شاعر الاسبوع .. الامير .. خالد الفيصل ..

بلاني بلاه الذي به بلاني = وانا قبل اعرفه حياتي هنيه
بغاني و جيته على ما بغاني = دعاني على ماردٍ للمنيه
ولاني بحبه وحسنه ولاني = وهو ماتهيّا وحالي رديه
جفاني عقب ماملكني جفاني = الا حسبه الله نواني بنيه
غواني وذي عادةٍ للغواني = يخطون من لايعرف الخطيه

وقف ترا لي و الهوا و انت ميعاد = يامن جمع بشفاه جمره و ماها
طق اللثام ولاتبيّن لحسّاد = لا لاتخلي كل عينٍ تراها
في شفتك جمرٍ حمر فيه وقّاد = اغليت انا لون الجمر من غلاها
اخاف من واهج شفاياك يزداد = يحرق ورود الخد واهج سناها
وردٍ على غصن ٍ من البان ميّاد = وردٍ نمى في ظل رمشٍ كساها
رمشٍ على جال النواعيس صياد = ذبح القلوب اللي تعرّض حماها
عقلي و قلبي منك في حرب و جهاد = و اشوف دقّ القلب ميّل اخطاها

يا سحايب سراة ابها تعدي شمال = و استعيري دموعي سيّلي كل وادي
غطي ارض الحبيب بالندى و الجمال = مثل ماهو مندّي بالمحبه فؤادي
ارعدي يا سحابه فوق هاك التلال = صوري له حنيني عقب طول البعادي
ولّعي يا سحابه بالسما كل جال = مثل ماشعل فوادٍ فيه قدح الزناد
مير اشوف التسلي عن هواه استحال = وقفي يا سحابه حمل الاشواق زادي
دوك عيني وقلبي دوك بعض الخيال = دوك كلّي تبعتك مابقالي قعادي

سايق الخير ساقك يم عاشق جمالك = لو تأخرت ابصبر لو هي الفين عام
اسفرت و انورت من يوم شعشع هلالك = فز قلبي لفزك ياظبي العدام
انزل القلب و آمر مابه الا حلالك = و اشهد انه حظيظ اللي غدالك مقام
مايسد بمكانك غيرك احد بدالك = بانيٍ لك قصور و بانيٍ لك خيام
عقب رمضا زماني جيت ادور ظلالك = بل ريقي بقربك عقب طول الصيام
كل شي تبسم يوم لامس دلالك = كل نارٍ كوتني منك صارت سلام

مادام قلبي لك شفوقٍ و ميلاف = وراك ياخلّي قليل المروفه
قلّي عسى مابه على الخاطر خلاف = عسى حبيبي ماقصر دون شوفه
لا .. لا تعسر القلب في كل محراف = واحذر يجي عقب الموده حسوفه
دوك الدموع بحاجر العين وقاف = لا انت بماسحها ولاهي ذروفه
علّقتها يا معلق القلب باتلاف = و الخاطرك راحت حياتي كلوفه
لي قيل حبي لك جنون و اسراف = قلت اه من يملك لقلبه نكوفه
عزالله اني للمخاليق عيّاف = الا انت ياللي هيّمت بي طيوفه
الله كريم يبدل الجور بانصاف = يجبر فؤادٍ موجعاته ظروفه

يا ضايق الصدر بالله وسع الخاطر = دنياك يازين ما تستاهل الضيقه
الله على مايفرج كربتك قادر = والله له الحكم في دبرة مخاليقه
حلو العيون استهانت دمعها الحادر = كف العباير حزين الدمع ماطيقه
حسايف الحزن يغشى وجهك الطاهر = و الورد في وجنتك حرام تغريقه
يفداك قلبٍ على ماتشتهي حاضر = يفداك باللي بقالي من معاليقه
مافات خله ولاتهتم من باكر = و اغنم من اليوم ماساقت توافيقه

ياولد و ان طرالك لاتسافر بعيد = ماهقى انك على فرقا الحبايب صبور
لاتغني ترى الفرقا عناها شديد = و الهوى تحت ضلعانك باني له قصور
كان قلبك تعنّد و الحبيب عنيد = في مهب الهبايب ضاع ريح العطور
كم قلبٍ تندّم و الندم مايفيد = اغنم اليوم واحد و حاذر لا الليالي تدور
جدّد العهد و اجعل كل صبح جديد = فيه للحب لفته و ابتسامه و نور
و اترك النوح خل الصوت فيه تغريد = و انزع من الثرى مع صادحات الطيور
كل شمسٍ تبين خلها شمس عيد = والليالي قمرها لايصير مهجور

نوى المرواح مصحوب السلامه = بعد ماولع القلب بغرامه
تركني و ارتحل يا طول ليلي = متى يرجع لنا ظبي العدامه
خذوله ياهل المعروف مني = سلامي له و ردولي سلمه
انا لولا الحيا لاصيح باسمه = ولكني اجنبه الملامه
اخفي عن جميع الناس خلي = مثل ما اخفيت جرحٍ من سهامه
الا يالله قربني من اللي = الي من غاب جرّحني هيامه
لقيت النوم من عقبه محرّم = وشوف الناس من عقبه ندامه

ياللي حياتي كلها منك تجريح = مامر يومٍ سالمٍ ماجرحته
المشكل انك واجد اللوم و تصيح = وانت الذي طفل الموده ذبحته
مانت بتعرف تريح النفس و تريح = كم منظرٍ حلوٍ بكفك مسحته
لوّحت بي في ليل الاحزان تلويح = هذا عطاك و ربحي اللي ربحته
ابيك تبرالي على هبّة الريح = وتناصح القلب الذي بك نصحته
اثرك تدور عثرتي وين اباطيح = وش ينفعك لي قيل خلك طرحته

يا صاح انا قلبي من الحب مجروح = جرحٍ عطيبٍ مالقاله مداوي
لو ينشري قربه شريناه بالروح = مير البلى شوفه غدابه هقاوي
اهل دمعٍ فوق الاوجان مسفوح = على الذي ماهوب للغدر ناوي
انا ادري انه مثلي اليوم مطروح = لاشك مايقوى ولاني بقاوي
لولاي ادري سر الاحباب لابوح = و ابيع بيعات الهبيل الفدواي
لكني اجحد فيه عن كل مفضوح = خوفٍ عليه من الحكي و الدّعاوي
حسبي على اللي حط فالدرب ساموح = العاذل اللي جر كل البلاوي
من اول ٍ باب المواصيل مفتوح = يوم ان عذال الموده خلاوي
اليوم سد الباب لوحٍ على لوح = و امسيت انا يا صاح قلبي شقاوي