخرسٍ محاجرها الظلام ..

رد القصايد للكلام ..

وخل الربابه .. يا فتى الجود ..

في قبرها الملحود

تحت الضلوع .. واخرجني من حسك

ود ّ الغريب .. يعود .. يا صاحبي بسك

لا تجذب القوس ..

لو هالدموع نفوس كان فاضت ..‍‍‍‍‍‍

سلامة رماحك اللي جرحها غالي = طعنتني غاضب لين أنكسر رمحك
لو قلت لي كان أجرح حالي بحالي = لا عاش قلبٍ جزع وارتاع من جرحك
لاجلك جروحي غدن اليوم عذالي = ذميت ظلمك وأنا من عادتي مدحك
ياليت لي ذنب وألقى علقمك حالي = وياليت بك عدل .. وأرضى فـ الهوى ذبحك
ياسيدي وإن نويت تزيد غربالي = قلي وأنا أبعد ظلامي عن سنا صبحك
لو ما يسرك أطو ل الشمس بجبالي = مايكفي إن عشقت جبالك وسفحك
كل الهوى بالهوى يزهى ويختالي = وأنا الذي في خسارة عزتي ربحك
ياعل ماتزهرالأشجار في رمالي = لو أعتذر عن شموخي في رجا صفحك
سلامة رماحك الي جرحها غالي = طعنتني غاصب لين أنكسررمحك

عبر العصور .. السالفه ..

كانوا العرب .. يشرون

المهر .. بمية ناقة

كانوا الرجال .. مثل الرماح ..

قاماتهم مشدودةٍ .. ودقاقة

وكانوا الحريم .. صبرٍ قديم

وفا .. وسماح ..

والى .. اقطعوا عن الفطيم .. الحليب

قصوا عسيب .. من انخله

واعطوه له وقالوا فرس

اعطوا الصغير .. سيفٍ خشب

ومجدٍ يحبه .. يوالفه

السالفه .. رغم الفقر

والجهل .. واوقات المرض

ماكان للبسمة غرض

ولا كان للدمعه .. غرض

ماكان في الدنيا .. سوى

ثوب ورغيف .. وعرض نظيف

وكرامةٍ ماهي تمس ..

السالفه .. اني أحس

انا عكسنا السالفه

صحيح قهرنا الفقر

والجهل .. وايام المرض

لكن غدى لكل شي .. غرض

السالفه .. ان القديم

كله غدينا .. انخالفه

ابدون وعى .. والابوعى

ماانتم معي .. انها قديمه السالفه

سافري كان يرضيك السفر = جربي لو ورى ليلي صباح
بدلي الرمل بأمواج البحر = واتبعي الغيم تحملك الرياح
سافري لين تبكين المطر = واضحكي لين ما يضيق البراح
ولا تعبتي وحسيتي بضجر = خلي الشوق لديارك جناح
أرجعي في ابتساماتك عذر = مثل ما الدمع في عيني سماح
انتي العين من طول النظر = وانتي القلب من كثر الجراح

ماقلت له ... يا حلوتي ماقلت له ...

المشكله ... إني أختلف ...

لا طروا اسمك من الوله ...

وجهك تغيّر ... نظرتي ...

وتضحك في عيني يا عبرتي ...

وبعض الحكي ما اتحمله ...

ما اكذب عليك ... البارحه شافوك ...

رعشة هدب لفته ...

البارحه شافوك ... في النوم الذي عفته ...

وماحد ٍ يقول ... شافك معي مره ...

طيفك متى ... يكفيني من شره ...

باكر إلى مروا علي ربعي بقول :

إن السما ما هي سما ....

واغيّر اوقات الفصول ...

ان صدقوني .. ما دروا إنك هواي ...

وإن عاتبوني ... صارت عيونك سماي ...

يا الله لا تقطع رجا كل مشتاق = بامرك يا رب الحلم يصبح حقيقه
وأنا أدري أن الوصل تاليه لفراق = ولولا الأمل .. ما تحمل النفس ضيقه
أمس سرى في تالي الليل براق = قلبي يفز لنوضته بتخفيقه
وسمٍ بكور صادق الوبل دفاق = لو شافه الظميان يبتل ريقه
عله على دار الوفا .. دار الأشواق = دار صفت لأهل القلوب الرقيقه
فارقتهم ما ليلةٍ خاطري ضاق = واليوم للسلوان ما أجد طريقه
يا كود حرفٍ لي كتبته بالأوراق = مثل السراب اللي يسلي بريقه
والله لو كل المخاليق عشاق = ما شفت لك نفسٍ تعذب دقيقه