موضوع خاص بالبنات ماعدا بنت البحرين خوفا عليها

اولا الموضوع خاص بالبنات
بنت البحرين انا ماقصد المناقر لكن خوفا من ازمه نفسية تصيبك لاسمح الله لصعوبة المفردات الموجوده

للأمانة الانترنتيه :الموضوع منقــول
مسرحية ابطالها بنات

اليوم: الاربعاء

الساعه : 10 وربع صباحاً


المكان : جامعة الملك سعود ، رصيف بوابه خمسه ( شارع التخصصي

جت وحده من البنات تطامر ومعها كروكي تقول لنا

ان فيه حفلة طق طقه وصجه يسمونها بعض الناس الي مسوين فيها

عيال نعمه ( دي جي :D) وهذا يرجع للناس الي داجين فيها مايدرون

وين ربهم حاطهم فيه :D:D ، بيسوونها مجموعة بنات .. بكره الخميس

وعازمين كل من هب ودب عليها ببطاقات وبدون بطاقات وبما اننا

ملاقيف ماقد شفنا خير ولا ندري وش تطلع هالدجه الي عندهم قررنا

نروح نحفل معهم ونشم شم اخبارهم ونشوف وش يسوون فيها...

وعشان مانتفشل ولا احد يطردنا قلنا بندخل و معنا ترامس القهوة

والحلى ( مسوين فيها سنعات ) عشان ماحد يشك فينا اننا من

الاقلاع وناوين على الفضايح ، ومن الصبح وحنا نخترش ونخطط شلون

بنراقب الاوضاع من كل الجهات وقمنا نوزع الاعمال كل وحده والجبهه

الي تستلمها عشان مايفوتنا شي ، وطبعن بعد الطقاق الي صار على

الي تركب عند الباب ( سواتهم كل مره ) رحنا للحفله الموعوده وهذي

العلوم ( علوم ولا رياضيات ) جبناها لكم عشان تعرفون اننا لي وعدنا بشي وفينا



المشهد الاول
الخريطه

الموقع عباره عن بيت اقرب ماينقال عنه انه استراحه على ثلاث شوارع بواباتها مفتوحه على الاخر ، زحمه غير طبيعيه، طابور سيارات بدون نهايه ، بنات ينزلون منها بدون عبايات ، حرس او زي مايسمونهم ( بودي قاردات ) في كل مكان ، اضائات صارخه للمكان من برا ، واصوات اغاني تردح مختلطه بصراخ للبنات !!

ريم : سوير وين حنا فيه ؟

ساره او " سوسو" : وش دراني الظاهر طلعنا على الحدود

ريم : هااااو وش حدوده انتي الثانيه الخريطه حقت البيت مهيب معتس

العنود : لا معي انا والهقوه اننا مضيعين في المكان

ريم : الشرهه مهيب عليكم الشرهه علي الي انا معطتكم وجه وشايلتكم في الونيت حقي

هيوني :ايه الي يسمعتس الحين انتي وهالبي ام .. وش ونيته انتي الثانيه هذا وقته خلينا نشوف وين شطح بنا هالسواق
سوسو : ياااااااااربيه ابي ارجع البيت <<-- تمعط في شوشتها من الحره

العنود : اقول اهجدي لا اصكتس كف انتي الثانيه الخريطه ماشين فيها صح ماضيعنا ولاش هذا هو المكان

ريم :اقول جيبي اشوف وش يفهمتس انتي في الخرايط اخبرتس راسبه في الجغرافيا اصلن

هيوني : ايه والله هذا هو البيت ماضيعنا .... وشذا اجل ؟؟ هو صدز الي انا اشوفه ؟
اقول يابنات وحده منكم تقبصني , اااااااي <<-- قبصوها كلهم


المشهد الثاني
في WC

الدخان مالي المكان ..زحمة بنات داخلين طالعين .. اشكال غريبه .. وملابس اغرب

ريم : وشذا الضباب يابنات حشى لندن مهوب بيت ذا

سوسو : واااااااااااو طالعوا يابنات فخفخينا

العنود : لاتدخنين .. قصدي لاتدوخين علينا <<-- متأثره بالجو العام

سوسو : والله مروقين شكلنا في مقهى الشلال

ريم : اقول يابنات من ذي الي مرتكزه فيذاك ؟

ليلو : هذي خويتنا راعية العزيمه (نهنوه) ماعرفتيها ؟
العنود : نهنوه !! وش صار فيها ورا شكلها تسذا ؟ ومن الثنتين الي معها ؟!

سوسو : ذولي البودي قاردز حقاتها يالقرويه

ريم :وش بودي قارداته ياكافي !! ذولا بنات زينا يابنات .. اقول شكل نهنوهه جايبتهم ينتقمون مننا

العنود : كلها بسبتس ياريم شوفي العضلات ومير اسكتي ياما هزئتيها وعكرتي لها .. استلمي شكلهن والله بيستفرطون فيتس

ريم : ( دقت اللطمه ) تراكم ماتعرفوني .. الا ورا تنورتها صايره تسذا تقولون غسلتها وشمرت لين صارت فوق ركبتها وقبل السر بشوي خخخخخخخ

العنود : خلك من التنوره الا طالعي ذا الذنب الي لابسته كنه ذنب قطوه .. وين اهلها عنها مايقولون لها شي

سوسو : ماتلاحظون ان مافيه احد اخذ عباياتنا ولا حنا الوحيدين الي جايين بعبي في هالحفله !!

ليلو : اشووووف البنات ينزلون من سياراتهم بدون عبايات ، بعذر البودي قارد الي عند الباب قعد سنه يدقق في اشكالنا قبل لايدخلنا .. شاف ذا العبايات وقال اكيد عيال متنكرين يبون يدخلون !!

هيوني : وين الدبليو سي بنات ...؟

سوسو : اوووف والله هيوني مهيب هينه تحتسي لغات
وش تبين فيه انا ماقلت لتس تسوين كلش بالبيت !! ولا ناويه تفضحينا

العنود : ثاني مره اسألي عن الباث روم ولا ارفعي اصبعتس وحنا نفهمتس

** وفي الـ WC **

ليلو : بنات من ذي ؟

ريم : اتركي عنتس اللقافه هذي وحدتن متضايقه من نفسها مغير تطير حواجبها في المرايه

العنود : وشذااااااا عمى ..الحقوووو يابنات ... البنت قامت ترقم

ريم : ليه شايفتها جدتس بعرس في ديرتكم بالنعيريه خخخخخخخ

ليلو : هذي ياقراوى حرررركات ذي مسوي روحها معجبه فيتس ياريم عشان كذا قامت تتميلح قدامك وتحاول ترمي الرقم

سوسو: هاه ياهيوني كل ذا دبليو سي بوش الابن

العنود : هيوني اخلصي ولا جاز لتس وماتبين تطلعين ؟ حنا جايين هنا عشان نحتريتس فيذا

هيوني : هاه خلصت .. مشينا


[

المشهد الثالث
في حلبة ال DJ

الصاله مظلمه ،الاضائه خفيفه وملونه ، والديكور

على شكل ادغال وغابات، الاغاني عاليه و مزعجه بشكل عنيف ..

البنات مجتمعين بوسط الحلبه ( يتكسرون ) و( يستنزلون ) من كثر

اندماجهم بالرقص .. وشوفت الملابس ورقص البنات بشكل متقارب ..

خلا بوهة بنات اليوم تطير ولا تعرف توقع .. وضاعت الخطط المتفقين عليها

العنود : وشذااااا .... يمه ...... يمه ....... سموا لايدخلكم سكني .... وشذا الظلمه؟

سوسو :هاااااو امداهم قضوا ؟ ليه مطفين النور ؟؟

هيوني : لحوووول ذا الخبله ليتنا ماجبناها شكلها والله بتفضحنا .. اقول مادام السواق برا خليه يرجعتس

ريم : يابنات امسكو اعصابكم واسمعوا .. شكلنا بالجنقل لاند

سوسو : وش جاب الجنقل لاند بالرياض ... لاحنا بكيب تاون الظاهر

ليلو : احسن شي القراوى مايحضرون حفلات .. يقعدون يتعشون مندي ويشربون لبن ويرقدون في بيوتهم ... ذا الديكور الله يسلمكم على شكل ادغال

هيوني : وش جاب طاري المندي !! ااااخ يالقهر عندي فستان جلد نمر يهبل ليتني لابسته كان صرت طقم مع الديكور

ليلو : لاحمار وحشي احسن ، ناويه تفشلينا انتي ، شفتي احد هنا لابس فستان ؟
كلهم تنانير شامره وشورتات وفنايل مشققه من كل مكان ماتستر شي !!

ريم : اجل ليتني لابسه لبس ولد اخوي بالتمهيدي مقرش ومقرش مادريت انهم كلهم لابسين لبس حيوانات

سوسو : اقول ريم وش جايبها ؟

العنود : سمبا .. قصدي ريم .. البنات وش يدورون ؟ وش ضايع لهم مغير يخترشون في هالظلمه

ريم : شكل طايح لهم ريال ويدورون عليه خخخخخخخخ

ليلو : الحين يشغلون اللمبات الخافته لاتفضحونا

ريم : تدرون شكلنا احلى البنات في الدي جي ( يازين الثقه ) ليت امي تجي تشوف والله ان شعري اطول شعر هنا وكل الي هنا مقلدين قصة بيتسهام لاعب نادي النجمه

العنود : اخاف معهم قشرة في روسهم وقالوا نحلق شعورنا ونفتك كود انها تخف شوي خخخخخخخخخ

هيوني : طالعي هذي من جت والجوال باذنها ولاصقه بالجدار شكلها تترجى في ابوها يخليها تقعد شوي

ريم : كثري منها .. ابوها .. خخخخخخخخ

سوسو : ياحبكم للحش يمكن تكلم الماما تقولها ماراح اتاخر تعرفون الامهات هالايام قلق ×قلق

ريم : كثري منها انتي الثانيه ... قالت امها خخخخخخخخ
ما احب احتسي في الناس ولا اجيب طاريهم بس هذي حرمة اعمال شغل نظيف × نظيف ( نظافه تسحر ) توفق راسين بس بديكور جديد

سوسو : وين ليلو اختفت ؟ لاتصير ضاعت بس .. همن وش يفكنا من امها

العنود :ياريم تراها امانه في رقبتس روحي دوريها

ريم : وين ابلقاها فيه الحين وسط ذا الناس الي تكافخ هنا .. حشى مهوب رقص ذا والله مابعد بعت عمري عشان امر في وسطهم ثمن يرجفوني والا انا رايحتن فيها مع هالخرشه الي يخترشونها

هيوني : الحقووووو يابنات مهيب ذيك هي ... طالعوا ليلو واقفه مع ولد .. ولد !!!!
الخالق الناطق سعود الدوسري .. معقول عازمينه فيذا ؟! لا مستحيل طيب شلون دخلوه !! انا قايلة لكم محناب في الرياض

ريم : البسوا عبيكم يابنات الدعوه فيها عيال والله مانقعد

العنود : اركدي هذي هي جت وجتبه معها ...وش تبي ذي الله يقطع الي ياخذ معه بزران

سوسو : والله الي معها كشخه

هيوني : شف .. حنا وين وذي وين

ليلو : بنات سلموا

ريم : مابقى الا هي نسلم

العنود : ( قامت تتنافض ومدت يدها مع الربشه)

صاحب الصوت الرخيم : هلا روحي ... كيفكم ؟
ريم : ......... ( طايرتن بوهتها ) .....

العنود : احم .. خفي على مصابعي الله يعافيتس

صاحب الصوت الرخيم : اوه اسفه عيوني عسى ما عورتك ( تبتسم وتطالع بنظرات غريبه )

سوسو : ( لصقت في ريم ) والله ما اسلم

صاحب الصوت الرخيم : اجل اخليكم تندمجون في الحفله ( تغمز ) ... باي

هيوني : ليلو ووجع من ذا الي جايبته لنا انتي ووجهتس

ليلو : الله يفشلكم يالمشفح هذي لينا الي في الجامعه معقول ماعرفتوها

ريم : ( لاتزال بوهتها طايره ) ليلوه ماقلت لتس انتس بزره على هالمشاوير وعقلتس مايستوعبها مالقيتي في الدجه كلها الا ذي

ليلو : والله هي الي نادتني عشان نرقص

ريم : هي تبدا تسذا ..بعدين تنتهي بـ( *** ) انتبهي على نفسك ولا رجعتس البيت

ليلو : من زينتس انتي وهالفياغرا الي برا .. شاحذتها من ابوتس اسبوع واخرتها سرقتيها منه وهو مسافر

ريم : لا ياللي ابوتس مايطلعتس الا بالرولز.. قومي ضفي وجهتس ولا تحركين من جنبي

ليلو : ريم انتي شاربه شي ؟؟ شلون اضف وجهي ولا اتحرك من جنبتس !!

ريم : اقول اجلسي فيذا هذي مانقدر عليها البنيه مسترجله تطق حديد وتبل ريقها على باور هورس و12 بيضه وتختم بايس شراب الطاقه ( مقابل الدعايات ) يكفي اني عاصبه راسي من هالمسجل الي يخترش وهالقرقعه والاشرطه المضروبه الي شكلهم شارينها من البطحا

هيوني : هذي سي ديهات مسوينها مخصوص مكس

ريم : فكس ؟؟ ايه والله اني ابي فكس احطه على راسي كوده يخف شوي

سوسو : ريم هذي مكس ريكي اقليسيس على انريكه مارتن و جنفر ديون على شكيره لوبيز وحسين الجسمي ( ياشين الي يتفسلف :confused

ريم : ما اقول الا الله يرحم ايام زبيده وفرقة الشاطئ على الاقل كنا نعرف وش يقولون

ليلو : ياناس حنا جايين ننبسط ولا نتنكد ... خلاص فكونا

العنود : وشذاااا القرف ... ريم طالعي اشكال البنات وهم يرقصون تسن ماسكهم كهرب

ريم : بلا والله من هالاغاني الي ترج الراس وربي ساعه زياده ونصير من الصم

العنود : وشذا حنا داخلين مصلخ .. وشذا التمصلخ وين حنا فيه بعدين وراهم لازقين في بعض كذا .. من ضيق المكان الحين!!

ريم : شوفي ذي الله يشفيها شكل معها صرع قامت تتنافض

سوسو:خخخخخخخ الحمدلله والله ان دمك خفيف هذي اخر موديل لرقصة عطيات في الفيلم العالمي الحاصل على الاوسكار سيف ذا لاست دانس بطولة محمود يس وستيفن سبيلبيرغ وش اسوي فيكم معدومات الثقافه ماشفتوه العام في مهرجان كان ؟ ( يازينك ساكته )

ريم : كان؟؟؟ كنها ماره علي في القواعد ؟؟ مهيب هي يم الحوطه ؟؟

سوسو: ريم وش حوطته .. كان في شمال المملكه بالحفر

ريم : عطشت .. ابي شي اشربه

ليلو : بروح اجيب لتس

العنود : اقول اهجدي لا اخمتس بكف الحين ماصدقنا لقيناتس

هيوني : يابنات فيني رقص خلوني اوريهم الرقص الي هو مهوب رقصهم

ريم : اقول اهجدي انتي بعد تروحين ترقصين ثمن يجيتس شي مثلهم و نبحل فيتس
ان رجعتي بيتكم ارقصي لين تقولين بس

العنود : صحيح ليه كنا نزعل يوم يقولون علينا ناقصات عقل ودين ؟؟ الحين عرفت اننا فعلنا ناقصات ... خلونا نسري بس

سوسو : وش نسري الساعه توها 1.55 توهم مابدو الهبال اصلن

ليلو : استنوا ياقراوى فيهم مفاجأه

هيوني : وش مفاجأته

ليلو : يقولون بينتخبون احلى وحده في الدي جي ، واشيك لبس ( يعني مقلعه ) وبست دانسر

العنود :بست دانسر ؟؟ ذا ينشرب ولا وشو ؟

ريم : الا المفروض يختارون اكثر وحده متستره فيهم مهوب يقلدون مثل الي في ملكات الجمال الي في البسي واقلعي بعدين اقلبي يور فيس ... ومتى انشالله بيعلنونه ؟

ليلو : الساعه ثلاث

العنود : ها ها ها ..هذا الرقم غير موجود بالخدمه
ياحبيبتي الي شايفتهم هنا ماوراهن واحدن زي ابوتس وابوي اغلبهن ماعند ابوهن عقال

هيوني : وش عقاله !!

ريم : العقال شي اسود يستخدم للزينه ويوضع فوق الراس وله استخدامات تربويه اخرى لايعرفها الا من جربها

سوسو : اقول تبون نمشي مشينا ولا خلونا نقعد زي العالم من يوم جينا وانتو مافيه شين عاجبكم

هيوني : ريم طالعي ... عرفتيها ذي ؟؟

ريم : وعووووووه ذي الدبا الهرشا الشرهه الي شبشبها بميتين دولار

سوسو : من الزين ماتغلطين فيها

ليلو : اول مره اشوف شورت مقاس عائلي خخخخخخخخخ والله اني راحمه الشورت

العنود : تدرون انها غاثتني تقول ان في امريكا سبع انواع من الفشار ..طيب واذا صار

ريم : لا تسمعكم والله ان تقعد عليكم ولا تشيلها الا تريله ، خلونا نطلع قبل ماتقوم ترقص ثمن تطيح الممكله والفيصليه ونعرف منهو المتسبب في احداث سبتمبر خخخخخ

سوسو : مدري ليه نهنوه عازمتها .. شكلها ناطله وجهها ما انعزمت ( زيكم )

هيوني : حطو رجلكم بس لاتجي وتبربس علينا بسوالف امريكا وشبشبها الي بميتين دولار ماكن سافر الا هي

ليلو : ترى الاسبوع الجاي فيه دي جي

ريم : وش دراتس ؟

ليلو : شوفي بنات الـسـ .. والمـ ... يوزعون بطاقات حفلتهم

ريم : من قال انكم بتروحون مره ثانيه بعد هالدجه الي صارت اليوم
يالله قدامي على البيت لي ساعه وانا اسحب فيكم

COLOR=indigo]المشهد الاخير
في الستريت[/COLOR]

بنات اليوم كانوا هم الوحيدين الي طالعين هالوقت اما باقي السيارات فكانت لبنات توهم يوصلون لمكان الدي جي او انهم طلعوا من الحفله (مشوار ) وبيرجعون في وقت متأخر!! ... المنظر الخارجي للبوابه كان مزحوم مثل وقت الدخول .. لكن الفرق هذي المره انه كان مليان شباب من مختلف الاشكال والملابس والسيارات !!

العنود : هااااااااو وش كل هذااااا .. فيه مباراة يابنات ؟؟

ريم : ماخبرت فيه ملعب حولهم .. ليه ؟

العنود : شوفي المشجعين برى وشذا الزحمه

هيوني : لا ذولا جايين ياخذون خواتهم

ليلو : لا جايين يقدمون على وظايف سعوده ومايقولون ؟! وش خواتهم .. ذولي بوي فرندز كل واحد جاي على موعد مع الي يعرفها وجالس يحتريها

ريم : وش لقفنا حنا يوم نجي لهالدجه!!!!
روحي شوفي خورشيد وينه تراه زيهم طاق الشماغ الي يشوفه يحسبه سعودي

العنود : وين ابلقاه فيه .. شلون بعرفه وسط هالشباب والزحمه ؟

ريم : دوريه تلقينه اطخم واحد فيهم خخخخخخخ

سوسو : شوفيه مغتر بهالفياغرا يغاير فيها الشباب .. والله لو انها سيارته الحين

هيوني : من قده لابس ثوب سعودي وكاشخ

خورشيد : ريم ماما وين انتا فيه ليش تاخر بابا بعدين فيه مشكله ماما مشكله انا مافي نوم مافي اكل انا في برد هنا

ريم : لا تعال طقني احسن

العنود : شكل وحده رافعه معنوياته .. الله يهديهم مايفرقون بين السواق ولا عمه المهم وش نوع سيارته !!

ريم : خورشيد كم مره اقولك انا مافي ماما .. انزدلع برينق ذا كار كوكلي

خورشيد : اوكي مدام دقيقه في اجي

هيوني : تعرفون كم الدقيقه في حسابه ؟؟
سوسو : اقول خلونا نجلس لين يجي

ليلو : وش رايكم بالمره تبسطون بطراطيع عند الباب ... وش الي تجلسون تبون تفشلونا

العنود : وش تبينا نسوي يعني نقعد مرتكزين كذا عند البوابه قدام كل هالشباب مغير مطيرين عيونهم فينا بسم الله علينا

ليلو : مالقوا الا انتي مالت عليتس يطالعونتس انتي وخلاقينتس ..كلهم لهم ربع وعارفين من يحترون مهوب على حاجتس

هيوني : خلاص انتي وياها من يوم جينا وانت مغير طقاق ماصارت حفله ذي

ريم : يالله هذا خورشيد جا امشوووو .. لاعادت من حفله

** الساعه كانت 2 وقت ما طلعوا ..وماوصلو البنات لبيوتهم الا الساعه 4 من الزحمه **

-اغلاق الستاره –
-نهاية المسرحيه –
[

هي الموضه الدارجه هذي الايام بهبل بين البنات .. يمكن كانت موجوده من قبل بس على شكل خفيف ، والي نلاحظه البدع والبلاوي الي تصير في هالحفلات من ملابس وتدخين و استرجال و مواعيد ... و و و الخ واشياء كثيره ماقدرنا نتكلم عنها بالتفصيل عشان مايزعلون مننا مشرفات الاسره
حنا هنا نتكلم عن فئه معينه من هالحفلات وهذا مايعني اننا نشمل لان فيه حفلات DJ يسوونها بنات وتكون محترمه جداً وتحت اشراف اهلهم المباشر .. حنا ننتقد الفئات الثانيه والاشياء الي جبنا لها طاري بشكل عام .
الموضوع .. وان كان الفلفل فيه زايد لكنه واقعي والمواقف مأخوذه من حفلات صارت ومعروفه عند اغلب البنات .
بالمختصر مافيه طريقه ثانيه لاخراج مثل هذي الحفلات ومايصير فيها الا كـ مسرحيه ابطالها بنات ؟!
الحين مابقى قدامك الا حل من ثلاثه
1/ انك تشارك في البطوله زيك زي غيرك
2/ انك تصير متفرج فقط وبمجرد انتهاء المسرحيه ترميها ورا ظهرك
3/ انك تلعب دور المخرج وتعدل في السيناريو

الموضوع شكله رائع..ولي عوده ان شاء اللة

الموضووووع يجننننن

بس ماكملته وصلت لــ wc

لي عووووووووووووووودة قريبة

والله الموووووووضوع طوييييييييييييييييييييييييييييييييييييييييل

وبعدين اقراءه وارد

مع تحياتي

امواج المحيط

مووووووووووون <<<<<< مهوب كنه كريزي بوي

كريزي جيرل

هلابكم جميعا
ثانيا ايش الكسل هذا انا قريته دفعه وحده

انا عاذركم يمكن مافهمتوه

بصراحه الموضوع رائع..لكنة طويل بعض الشيء
لذا ا مهلني بعض الوقت...


امووج

فريت راسنا فر يامرتاد

كلمة مفهومة وعشر طنشت فيها