ملحمة في قبيلة مطــــــير !!

يالله يـا بــاني وســيع البنـايـه=ياللـي بـداها قبـل كـل البـدايـه
ياللي تولى الخلـق باحسـن ولايـه =الواحـد المعبود كل الرجـاء فيـه
ياباســط البيـدا ومـذري الــذواري=تحــل مـا في خـاطـري مـن طواري
تفتـح لنـا بـاب السـعد والسـفاري =واللي يبـي بـاب الفــرج له توديـــه
العلـم صـرح وفيـه كـل المطالــب =والصبـر فيه يحـس به كـل طالـب
وذل الفتى يجلـب عليه المثـالــب =مــوت بعـز ولا حيـاة تزريــه
والنـوم سـاس اللـوم ما يفيد صـاحبه =مافـاده ما فـاد الكـذب خســران كـاتبه
كمن يمسـح الموجــب ويحفـظ لسـالبه =ومن خـالط الجـربا على الحـول تعديـه
ينــال الفتى بالعلــم اســمى فضيلـه =يسمو بهـا ذكـره ويخــدم لجيلـه
وتبقـى بتاريـخ الأمـم والقبيلــه =لـو مـات جـزلات الفضائــل تحييـه
تبــداء بـك الأفكـار قبــل تشــيرك =والــى عـزيت بحـال وضّــح مســيرك
وانصـح لنفسـك قبــل تنصـح لغيــرك =وعلــٍم ما ينفــع صاحبـه عيــب يهـديـه
ما كـل من هـو يطلب العلـم يـدركه =ولا كـل من هـو يعـرف العـدل يســلكه
ولا كـل من هـو يرصـد المــال يملكه =صعب المطالب عمـق الأبحـار شـــاطيـه
ما تسـتوي البحـرين عـذب ومالـح =عنــد اعتـــراض امريــن صــالح وطــالـح
دري المفاسـد قبــل جلــب المصالـح =واللي يـدل الـدرب في الليـل يسـريه
الشعر فـن وصـادقـه خالـي الظلــم =واولى بقـول الشـعر من هو على علـم
ولا شـك توجد حكمة الشـعر في الحلـم =وفالمثــل فاقــد الشــي ما يعطيه
الشـعر يوجـد فيـه حكمه واناسـه =الـى ابتعــد عـن الهجـا واللســاســه
يــزها كـــراريــس الأدب والســياســه =قــولٍ يكسّــب مــن يبيعــه ويشــريه
ومـا فيه رجــل الا عليه الــف واجـب =واجــب يبيّـــن مأثــره في الحـواجــب
من لا يعــزز ماقفــه فاللـــواجـب =تلعـب به امـواج البحـر ثم ترميـه
حنـا العـرب تاريخنـا عطّـر الشـام =كـم ســجّلت لنــا الليـالي والأيــام
الــروم وايا الفــرس من فتـح الأسـلام =يشـهد جبــل طارق وتشـهد صــواريــه
يفّــرض علينــا وقتنــا ملحمـة مجــد =تنطـــق بما ضينــا على رابيـــة نجــد
والحــق ما يــرضى على الكبــت والوجـد =والمــاء مـا يجـري ليــن تسـنى ســوانيه
ولا يجـوز يتـرك فعل الأمجـاد ضـائع =هــذي كبيــره مـن كبــار الفضــايـع
يجـــب علينــا رد كــل الصنـايــع =الحق للأمجـاد الأحفـاد تــديــه
كثـــر التمّـــدح فالجـالــس ســماجــه =الا بفعــل الصـــدق الى جــات حاجـــه
الصمـــت طب وهــو غـايـــة عـلاجـه =ان كان خصمــك ما انت قــادر تـلاقيـه
حلمـك على اكبـر منـك لو كـان يمــزح =لا تقـــدّره من شـــأن تعــذر وتمــدح
الا الــى منـه نطـق بالخبــر صــح =وراس ما تقـــدر تنطحـــه لا تشـــاريـه
غطفــــان في التاريـــخ كـل عــرفهــم =فـــوق الكواكـب كان يرفـع شـــرفهــم
زهيـــر بن سـلمى بشـعره وصفهـــم =شـــاهد من الأجنــاب والحـق يـديّــه
أشــــجع ومـــره عــــدهم من فـــزاره =جمــرات من جمـــر العــرب بالأشـــــاره
وفيهم مـن الشــــعّـار كـان ابـن داره =اللي تحمّـــل صلـح داحـــس ومـا فيــه
منهم حذيفــه حــافظ ســــر الأســــرار =ونعيــم بن مســــعود نفّـــذ بعــد شــار
ذولا صحـــابة ســــيدي خيــر الأخيـــار =اعــلام واعـــداد الصحابــه ما نحصيـــه
كانـــت منازلهـــم بشـــرق المدينــــه =الى جبـــل منـــور وحـــرة مـزينـــــه
الى القصيــم وكـــل عصـــر بحينـه =ومن فــاته التــاريخ لابـــد قاريــه
العبـــدلي من ســاس عـــدنان جــده =وبالإنتمــى لمطيـــر يعتــد عـــده
ولــولا التبــاس الأمــر ما بـــاح سـده =والصـــدق نـــور وطالــب الحــق يرضيـه
كــان لبني عبــد الله اول وفــاده =على الرســول اللي عطــاهم شــــهاده
اسـم من الأســماء ورمـــز العبـاده =من وقتهـــا وارجــالهــا تحتفــظ فيــه
الاد عـــــون اول مسـمى تســمى =بالعبـــدلي من بيـــن غطفـان جمـــا
هـــم والكوامـــل صـــاروا اولاد عمـــا =ثــابت نســـبهم والتــواريخ تمليــــه
الاد عـــون الى نبـى كـــل صـارم =تبنى بيـــوت العـــز دون المحــــارم
مبلـــش ومتعـب حظهــم كـــان قايـم =عقــاب وابو قــرنين جــو بالقضــى فيــه
مبلش بنــى بيـــت لحــرب الســـكارى =اللي ما تــــرحم باكيـــات العــذارى
في ســـاعٍة فيها تشـــيب الصغــارى =حظــه قعـــد باللي جــواده يوديــــه
عبّـــاد ابـو قــرنيــن كــل يهــابــه =أنشــد سـليم القــوم وانشــــد شــبابه
في ســـاقته تشـــبع هزالى الذيابــه =منيعــه اللـي يمنعــه مـــا يذكيـه
وفيصـــل بذكــراه الســــقاييـن تأنــس =فــك الـذي صكــوا عليــه الفــــوارس
محسـوب وحــده عــن ثمـانيـن فـــارس =في حومـــة الهيجــا سـعد مــن يناديــه
وذولا الكوامــل عدهم حســب الأســـناد =ربيـــع عبد الله ومــزغـــت وعبــاد
وميمـــون زاد المـــوت كم منهم امجـــاد =تحمي ذمـــار القـــوم والســـيف ترويـه
جــري وابن حــريــش شـــرابة الكــــاس =كــم نـــّزلوا من بيــن الأمتــان مـن راس
في حــومــة الميـدان هـــم وابن قرنــاس =وابن شــــرار المعتـــرف له مقاســـــيه
كــان الشـــويب رمز للجـــود والطيـــب =وميمـــون عنه تصـــك كــل المطاليــــب
نزالـــة الحـــزم المطـــرّف هل الغيـــب =شـــعارهـم مـدري يفسّـــــر بـما فيـه
الاد الصعيبـــي مثلهـم مثــل ميمـــــون =ويـــم الشـــتاوى في نســــبهم يضـــدون
هـاجــد وابن درويـــش منهــم يعــــدون =ومطلـــق مخّلــص لازمـــه دون عـــانيـــه
ابـن لويحــق وابن نيــف اهــل الثـــآر =قطـــاعــة الخيفـــه علــى فــج الأزوار
تشــهد لهم بيـض الصحــايف بمـا صـــار =الكــل منهــم حقـق الثـــأر فـي ابيــه
يــوم القبايـــل شــــاركت في الحديــده =في جيـــش ابن مقـــرن روتـه القصيــــده
ابـن صغيّـــــر لــه فعـــول حميــــــده =ورزيـــق ابن مضحي شــــهوده باياديـــه
طايــع ومســعد فعلهــم مــا نســــيناه =ومعـــاود اللــي قدّمـــه فعــل يمنــاه
حنّــث على جمــع العــداء مـا يتعـــداه =ميتيـــن من جيــش المعــادي فـداويـــه
وذولا بني شــــالح ما فيهـــم ضعيفــــي =في عهـد ابن مقــرن وعهـــد الشــريفي
كـــم معتدي جاهـــم وقفــــى معيفــــي =يطلــب ســــلوم الحـق والحــق تعطيــــه
ســـاد النصـافي قبـــل وابن زهيميــــل =ســـادوا مع الحكــام جيــل بعـد جيـــل
ثم ســــاد ابن شــــلاّح ماض الأفاعيـــل =زيـــزوم ربعــه كل مشــــكل يســـويه
حــامد بنى مجــد القبيلـه مــع الضـــد =عن ديــرته خصمــه الــى هـــدده شــــد
ما يمهــل الضـد المعــادي الــى الغــد =خطــر على الأعـــداء حثيثـــه مغــازيــه
وذيـــاب ابن عــامر له آثــار وافعـــال =منه اســـــتفاد رجــال واجيـال واجيــال
كنـــز الأداب لمـن طلـب فضــل الأعمــال =نجــم الســـعد تقطف ثمــاره نواميـــه
الاد الهويمــل هــم وشــــالح بني عــــم =بيضـــا مواقفهــم بعيـــــده عــن الـذم
مــن يطلبونــه دم منهـــم مـا يســـلم =واليا ســـلم كـــل القبايـــل تهنيـــه
مزيــد عن خمســـين في حــزة الضيــــق =كـــم حـرجــة فيها يفـــك المواســــيق
اليـا غطــرّفـن البيــض خلف العشــاشــيق =والنكـــري اللي ضمّـــر الهجـــن تلفيــه
عمـوم شــيوخ مطيــــر لبّاســـة الجــوخ =فرســان في الهيجــا وفي المجلـس شــيوخ
علـــوى منزهـــة المجالــس عن اللــــوخ =ينصـــاهم اللي بايـــداة ســـــماريـه
كـان التفــاهم بينهـــم بالنصـــاحــي =عقــب التبــاعـد بينهــم بالمشـــاحــي
لين اســـتقر الــوزن بين الشــــحاحــي =والكـــل منهم وافيـــــات معـانيـــــه
اول تفــاهم صــار حــول ارن والعيـــن =قام الــدويــش وقــام جنبـه فريقيــــن
والكـــل منهم يتبعــه فـــوق الألفيـــن =وكثـــر العــدد للرجـل قـــوة تنشـــميه
شـــد الدويـــش وحــل بمويــه هكــــران =ميتيــــن عـــام امضى محمـــد ووطبـــان
ثم انحـــدر يبـــراه خيـــل وســــلفان =وخلـــى الحفـــر ومويـــه للــي نـــزل فيـــه
يبـــرى له الرخمـــان وجبـــلان والســور =قبـايــل يـــوم القســـى جالهــــا دور
كــم فارس منهــم له المـــدح منشـــــور =فيحـــان جـــاب اللي جـــواده مخليــــه
كــم لان للدوشـــــان عـــاصي ومطــــواع =اخـــوان جـــوزا مثل فيصـــــل وهـــزاع
للي يكيــل المــد يوفـــون لــه صـــاع =يشــــهد لهم نجــد المســــمى بماضيـــه
واللي دخــل في العبـــدلي مـن ربيعــــه =اهــل الحميـــا والصـــدور الوســـيعـه
آلاد وايـــــل كاســـبين الصنيعــــــه =الـــزود عن مــن هــو زبنها تعـــديـــه
ثـم قامــوا البديــن بنبـــذ الفواصــل =وتحــالفــوا في حلــف ســـموه واصـــــل
تــروي الــرواه اخبـار ما كــان حاصـــل =العبـــدلي وبريـــه قـــرّة بمــا فيــه
عشــرين شــــيخ موقعيــن الــوثيقــه =من ضمنهــم مدســــوس قــاضي الحقيقــــه
بخـــط ابن وســــميه اوضــح طــريقــــه =حلف العـــوارض والعقـــــص كـان داعيــه
الاد صنـــدل فعـــلهم يرفـــع الــــراس =حمـــوا حجيــــج البيـــت من كـل بــلاس
ميـزه لهم في مطيــــر ســـاس على ســـاس =يشـــهد لهم تاريـــخ مكتـــوبٍة فيــــه
اول مـا حــوّل مـن بريــــه البــــرازي =اللـي جــذبهم مــن جبــال الحجــــازي
ابطـــال والأبطــــال تهـــوى المغـــازي =عشـــرة بـدود بريـــه مااحد يعــاصيـــه
شــــهر من الصعـــران نايـــف ويعقـــوب =يعقــوب مـن بيـن الحمـــادين محســــوب
وابـن بصيــــص يزبنـــه كــل مطلــــوب =لعـداه ســــم وجــرح ربعــه يـداويـــه
وســـامة الجـــرفــه لهـــم دور بـــارز =بيـن القبـــايـل مثــل دور المبـــارز
تخشـــاهم الأعـــداء كخشـــي المحــــارز =ان قيــل ديحـــاني تخطـــوا مفـــاليــه
حنــا مطيـــر ان جاء نهــــار العــزاوي =افعـــالنا تخلــف كثيـــر الهقــــاوي
نخلــف حظـــاوي من نصــانــا رهـــــاوي =طـــب الكبـــود وســــم للي نعـاديــــه
اللي يعــد مطيـــر ما احصـــى عـــددها =مــن فعلهــا الحســــاد كـــل حســــدها
تجلــي اللــوايم ما تجـي فـي ســــددها =تحمي الذمـــار وشـــامخ العــز تبنيـــه
اليــا تحـــدانا من النـــاس مخلــــوق =نفخـــر بماضينـــا وناتيــه من فــــوق
ابيـض من القرطـــاس نبـــرا من البـــوق =والنــاس فيهـــم مثلنـــا دون عانيـــه
مطيـــر حنـــا اللي بعيـــد مــدانــا =ســــجل لنا صــــاهـود بعد مغـــزانـــا
اليـــا ركبنــا الخيــل جظــت عـدانـــا =شــــيخ يعادينـــا وشـــيخ نصــافيـــه
انشـــد فيافي نجــــد عـن كـل هيّـــــه =يـــوم الشــــماســـيه وفي الحـرمليـــه
ويــوم الرضيمـــه خلـــو الشــــاذليـه =وراعي الحســـاني بالحســــاني نجــازيـه
كــم معجـــزه منـــا على غيرنـــا جــات =صبحــه ومشــــذوبه وفي العــاذريــــات
صـــارت مع الحكـــام في ماضي الأوقــــات =والكـــذب عيــب الرجــل والصـدق ينجيــه
منـا افــرس الفريـــس حامي الكســـــيره =ومنـا اشــجع الشــــجعان يوم المغيـــره
ومنا اصــدق الشـــعار يـوم الحشــــيره =يـوم ان قــول الشـــعر تنقد مســــاويه
مطيـــر ياكــم خــاظوا الشـــر والخيــر =مـع دولـــة التوحيـد كـم تذكـر مطيـــر
يشـــهد طــلال الهـم ويشـــهد جبـل كيــر =وتشـــهد مناخــات المربــع وصحـــاريــه

وتشــهد لهم عانــه ويشــهد شـــليويــح =يوم اســـمر في خيلهـــم عـــذب الفيـــح
وتشــهد لهــم شــمّر ويشــــهد طليفيـــح =ويشــــهد لهـم راكــان والبحـر حـاديــه
ســبعة بيــارق كســــرة فـي الفجــاجــي =اللــي عليهـا الطيــر غـــرّد وراجــــي
بحــــرة بني عبــد الله ام المحـــاجــي =الذيـــب وايا الضبـــع منهم نعشــــيه
واصــل وعـلــوى في اللــوازم مقيمــــه =نشـــرب بهــم يــوم الضـــوامي محيمــه
وزعيــم شـــــمل مطيـــر راع العـزيمـه =صميـــدع واهـــل المهمـــات تغــليــه
ســبعة ســنين الحــرب والخيــل ســــرجا =دارة ما بين مطيــــــر والصلــح يـــرجا
ثـم انتهـــت بالعــدل في صلــح عـرجــا =ودخيــل فدغـــوش المريخـــي يعــزيـــه
اول صـــراع مطيـــر مــع روق وســـــليم =فــي عاليــة نجــد المســـمى مراســــيم
من الحجــاز اليا القــرى مرتــع الريــم =والكــل منهم عـــز ربعـــه يــذريـــــه
وثــاني صـــراع مطيـــر مـع ال هـــذال =اخــوان بتــلا حاربوا خمســـة اجيــــال
ثـم مـع العجمــان في حــربهــا ســــجال =وابن عريعـــر مرتـع الصيـــد حــاميـــه
وثالث صـــراع مطيـــر حـــرب ابن هــادي =جــاء مــن تهامــه معــه مثـل الجـــراد
ياطـــا شـــناخيـب الوعـــر والقصـــادي =يســـمع صـدى فعلـه على مـن يفاجيــــه
ورابــع صــراع مطيــر جاء مع عتيبـــه =ايــام وليــالـــي قضتهـــا عصيبـــــه
منـــا منهـــم كـــم تحـــت النصيبــــه =والكـــل منهــم يشـــكي اللـي يواليـــه
واخـــر صــراع مطيــر مع شـــمر وحـــرب =اصهــار لنـا والمنــازل علــى قــــرب
حديـــد حـــد مـن شـــمال ومــن غـــرب =وكـــم خيّـــر راســــه يفكـــه بناخيــه
شـــمر مرويــة الســـيوف الســـناعيـــس =علـى ظهــور الخيـــل جونــا كراديــــس
وحنــا الى منــا قضبنــا المتـــاريـــس =طريحنـــا منهـــم يضيـــع الـــدوا فيـه
مطيـــــر كــم خاضـــت بحـــورٍ غـــوارق =نالوا من الشـــهره كمــا نــال طـــارق
كم شـــيخ قــومٍ كان يقـــدا البـــوارق =ســــيوف علوى شــــرعت في عـــلابيــــه
زالــت تـواريـــخ وهـــذي تـواريــــخ =واهــل اللــوازم فاللـــوازم منـاويــخ
وكــل وقـــتٍ لــه ســـلاح وصــواريــــخ =ومــن لا يعـــرف الصقــر لاشـــك يشـــويه
كانــت كواكــب وقتهــا اشــهر كواكـــب =تحمــي بهيبتهـــا بيـــوت العناكــــب
يـــوم القبايــل تدّحـــم بالمناكــــب =يـوم الخـوي والجـــار والظيـــف تعنيــه
واليــوم فينـــا مشـــهريــن الأســــامي =لهــم مكانـــه مــع رفيـــع المقـــامي
فيهــم علــى ما قيـــل حـــرٍ قطـــامي =لاجيــت تبي منه كـــن انـــت تعطيــــه
وفينـا مـن الشـــعاّر من يحكــم القـــاف =حنيــف وشــــليويح في قـــول الأنصـــاف
يشـــهد لهم مســـتور ومطلـــق وصيـــاف =وحكّـــام نجـــد اللي تفســـر معانيـــه
يدعـوا بربــع مطيـــر ويمثلـــوا ربــع =والــذب عن عــرض القبيلــــه لهــم طبـع
والشــــعر له رونـق مع الماهـر الســـبع =ســــلاح ســـلم وحـــرب للي تعــــاديــه
وســعد ولد ســـلطان مكـــرم هل الكيــف =رد البـــرا للــي يغنــي الغطـاريــــف
هو يحســب ان مطيـــر تصبــر على الحيــف =مـن لا تــــدرا جــاه من لا يــداريـــــه
وفيهــم علـى ما قيــل حســـن التحـــرف =ينفــع لربعـــه والصــــديق المطــــرف
حــــرٍ عـــن الـــزلات دايـــم مطــــرّف =ابــو ذيـــاب اللي بعيـــده مراميـــه
متعـــب كما البلســـم مجـــرّب ومعـــروف =يــدري به اللي جـــاه في حــزة الخـــوف
وعنـد الأقــارب والبعــض غيــر معــــروف =كالعـــود بارض العـــــود ما يعتنى فيـه
وكـم قايــدٍ منا بـــرز فـي المســــيره =رجّــال دولـــــه فيــه عـــرف وبصيـــره
ســيفٍ لــوالي الأمــر فــي كــل ديـــره =وتشـــهد مهــاراته بوضــع الثقــه فيـه
مطيــر تعــــرف رجالهـــا بالجســــامه =بطيبـــة محيــاهـم ومعــها ابتســــامه
هــذي علامتهـــم وازيــــدك عـــلامـــه =تشــــعر بأمـــان الرجــل حزة تخاويــه
كــل القبايـــل تفتخــــر في فعالهــــا =وســـط المجالــــس لـو ماحــدٍ يســـالها
ومطيــر تفخـــر الى حضــرها مجـــالهــا =الكـل منهــم فعــل ربعــه ينشــــميه
اليـك قطـــره من بحـــر مــا ذكــرنـــا =يـــوم اعتـــلاج التــرك ياكــم ســـهرنا
كـم ســــطرت كتــب الكياتـــب خبــرنــا =وكــم شــــيخ تــروى قصتـــه ما نســميه
ولا فضــل لمطيـــــــر القبيله على قــوم =مافيـه مخلــوق مـن النقــص معصـــــوم
ومـافيـه قــوم الا لهـا الطيـب مرســـوم =ســـارت به الركبـــان تروي حكـــاويـــه
عشـــرين عــام ابحث مع اهــل النوايــر =واســـوق مــن مالــي عليهـــا بشــــاير
والعـــذر للي مـا ذكــر من عشـــايــر =وســـعي بذلــت وكــل خـاطــر نداريـــه
واشـــكر جميـع اللــي هدفهـــم هدفنــا =هــذي الجهــود دفاعنـــا عن شــــرفنـا
للـي قضـى عمـــره وهـــو مــا عرفنـــا =ولا فيــه حـق الا نقصـــه باثــاريــــه
الفخــــــر لله ثــم لابـــن الســـــعودي =بالشـــرع ليّـن شـــامخــات الحيــــودي
اضفـى علينـا الأمـن وارســــى الحـــدودي =واللي يحـــزم الــراي يحصـــد قوافيـــه
واليـــوم صـــارت نجـــد لنا مبـــــره =ننـــزل مـن الحـــره الـى اقصى المجــره
مـن فضــل ابـو تـركي وخيــره وبـــــره =الله علـى فعــل الحســــاني يجـــازيــــه
يانجـــد تفخــر بـك جميــع المطابــــع =اســــمك يشــــرّف طابعــــه بالأصـــابـع
الله يجيـــرك من شــــرور الـــــزوابــع =جـــودي بمخـــزونك وتــاج الفخــر فيــه
هــذي ميـة عــامٍ قضيتــي علــى العـــز =في ثوبــك الثالـــث مطـــرز من الخــــز
ثــوب الســعاده والشـــرف غـالي البـــز =دمتــي لمعشـــوقك ودامــت مســــاعيـــه
عبدالعزيــــز اللي بســـــيفه قهــــرها =امّــــن منافـــذها وخــــرّج دررهـــــا
لبســـت حـللهـــاثم شــعشـــع قمــرها =نجـــد العــذا قــامت تبســــم فيافيــه
كــم عاشـــق يهـــواك بليـــا خســــاره =حتى انتضــى بالســـيف نمـــر النمـــاره
وامهــرك حــاض المــوت والمــوت زاره =اخلـص بــدينه لك بعــد ما عشــــقتيــه
واللي ســـلك دربه من الأســـد الأشــــبال =عقبــان نجـــد اللــي لهــم مجـد وافعال
تضــرب بهم فـي وقتنا اليــوم الأمثــال =زبــن الضعيـــف اللـي عــدوه مجليـــــه
خيـر الخلف لخيـر الســلف حكم الأســـعود =يقـال بيت الجــود ما يعــــدم الجـــود
كالطيــب طيــب العــود من فاخــر العــود =مثـل الــذهب معادنـــه من مجــانيـــه
قلتـه وانـا مانــي بشـــاعر معـــاعي =ولاني على اهــل الشـــعر رافع شــــراعي
هـــاض الضميـــــر وكـــان داعيـه داعـي =وقلــب العنــا موجـات الأفكـــار تدعيـه
هــذا وصلـــوا يامـــــلا كل ســـــاعـه =على الرســـــول اللي بـرز بالشـــجاعـه
يامـر بوصــــــل الرحــم وترك القطــاعه =والله بفضلــــه جـــاريـــاتٍ حســـــانيـه

بسم الله
اللي يعد مطير ماحصى عددها...

اخوي الحسام
اختيار رائع و ملحمه جميله جدا

اشكرك على هذا الاختيار

نريد المزيد

تقبل خالص تحياتي
و احترامي

.........
........................

حسبي الله على شيطااااااااانك يالحسااااااااام
ماعلمتني قبل تنزلهااا باسبوع
من شااااااااان امرن نفسي على القرااااااااءه
ياخوك قريت لين تعبت الله يخلف عليناا راحت اللياقه

............

ونعم بحمران النوااااااااااظر
من غير قصور في باقي القباااااااايل
صح لسان قايلهااا
وتسلم يمين ناقلهااا

الف شكر لك على ذوقك.
السيف

اخوي الغالي

الحسام

اسعد الله ايامك بكل خير

ياســـــــــلام ياســــــــــــلام

والله يعطيك العافيه على هذا النقل وعلى

هذه الملحمه الشعريه الراااااائعه

سلمت ودمت يابو ابراهيم والنعم والله بمطير

سلمت وسلمت يداك يالذيب

وتقـبل تحـياتي

اخــوك فــزاع

يعطيك العافيه أخوي الحسام ،،،


والله والنعم فيك وفي قبيلة مطير (( حمر النواظر ))


وصح اللسان من قال هالأبيات ،،


لك أرق تحيه ،،


تناهيد

بسم الله الرحمن الرحيم

الليدي عمشى

السلام عليكم ورحمة الله وبركاته

يا هلا والله وغلا فيك

والله يعطيك العافيه على جميل ردك وعلى حضورك السريع

بارك الله فيك وفي اخلاقك

والله يعطيك العافيه

اخوك

الحسام

مشكور اخوي الحسام على هالنقل الاكثر من رائع

والنعم في حمران النواظر


من غير قصورٍ في غير القبايل


سجل اعجابي بالقصيده


تقبل تحياتي


مخاوي الجرح

بسم الله الرحمن الرحيم
الاخ الحسام
السلام عليكم ورحمة الله وبركاته
الف شكر على هذه القصيد الجميلة وننتظر المزيد

مطير حمران النواظر وبدون قصورفي بقيت القبايل

تقبل ارق التحايا
اخوك الوطيبــــــــــــــــــــــــــــاني
واسف على المقاطعه نظراً لظروفي
اتعذر والمعاذير نص المرجله *** لاحيتاً ماتقبل العذر ماتستاهله

بسم الله الرحمن الرحيم
السلام عليك ورحمة الله وبركاته


اخوي الغالي

الحسام

اسعد الله ايامك بكل خير



الله يعطيك العافيه على هذا النقل