مااطولك ياليل

.

..........

....


( مذكرات طفل بدوي )



بمناسبة قرب حلول عيد الاضحى ماوجدت غير اني اشاركم العيد بهالمقالة والغوص في ذكريات الطوله (( مذكرات طفل بدوي))والفرحه بالعيد اول شي كل عام وانتو بخير العيد اقبل علينا وفرحنا به وانتمنى الله يعوده علينا وعليكم وللعيد صدى في قلب الانسان وخاصه الطفل يبني قواعد للماضي اساسها العيد (( يابن الحلال تراك دبلت كبدي فلسفه قل وش عندك واخلص ولو اني داري ان تاليتك بتجيب العيد بدري )).المهم ان وقع العيد دايم يعيد لي ذكريات حلووه مره (( تكفا اسكت فديت ذا الشارب اسكت تراهم محترمينك لذا الحين)) طبعا احساس العيد كان وقعه اكبر علينا وحنا صغار لن الصغير سبحان الله بكون له عيد بمعنى ماتحمله الكلمه من معاني واحاسيس .وربي اني اخر يومين في رمضان وانا صغير اني انسدح على فراشي الساعه 11 مساء عشان اعدل نومي للعيد ولايجيني النوم غير الساعه5 الفجر من التفكير في بكره وش بسوي بالعيد وكنت لانمت مغير اتنقل بين الملاهي ساعه عند الخيول ساعه عند الدبابات (( يعني الموتو سيكل)) وساعه مغطس وجهي بشعر البنات (( لحد يفهم غلط هذي حلويات اسمها شعر بنات )) ولا اقوم من نومي غير ناشرين فراشي على السطح يضربه الشمس ولحد يفهم ذي بعد غلط سبب نشر الفراش في السطح عشان ولد اخوي الصغير عمره سنه كان نايمن جنبي والظاهر انه دخل لي بالحلم وانا غريته بالبيبسي وشعر البنات وحب يعيد على فراشي بطريقته الخاصه (( ولد اخوك ياكذاب اخوك في ذاك الوقت توه معرس ماصار له اكثر من شهرين كيف جابه ودي اعرف ؟)) المهم كنت اقوم مع الاذان واقوم والبس الثوب الجديد واتشخص (( طيب صلاة العيد يا الشين رحت صليت ولالا؟؟))واذكر بعد اني اجلس في المجلس مستنى يجونا ضيوف عشان اقهويهم (( قصدك عشان يعطونك العيديه)).وكان اللي يعطيني عشره ريال عيديه في ذاك الوقت كنت اوقف على راسه بالدله وانسى الباقي .واذكر بعد ان اللي عطاني العشره ريال ماحصل غيرها في مخباه وعطاني اياها منحرج يوم شافني فاتح حلقي قدامه ومنكسفه خشتي وعيوني طايره في العشره واذكر انه واحد عطاني عقب راعي العشره جا عندنا وعطاني ريال .وقالي صب قهوا قلت الدله وراك ((بدوي راس مالي مناهض للشيوعيه))و سبحان ربي اعرف اللي بعطيني العيديه من اللي بس بيلطخ خدودي من ذا السعابيل ببلاش .واذكر مره جانا ذاك اللي متشخص بالبشت ورازن عمره في صدر المجلس ووقفت على راسه بالدله يمكن فوق النص ساعه وربي خدمته اكثر من اللي عطاني عشره ريال وكنت كل ماشفته يلعب بمخباه قربت منه ومديت ايدي ولا طلعها من مخباه فاضيه رجعت للدله وصرت على ذا الحال لعبي كل مادخل ايده بمخاه قربت ولا طللعها فاضيه بعدت (( اكفخه بادله واخلص)).واخرها يقولي ذا بيت فلان يقصد بيت جيرانا بس هو مضيع وجاينا ا قلت لا جارنا قال اكرمكم الله وطلع من غير لايعطني العيديه .ويوم جا بيقوم قلت له عيدك مبارك (( يعني افهم )) لين يقول علينا وعليك يا ولدي سامحني فديت خشتك ماعندي صرف (( عاش المصرف )) طيب

المهم ولا خذت ربع ساعه ولا اللي داخل علينا ومن شفته وربي كان عندي احساس كبيره انه بيعيدني مدري كيف جاني هالاحساس ((بدوي تعرف تقص اثر الحبارى ))المهم يوم قهويته واجتهدت في قهوته ويقوم ويطلع من مخباه فلوس كثيره وكانت فوق بعظها ملخبطه بس اللي افرحني ايش انها كانت من امهات500 وامهات100 وامهات50 قلت في بالي كلها خير راضي بأي وحده فيهم اكبرها ام خمس ميه (( طبعا فاقد الامل فيها بس يذكرها من باب سرد القصه اذكرها)) واقلها ام خمسين ريال ولا ابغي زود نعمه .المهم ولا خذا اشوي الا مطلع ريال كان هو الوحيد مندعس ومتصفط بينهم قهرني وربي حسبي الله عليه بغت تجيني الثعلبه بسببه واقوم من القهر واصب له في فنجان القهوا واخلطه شاهي وعقبه قهوا واسوي له مخلوط ولو كان حولي سبرتو ولا ديتول حطيته له وكنه العيد…

.المهم عقب تجميع العيادي واستخراجها من بين براثن المعيدين قلت خلاص كذا كافي واروح ابغي اركب لي خيل (( قصدك جحش لاتستحي ترى كلهم اول بداياتهم يركبونه )) المهم عقب ماركبت الخيل (( للحين مصر خيل؟؟)) ولا امداني ركبته الا وقام يرافس (( اني قايلك حجش تقول خيل )) والله ولا قام يرافس الا انا على خشتي ويضيع العيد من اوله ويشيلوني ويودني للبيت وثلاث ارباع قروشي اللي جمعتها بتعبي ومجهودي ودلة قهوتي ضاعت واجلس في الفراش خمس ايام وكلن يجيني يقهرني بالصور وهو فوق الخيل واللي فوق الدباب واللي في الملاهي .وبعدين تذكرت اللي عايدني بعشره ريال يوم دور مالقا غيرها وانحرج وعطاني اياها اكيد طلعت ماهيب من نفسه.طيحني من فوق ظهر الجحش حسبي الله عليه (( ايوااا اقفششش الحجش ؟؟؟؟

اسف على الخرابيط لكن بغيت اشارك العيد بفرحته معكم وحبيت اقولكم كل عام وانتو بصحه وسلامة والله يجعلنا وياكم من العايدين ..والله يحفظكم جميع
...............

بقلم / رفيع الشان

........

....

(( طاب ليلك ياعريس ))




انا في الحقيقه كنت بكتب عن الطفارى لكن الي خلاني اغير الموضوع هو اني .جالس اسمع الحين فطومه ..بيض الله وجه .ولالالالا اخاف ماعاد تغني !! اغنية طابعها طابع العروس وصراحه ذكرتني بيوم اني لابس ذاك البشت وجالس كما الييث رافع صدري ومسكر الغالوقه ولا اقدر اتلفت لايمين ولا يسار عشان كنت لما الف الوجه يمين ولا يسار الغتره والعفال يبقون على وضعهم )) لالا بس عشان كنت محترم مره وشايفن عمري وتشوفني من الصدر وفوق تقول ابو الهول راكد ومن تحت الخصر جالس يهتز تقول وراي حفله وجالسه نجوى فؤاد تدربيني (( يابختك)) . المهم انا بقول قصة قبل الزواج ولكن كما تخيلتها يعني ماهوب انا((وجه ضايق )) تعرفون قبل الزواج تنشئ فرقه خاصه وتفتح غرفة عمليات وتخطيط عشان تعرف البنات وين هن فيه مع ان كل بيت فيه عشر الا انك يوم تبي تزوج تحس ان مافيه في ذا الدنيا غير بنت جارتكم ...عمشه الخبله (( تصبيره)) وطبعا كلنا نعرف ان عشان اتزوج لازم تعجب اهل العروسه ولا شم بوزك (( اسئل خاطب ولار تسئل متزوج)) المهم صار اني حطيت عيني على بنت ابوها رجال مطوع وراعي دين وأول شي سويته انا .عشان العمليه والخطه تنجح حولت من كاظم الساهر لين عبد الباسط عبد الصمد وقمت احضر صلاة الجماعه في المسجد حتى صلاة الفجر كنت اذكر اني صليتها مع ابوي وحنا راجعين من الدمام وصليناها في محطة بانزين (( اذكر يا شين حتى وقتها عدتها ثاني يوم لنك صليتها من غير وضو )) المهم قمت اتلزق في ابو البنت واصلي دايم جنبه حتى مره جا هندي ويصف جمب ابو البنت واقوم واطرده ويوم شافني عمي عطيته ابتسامه خبيثه (( باين مايحتاج تحلف)) المهم اني اظهرت التقوى والصلاح ومغير اقول قدامه استغفر الله ولا حول ولاقوة الا بالله اللهم ارزقني بالزوجه الصالحه (( بكاش) المهم كان ابو البنت يناظرني وكنه يقول يا ليت هذا زوج لبنتي .وانا اناظره بطرف عين واقول في خاطري .هي هي هي بتطيح يعني بتطيح )) وحبيت ازيد بهارات قمت اسأل الامام اسئله قدام ابو البنت وكنت اقول للامام : انا رحت للهيئه الخيريه ابي اتبرع 100 الف ريال لخوانا المسلمين في البوسنه والهرسيك لكن مالقيت احد (( واحد الكذب عنده بقرش)) فا ياليت تدلني على اي فقير ولا مسكين خلني اتصدق قلبي يتعذب وانا جالس ماخدم ديني وكل هذا وانا اطالع ابو البنت بطرف عيني (( مجرم)) المهم قام ابو البنت يوم الله ارد اني اكل هوا وقال انا عندي رجال يستاهل الصدقه وهو الحين في ورطه ومحتاج عشرين الف ريال بس ونروح له انا وانت الحين (( وجه انصدم وتغير شكله وتغمصت عينه وريقه نشف)) قلت طيب يا طويل العمر خلها بكره عشان البنوك الحين مسكره وطبعا البنوك الي اتكلم عنها مالي فيها غير 500 ريال(( باخصينك وعارفين )) وقمت الصبح اقول الحين وش بسوي عشرين الف ماهيب اشوي قمت وبعت السياره عشان ادبر اموري وخاصه اني حاط في راسي ان الزواج بعد سنه يعني يمديني سويت شي لكن فاجئني ابو البنت حسبي الله عليه المهم رحت بالفلوس لبو البنت وقلت يالله خلنا نتوكل على بركة الله المهم يوم وصلنا للرجال قال لنا ان اموره انحلت ولا عاد يبغي شي وقال لنا مشكورين وجزاكم الله بالخير (( وجه بيتشقق من الفرح وده يقوم يبوس الرجال مع خشمه .واقوم انا واسوي عمري اني زعلان على انه ماراح ياخذ الفلوس وقلت يعني انا مالي نصيب اتصدق واخذ اجرواطلب رضا الله وين ماطقها عوجا وهذا كله وعيوني مطرفه صوب ابو البنت(( خبيث)) ويقوم ابو البنت وقال والله ماخليك ضايق صدرك قم معي وانا اخليك اتصدق (( وجه تعفس وده يهفه كف )) المهم اني قمت وجينا ذاك البيت الي من شفت شكله قلت انا متصدق يعني متصدق (0وجه مزرق)) ويوم دخلنا البيت ولا الي زاد الطين بله ان الرجال يبي يتزوج وناقصه المهر قال انا يعني عشان اخذ بنت هالرجال لازم ازوج معي رجال يعني ادفع مهر واحد تاخذ الثاني مجاني(( عشان اتسوي عمرك ابن مهيد)) المهم بدل لاكنت راح ادفع عشرين دفعت ثلاثين وفي خاطري عسى ماتروح مني هباء منثورا وخاصه انها ماهي لله الله يعفي عنا . المهم وحنا راجعين قال لي ابو البنت الله يجزاك خير ويجعله في ميزان اعمالك ..مع انه لو يدري وش السالفه بالضبط كان خلاني ميداليه للسلسله الي في يده الي مره يستعملها ميداليه ومره قلص المهم سئلني ابو البنت اسئله كنت نطرها تجي قال انت عمرك دخنت (( يعني اشرب سيجاير))..رديت بسرع من البرق اعوذ بالله انا اشرب تتن اشرب هالخبيث ماعاذ الله يا عم ..انا في حياتي كلها ماشربت اي نوع من انواع الخبيث (( لو الكذب يجيب افلوس كان انا بيل جيتس الثقبه )): قال عمي بعدي ولدي الله يحفظك .وانا ماغير اناظره في طرف عيني واقول .(( جت رجليها ماجات رجليها ) ) وسئلني ابو البنت اسئله ثانيه قال انت تدرس قلت واعيوني في الارض منكسره لا والله يا عم انا تركت دراستي عشان اساعد خواتي (( مقطع من مسلسل الشهد والدموع)) والحين معيل اخواني لكن انشالله بكمل دراستي ((لاحجت البقر )) المهم اني دخلت نفوخ ابو البنت واكلته العسليه ..وسئلني السؤال الي خلاني اهز وسطي من تحت بدون هو لايشوف قال انت متزوج ..قلت بطريقة تمثيليه .تنافس فيها محمود عبد العزيز يوم جا يشحذ من عمه الفلوس ..قلت لا وين اتزوج يا عم من هو الي يزوج متدين الايام هذي على العموم انا ادور بنت الحلال (( الطيبون للطيبات)) .وكل هذا وانا اطالعه بطرف عيني(( واحد ابليس يعول عليه وقت الشدايد)) المهم ويقوم ويقول الشي الي خلاني ازيد في الهز لدرجت اني بغيت اصفط السياره يمين واوريه من احسن انا ولا فيفي عبده في الهز (( لا انت)) قال يقول المثل اخطب لبنتك ولا تخطب لبنك .....قلت ونعم ونعم ماقلت الا الصدق (( دلخ تفككت براقيه )) قال وانا عندي بنت ولاني بلاقي احسن منك .يا ولدي ..قلت لي الشرف يا عم وعساني اكون عند حسن ظنك .((ماظن)) المهم قال عمي او اللي بيصير عمي قال تعالو العصر يوم الاثنين ..واقوم بطريقه تكتيكيه قلت لالا عمي خلها الثلاثاء .قال ليش قلت عشان انا صايم يوم الاثنين (( عيار)) هاهاه حلوه قصة صايم انا احيانا في رمضان اتعمد اروح للدمام كل اشوي عشان الفطور (( ضعيف ايمان قوي فيفي )) المهم قال عمي الله يجزاك خير خلاص تعالو الثلاثاء انت واهلك ويصير خير انشالله المهم مر الاسبوع ورحنا خطبنا وعطانا اسبوعين عشان يجهز وبعدين نتمم الملكه المهم جا لي رفيق قال لي تعال ابي اروح معك مكان قلبك يحبه قلت وين قال تعال وبعدين اقولك المهم رحنا ولا وقفنا غير عند قهوا شيشه وقلت يا ولد انا قاطع الشيشيه قال تعال بس مره تفوت ولا حد يموت قلت يالله .ويوم شيشنا وعينا من الله خير(( ايه هين )) عشان ثاني يوم نبي نروح لبو البنت نتمم الموضوع وقبل لاروح قمت المسجد عشان يشوفني عمي وقبل لاروح قمت وقصرت ثوبي .وكنت من الاساس مكبر الحيه بس قمت وحطيت بويا للتنظيف الجواتي في السجاده وسجدت عليها عشان تطبع علامات التقوى والورع والخشيه فديتني محلاي كني ابو بكر الشدي في دور بيتروس ((طيب)) المهم رحت للمسجد وطلعنا انا وعمي للبيت حقه ودخلنا داخل ويوم جلسنا اشوي ولا داخل اللي مفروض يكون نسيبي وقال انا وين شايفك ..قلت في خاطري امحق .يعني وين بتشوفني خطيب مسجد اكيد في حدى مراكز التسوق اعاكس ((سربوت)): قلت على طول يخلق من الشبه سبعين .زدتهم عشان يمكن اضيع بينهم قال لا انا شايفك ومال من شيفتك ...قلت الله يسلمك يمكن في برنامج اهل الخير قد استضافوني من سنه(( ياكذبك)) قال لا ، قلت يمكن في المسجد احضر ندوه دينيه ولا شي(( ذي عاد كثر منها)) قال لا انا اساسا في عمري ماحضرت ندوات (( يخلق من الصالح طالح )) قال بس تذكرت في قهواتشيش حتى كسرتو انت ورفيقك جيك الماي القزاز (( عاد هذي زادها من عنده)) قال ابو البنت وهو معصب صحيح يا رفيع ..(( وجه تعفس)) قلت لاياعمي اكيد ولدك غلطان (( ماشفوهم وهم يسرقون شافهم يشيشون )) قال الولد لا والله يبا مانيب كذاب شفته حتى كان امس وكانك منت مصدقني هاشف ثوبه محروق .(( اخ )): واقوم واطالع ثوبي ولاه صدق محروق بس ماهوب من الشيشه من جمر البخور ضيعتني امي (( هي امك بس اللي ضيعتك)): وعاد حبيت مااستسلم قلت يا عمي صل على النبي ماهوب انا انا يا عم لو تجي بيتنا تشوف مغير سجاجيد موزعه في البيت من كثر ماصلي وصدقني يا عم مرات اجلس اصلي ست ساعات ..طبعا قبل الانتر نت لو الانتر نت موجود كان صليت 12 ساعه : المهم كل ماشفت عمي لان دخلت عليه بقصه دينيه عشان يشيل من باله اني هو ويقوم الولد قال يبا كيفك بتزوج ولا بتزوج غيره تدري انا مايهمني لكن انا شفته وبس وفي خاطري اقول والله حقير (( اجل انت وش تصير)) المهم قلت يا عم يا عم شيفتي شيفت ...


بقلم / رفيع الشان

..........

....


(( دور الميرندا في حل المشاكل الزوجيه ))



بادي ذي بدء (( حلوه ذي بادي ذي بدء..ممكن اعيدها؟)) بادي ذي بدء..لا ماهيب مفس البادي الاوله.بعيد اخر مره …بادي ذي بدء ( ايوا كذا) انا من الناس اللي ماحب المشروبات الغازية (( لا ابد ماتحبها بس لو بيبسي بغت تسوي اضخم دعاية لها صورتك بكامرة خفيه وانت تسف لك صندوق علىغدا)) لكن اللي خلاني اطري المشروبات الغازيه هو الشيخ سعد البريك الله يحفظه سمعت له خطبه يحث فيها بحسن معاملة الزوجه والتودد لها وحفظ كرامتها وتطرق لفكرة تجنننن في حالت زعل زوجتك عليك كيف ترضيها وهي انك تجيب لها غرشة ميرندا ( يابلاش) ويقول صدقني راح يطيح كل شي لنها في النهاية هذي هي صويحبتك اللي انت خابر وبيني وبينكم عجبتني الفكرة لنه لو ترجع لزمن الاول كانت المره من تزعل ماترجع غير بعشرين راس غنم وخمس كياس رز وعشر كراتيين صلصه وكرتون شامبو ابو بنت الاحمر وكيس هيل وكيس قهوا ومحماس يستعمل لعدة استعمالات منها الحمس ومنها الخمس على الخشه وطبعا لو تزعل لها عشر زعلات في السنه صارت شيخ قبيلة في ذاك الوقت اما الحين تغير من تزعل المره جبت لها طقمين ذهب ولا طقم الماس او همشة قروش تسد ابها حلقها وبعضهم يتلكك ماتهقا على الله تصير اقل مشكله الا وهي طايره لهلها عشان تفوز بساعة الشوبارد ولا البارثلي وكن هالمسكين وارث بنك ابوها (( لام الله من لامها مالقت من يعطيها ركبه )) .المهم ان من قال الفكره ذي؟ وانا معبي المخزن صناديق غراش ميرندا وجلست على ذا الحال كل مازعلت مديت لها قرشة ميرندا وضحكت والباقي عاد علي انا (( ماينخاف عليك يا الشين تعرف تقنع حتى لو بغيت تقنعها ان صلاح الدين الايوبي اصلا من الاحساء بتصدقك)) المهم صرت امشي وقوارير الميرندا في مخباي كل ما قالت هااااا مديت غرشة وضحكت ويطيح الحطب و صراحه فكرة تجنننن صحيح اني استهلك عشرين صندوق بالشهر لكن ارخص من محلات الذهب وطقوم الاماس غير كذا فكرة الميرندا رخيصه ولا تكلف شي من تقول المراه هااااا حط في حلقها غرشة ام نص ريال وتمشي الامور وجتني ايام احط غراش الميرندا على كومدينت السرير عشان لو حلمت فيني مزعلها وانا نايم مديت لها من قريب القرشة ورجعت نامت وكملت انا نومي وصارت مثل النجدة في حال المغثه صحيح اني غيرت الغراش وخليتها قواطي يعني اغلى بنص ريال لكن اسلم واظمن الروح ماهياش بعزقه والراس مكشوف وثاني شي انصح اللي يبغون يسون هالطريقه التشكيل يعني مره بيبسي مره سفن اب مره ليمون المهم تشكيل عشان مايصفر وجهها من كثر الميرندا

وطبعا هذي النصايح كلها تحت استشارات دكاترة نفسيين وانا معهم (( ليتهم يسمعون لك اسلم))

ثالث شي لاجيت تعطيها غرشة الميرندا عطها وانت مشحب الوجه عشان لاشافتك كذا تجيها رهبة منك وتفكر مليون مرة قبل لاتكفخك فيها

رابع شي حاول تعطيها الميرندا بعد المشكلة ب24 ساعه عشان تهدا الامور وتعرف تركز في كذبك

خامس شي حاول تعطيها الميرندا قبل الغدا ..لنه توصل العلماء في مدينة الحوطه انه في حالة الجوع يوقف التفكير (( اجل على كذا هل الحوطه لهم فوق السنه مادخل بطونهم شي)) لالالا امزح لايطلع لي عالم من الحوطه واروح في عين امها وربي امزح

سادس شي حاول بعد ماترضى عليك تغرغرها بالميرندا لين تندبل كبدها منه عشان لابغت تزعل ثاني مره تذكر انه مافيه غير الميرندا وطعمه اللي دابق بحلقها وتهون من الزعل .

وسابع شي واخر شي حاول تخفي عدد كبير من الميرندا قبل لاتراضيها عشان تعتقد انه عندك زوجه ثانيه وتهرب لها الميرندا من المخزن وصدقني وقتها بترضى ماهوب عشانك لا عشان بس ودها تعرف الميرندا وين اختفت (انتها)

طبعا قصدت المزح لا اكثر ولا المراه حقها اكبر من كذا و كثير من العقال من النساء يعرفون ان قدرهم ماهوب بسعر الهدية او قيمتها قدر ما يهمهم احترام الزوج لهم وتقديرهم واعطائهم دور في حياته ولو جينا للمراه وجدنا انها اوفى مايستحق ذكره بعد الام المراه هي عنوان العطاء والصبر والتضحيه

وصدقوني عمر الرجال مانسى فضل المره بالعكس والله حاولت كثير اني احصي افضالها واحصي عطائها لقيت اني احتاج حلقات كثيره تنافس حللقات ام كلثوم .

الزوجه نبع الاخلاص والتضحية واصل العطاء الا محدود هي ام اغلى مافي الوجود ام اولادك تعطيك عمرها ماتمن بعطاها يوم تغيب ساعه عنها كنك غايب سنوات وهي تحت الشمس تنتظر ويوم تشوفك مقبل عليها كنها ملكت الدنيا ومافيها ويوم تطيح اول من تلقفك بيدها هي اما تسحبك ولا تطيح معك وحتى لو طاحت معك في حفرة كلها ثعابين بتصبح معك حفره كلها زهور وبساتين

تشوفها مثل ضلك في بيتك كل همها انها ترضيك كل همها انها تسعدك تحاول تعرف وش فيك من غير لا تضايقك باحساسها فيك ومن علامة الرضا او الزعل اللي تبان فيك الزوجه مثال رائع للتضحية ومثال رائع للخلاص احيان كثير تفكر فيك اكثر ماتفكر في اولادها وصدقني اذا فيه حب صادق حب زوجتك لك لنه حب رسم حدوده قال الله وقال رسولة وطاعتها لك نابع من ايمانها بالله وصدق محبتها لك ماتشوف الدنيا غير بنظارتك الطبيه ....



بقلم / رفيع الشان

..........

...



(( البارحة يوم الخلايق نياما ))


البارحة يوم الخلايق iiنياما
بيحت من كثر البكا كل مكنون
قمت اتوجد وانثر الماء على iiما
من موق عين دمعها كان iiمخزون
ولي ونة من سمعها مايناما
كني صويب بين الأضلاع مطعون
وإلا كما ونة كسير السلاما
خلوه ربعه للمعادين iiمديون
في ساعة قل الرجا والمحاما
في ما يطالع يومهم عنه يقفون
وإلا كما ونة راعبية iiحماما
غاد ذكرها والقوانيص iiيرمون
تسمع لها بين الجرايد حطاما
من نوحها تدعي المواليف iiيبكون
وإلا خلوج سايبه iiللهياما
على حوار ضايع في ضحى الكون
وإلا حوار نشقوله iiشماما
وهي تطالع يوم جروه iiبعيون
يردون مثله والظوامي iiسياما
ترزموا معها وقاموا يحنون
وإلا رضيع جرعوه الفطاما
توفت امه قبل اربعينه يتمون
عليك يا شارب لكاس الحماما
صرف بتقدير من الله مأذون
جاه القضاء من بعد شهر الصياما
صافي الجبين بثاني العيد iiمدفون
كسوه من بيض الخرق ثوب خاما
وقاموا عليه من الترايب iiيهلون
راحوا بها حروة صلاة iiالاماما
عند الدفن قاموا لها الله يدعون
برضاه والجنه وحسن iiالختام
ودموع عيني فوق خدي iiيهلون
حطوه في قبر غطاه iiالهداما
في مهمة من عرب الامات مسكون
يا حفرة يسقي ثراك iiالغماما
مزن من الرحمة عليها يصبون
جعل البختري والنفل والخزاما
ينبت على قبر به العذب مدفون
مرحوم يالي ما مشي iiبالملاما
جيران بيته راح ما منه iiيشكون
يا وسع عذري وأن هجرت iiالمناما
ورافقت من عقب العقل كل مجنون
أخذت أنا وياه سبعة iiاعواما
مع مثلهن في كيف مالها لون
والله كنة يا عرب صرف iiعاما
يا عونة الله صرف الأيام وشلون
وأكبر اهمومي من بزور يتاما
وإن شفتهم قدام وجهي يصيحون
وأن قلت لا تبكون قالوا iiعلاما
نبكي ويبكي مثلنا كل محزون
لاقلت وش تبكون ؟ قالو iiيتاما
قلت اليتيم اياي وانتم تسجون
قمت اتشكا عند ربع اعدامــا
وجوني على فرقا خليلي يعزون
قالوا تزوج وانس لامه بلاما
ترى العذارى عن بعضهم يسلون
قلت إنها لي وفقت بالولاما
ولو جمعتم نصفهن ما iiيسدون
ما ظنتي تلقون مثله iiحراما
ايضا ولا فيهن على السر iiمامون
وأخاف أنا من غاديات الذماما
اللي على ضيم الدهر ما iiيتاقون
أو خبلة ما عقلها بالتماما
تضحك وهي تلذغ على الكبد iiبالهون
توذي عيالي بالنهر iiوالكلاما
وانا تجرعني من المــــر بصحون
والله لولا هالصغار اليتاما
وخايف عليهم من الدجه يضيعون
لقول كل البيض عقبة حراما
واصبر كما يصبر على الحبس مسجون
عليه مني كل يوم iiسلاما
عدة حجيج البيت واللي يطوفون
وصلوا على سيد جميع iiالاناما
على النبي يللى حضرتوا تصلون


مرثية للشاعر نمر بن عدوان في وفاة زوجنه ...

مشااااااااااا لله اااااااااااااء

تبارك الرحمن

اخي الوافي

ماصبر حتى يكون ليلة خميس او جمعه

ناوي تسهرنا بالقرائه الله يهديك

دائما مانجد منك الجميل والرائع

وخاصه قبل بزوغ الشفق

لنا لقاء معاك على مائده من موائدك

حقيقه يريدلي يومين لا اشتغل ولا اعقب

عشان اخلص ربي يسعدك

تقبل خالص المنى

تميز دائما

بس ملف مرفق

يخليك تمسك طريق الحجاز ماتدري

تحياتي

ا

...........

....


بـــــــــــــــــــــــدري الشـــــــــــــــــــــــفا !!


من متى وصلتك الدعـــــــــــــــــــــــوة يامفتري !!



حيااااك والله ياباشمهندس




تقول اجل طويلة المشاركات ؟

المهم لاتفوفتك ترى تستاهل السهرة





حيااااك ياقمر ...

.........

...


(( محلي / مستورد ))



أنا: بس ما يطلع ابوها شايب غثيث وعلة زي ابو عبدالله شايب ابليس لا يرحم ولا يخلي رحمة ربي تنزل ..



أخوي: لا تخاف ابوها يعجبك دارس في امريكا وموظف في الدرجة الرابعة عشر ..يعني دقة جديدة.



أمي : بس أنت اسمع خلك رجال وثقل واذا شفت البنت اطلع و انثبر ولا تقول ولا كلمة زيادة واذا رجعنا للبيت قل لي وش رايك فيها فهمت ...



أنا : ابشري يمّه بس عساه يعطيني وقت كافي اشوف مو زي ذاك العلة نص دقيقة



وبالفعل رحنا لبيت أبو فهد والرجل صدق من دقة أهل امريكا لا سئل عن الصلاة ولا غيرها سئل عن عملي وراتبي ثم قام يقص لي سيرته الذاتية وانه يوم راح أمريكا كان يشتغل يوزع بيتزا علشان يعتمد على نفسه ..والله من النصب يرحم أيامه من يتخرج من الثانوية ارسلوه في بعثة مو مثل أيامنا ..وطبعا أنا مسرع الشريط لين يجي الوقت اللي اشوف البنت ..وبالفعل قام معي ابو فهد علشان أشوف بنته وصراحة يوم دخلت علي البنت الا سبحان الخالق صاروخ ارض جو فتّاك وأبوها جزاها الله خير لا معه ساعة ولا يعد وقت مير اتذكر سالفة أحد الشباب يوم قال أن بعض البنات يكون الوجه الله الله بس الجسم يعلم الله ..والبنت مدنقة فما يبين جسمها الآن قدامي فبديهيا وأنا واقف والبنت قدامي وبيني وبينها حوالي متر فاستغليت فرصة أن عمو أبو فهد يناظر في النجفة فقلت للبنية بكل أريحية وميانة وبساطة ممكن تآخذين لفة لو سمحتي ..انا ما تمت كلمتي الا البنية بدت تفتر ..المشكلة مو هنا المشكلة في عمو ابو فهد اللي شقصني من رقبتي ..ووو



أبو فهد: وش تقول ممكن تفرين شوي ..ليه انشالله وش تبي تشوف بالضبط هااااه.



أنا: يا عمو لا تفهمني غلط ثانيا هي راضية وانا راضي وش عليك مننا يا قاضي .ما تشوفها وش حلاتها فرت على طول.



ابو فهد: هي بنت ساذجة وش يعرفها بنيتك الشينة ..يا قليل الحيا هذا مو عند بنات الحمايل هذا عند بنات الشوارع.



انا : يا عمو والله العظيم ما أفكر في اللي في بالك بس الواحد لازم يعاين قبل ما يشيل صح ولا لا مو بعدين أتوهق .ثانيا تفكير أهل النسيم وسان فرانسسيكو والله ما طرا لي في بال وبيني وبينك يا عمو مافي هالوقت بنات سذج يعني تلقاها فاهمة و مطنشة



ابو فهد : أقول اطلع بس يا قليل الحيا هذي آخرتها أدخلك بيتي و أوريك بنتي أحسبك راعي زواج طلعت راعي خرابيط



اطلع بس قبل لا أشوف شغلي معاك .



وانطردت للمرة الثانية على التوالي ..وأخوي قام يهاوشني وأمي تفلت بوجهي عقب فعلتي المشكلة أمي فهمت كلامي غلط يوم قلت للبنت لفي ..صار موقفي صعب ... وحالتي تصعب على الكافر.ومطفر وأطمر لمحل يبيع طعمية حول بيتنا ..ويجيني المعلم صبحي ويشوفني أزل الدمعة من الحزن .



صبحي: شو هاظ يا عيب الشوم شو باك ..يا رجال وكل الله.



أنا:ايه يا صبحي هات صبة ( الصبة خبزة كبيرة داخلها حوسة بيض وطعمية وطحينة وبطاطس وطماطم وخيار ما يندرى هل هي حلال ولا حرام بس تباع في السعودية ) بس بدون بيض ..شكلي باصير زبونك طول العمر مافي زواج كل مارحت اخطب اهل البنت يفهموني غلط ويزعلون ويطردوني ...مرتين انطردت يا صبحي.



صبحي : لاك شو هالحكي ئول غير هالحكي بدي افهم شو نائصك ..تخزي العين ما نائصك شي .



أنا: اخلص علي بس بالصبة ولا تحط مخلل تراني ما أحبه ..خلها على ربك الزين هالأيام ما ينبغى



صبحي: يا رجال وكل ربك على ئولتكم يالسعوديين ايزهالها ...الك عليي اجوزك ..من بنت شو تاخذ العئل ..حرسلك لواحدة في الشام خطابة اسمها أم الخير بس شو ام الخير عن جد ئولها انك من طرف صبحي بعبوصة ..وهيي راح تتوصا فيك وتنئي لك بنت بس شوو بتآخز ضبنات العئل ..



أنا: لا يا صبحي وش يقولون الناس آخرتها تزوج واحدة مهيب من بنات ديرته تبي الناس تقطع جلدي ..بالله كثر الطحينة الله يخليك ولا تكثر طماط.



صبحي: مش بتئول انك روحت كزا بيت وطردوك شو بدون كمان منك مش حيجوزوك ومش عاوزينك تتجوز ما بيصير هيك يا عبدالعزيز رح تزبحك العزوبية على ئولتكم ..عزوبي يحكحك الجدران .الا شو معناتا؟



أنا: معناها عيب ..يعني أنت رأيك كذا ..بالله اجل استعجل علي بروح أكلم أهلي واقنعهم وانت جهز لي عنوان أم بشر قصدي أم الخير علشان اروح لها .وبارجع لك بكرة.

وبالفعل رحت لبيتنا وبديت في اقناع الأهل في البداية الوالدة كانت رافضة ومجهزة لي ثنتين من برا الرياض ما بعد سمعوا بسالفة طردي ...وابوي قال مهيب شينة الفكرة بس يرى من حكم خبرته لو هو أستكشف الوضع أول ثم يرد لي خبر ..هذا آخر خبري ذاك اليوم قبل ما تثور الحرب العالمية ..في صالة بيتنا ..وفي مثل هالمواقف الواحد يقول العطة يا بطة بس مدري وين اختفت الصبة ..المهم بعد معارك استمرت ليلة كاملة تلقيت أشعار من المجلس الأعلى للمنزل ..بالموافقة شريطة أن لا يرافقني أحد ورحت لسوريا وضعت يومين هناك على ما دليت بيت أم الخير في حارة النحّاس حول ميدان الأمويين ..والقى أم الخير ..اول ما شفتها ارتعت كنها هيكل عظمي وبيضا تشيلها قدام نور تصير صورة اشعة المهم.



أنا: يا خالتي أم الخير أنا جايك من طرف صبحي بعبوصة ..وأبيك تدبرين لي عروصة.



أم الخير: ييه كيفو لا صبحي شو عامل انشالله منيح انتا صاحبه ..مشتائتلو كتير هالزنمة.



أنا: يسلم عليتس واجد ابن بعبوصة ..بس الله يخليتس ابي العروسة بيضا وشعرها أشقر وعيونها زرق وخدودها حمر ..وطويلة بس مو حيل يعني زي ما أنتي شايفة يعني من طولي وأقصر.



أم الخير : لا شو يابني خود لك واحدة شمحوطة طويلة من شان عيالك في المستئبل يصيروا طوال هما كمان.



انا : الله يسلمك موب لازم يصيرون طوال ..أهم شي أنا أنبسط مو وانا تحت يفوتني شي فوق ..ابي واحدة بطولي أقدر الحق عليها . وقولي لهم تراه غني ما عليه وأمير قولي لهم أني أمير ..واذا رجعنا للرياض علمتها اننا أمير قبايل يعني من زمان بس ..توصي فيني يا أم الخير الله يسلمتس.



أم الخير: يي لاك تكرم أنت من طرف الغالي صبحي بعبوصة مش صحيح هو بيشتغل في السعودية مبرمج كمبيوتر .



أنا : ايه مرة ماشالله عليه مصمم برنامج يتذابحون عليه في السعودية برنامج يحط الكاتشب في الصبة بعد ما يغلفها .



وبالفعل جابت لي أم الخير كتالوج كلها شقر وكل واحدة تقول الزين عندي بس وقعت عيناي على أطخمهم واسمها هويدا وتزوجنا والحمدلله وفي مطار دمشق مسكته وحفظتها التالي.



أنا: شوفي يا حبيبتي يا هويدا الله يرضى لي عليك شوفي اذا وصلنا البيت ..ولا ركبتي معي في السيارة تغطي واللي يرحم والديك لا تفضحيني .ترى عيب عندنا الحرمة تفتش ..وعلى الأسواق اذا ودتس تفتشين علشان تشوفين زين باوديك الصباح للاسواق بس اذا طلعنا بعد العصر تغطي ولا تقولين لي ماشوف شي ما علي منتس عندنا في السعودية يتحسسون .المهم لا تفتشين في بيتنا تراني أعرف أخواني زين, الحيا طابع عليهم واعزي لهم, والله ان يفكون عيونهم على الآخر اذا أنتي في البيت لا تفتشي لأي رجال زين يا عمري ..



هويدا : ماشي كل ما بتئوله يا عيوني ماشي علي ....وبالفعل رجعنا للرياض ووريتي أهلي هالبرصا اللي جبتها .طبعا وخذ تعليقات بس انا وش علي ..بنت أخوي تقول هيييه عمو جاب عروسة زي باربي ..وحريم أخواني يقولون ما بقى الا هالقطوة الشقرا تقاسمنا البيت وأخواني كل ما شافوني ..أتمغط ولا اريح قالوا ايه ذابحه البياض ..بس ابوي ما علق لانه كان خارج الرياض وأمي كانت تحاول تعلم هويدا كيف تصلح الجريش والمرقوق حاولت افهم أمي ان هويدا مو حقت هالحركات وأنها اذا عصرت نفسها مرة مرة طلعت بكبة ..بس ما اقدر أقول لأمي لا ....وفي أحد الصباحات ..ما وعيت الا أمي تدق بالسنترال علي من الصالة وأنا غرقان في النوم ..



أمي: عزيز ووجع ..قم تعال بسرعة شف وش مرتك مسوية ...اخزتنا قدام هالعالم .



أنا: لا يكون بس رقت السطح تآخذ حمام شمس ..قولي لي وش سوت هالبرصا يمّه .



أمي: أبوك جا من الديرة وجالس في الصالة قلت لها قومي سلم على عمتس راح تسلم عليه وهي متغطية وهذي هي قدامي ..اقبصها أغمز لها اتنحنح علشان ترفع الغطوة عن وجهها بس مهي متمسكة بالغطوة ..



وانزل باسرع ما عندي للصالة شطفت راسي ابوي ببوسة على الطاير ...وأجر هويدا من يدها .



أنا: أنتي يالخبلة في واحدة تتغطى عن عمها أبو زوجها ...على قولتكم حماكي ..هذا حماكي .



هويدا: شو أعمل بيك مش انت ئلت لي لمن تكوني في البيت ما تكشفي على رجال وانا عم باعمول بكلامك.



أنا: رجال بس هذا مو رجال هذا ابوي قصدي هذا غير الرجال ..هذا شرعا يجوز لك تكشفين له ما تشوفين حريم اخواني فاتشات عنده ..ولا هو برايتس وراه مقعدنا في البيت عنده علشان كل عصرية يبسط قدام هالحريم يستعرض عضلاته عليهم وأنه سوى وبيسوي و جاية أنتي ووجهك تتغطين عنه..



هويدا: شو ما أنتا بتئول لي هيك المفروض تئول لي الا أبي ما بتتركني هيكي على العمياني. يعني ارجع اكشف لوه مافيها شي.



أنا : ايه هالشايب عادي افتشي له ..بس أخواني لا فهمتي أخواني لا ..ابوي ايه ..مو تنسين بس أخواني لا..



ومشت الأيام ..وشبت علي هويدا ألا تبي تروح للسوق واستأذن من العمل ..وأطمر بها في هالصبحية وننصى مركز المملكة ...أنا على خبري ماراح القى في الصبحيات الا المغازلجين والبنات اللي مفاختات من الجامعة قلت اروح أغيضهم بهالبرصا ...بس خبري قديييم حيل الا الصبح امتلا عجز بعد وهذي الكوبة ..وأنا ماشي بهويدا بين المحلات و نطلع من محل وندخل محل و هويدا الله يبارك بأصلها مغطية وجهها وأنا مزقرت (مزقرت =مشخص) بها وتونا داخلين دبنهامز الا الفضيحة مدري وش خلا هويدا تزل وتقول ( يي شو هيدا بياخد العئل ما عنّا منوه في الشام ) طبعا هي قالت هالكلمتين والكل عرف انها شامية ..وهنا يا ويلك يا عبدالعزيز يا سواد ليلك ما دريت الاثنتين عجز بدا يسولفون واستلم يا تقطيع .



العجوز 1 : هو هو الله لا يخزينا جايبا هاللبن الخاثر ويدور بها في الأسواق واخزياه رجالنا خربوا.



العجوز2 : ليته مأخذها يدور بها ..الا هذولي البزارين اذا اشتغلوا وجمعوا لهم قرشين طلعوا برا الديرة وقاموا الله لا يخزينا ..يخربطون و اعقلهم يقومون يصلحون غلطتهم اذا توهقوا .



العجوز1 : عهه ( عهه دعوة شينة الله اعلم المراد بها الاصابة بالعاهة أو الموت ) حسبي الله عليهم بنياتنا الصاينات العفيفات اللي كل واحدة تقول الزين عندي ..بايرات عنسوا وذولي طايرين على وجيههم يجيبون لنا من برا .



العجوز 2:أي والله وشوله بس عشان المرض حسبي الله على هالدشوش ..عندتس مثلا هالمطيور طار وجاب هالبرصا والله لو ترفعين غطوتها انها مو ذاك الزين بس ناس مافي راسها عقل واذا نصحتيهم قالوا بيضا وبيضا مالت عليهم ..ياوالله يا أم محمد ان بنيتي بسمة ابيض منها بس وش نقول عاد .



العجوز 1: هوووو بتعلميني ببسمة بنتك زي جهيّر بنتي البياض شاقها شق لا وجرح ما خلق ربي في حلاهم بس يا وخيتي نمونة هالشين تلقين أقاربه رادينه عن علم خايب فيه يوم ردوه أقاربه زوجوه أهله واحدة ماهي من ثوبهم ..ولا هالسحنة كفو بنات حمايل ... ايه بس كفوه هاللبنانية .



أنا: اقول يا ست الحسن والجمال ..ترى المدام سورية مو لبنانية وانتي الثانية يا كيلوباترا ...وش قالوا لتس ماخذها من مرقص ترى هي في ديرتها مثلها مثلتس بنت عوايل ..ثانيا كل واحدة تشيل وتشدخ في بنتها ...هالحين من سمعكم جوليا بطرس وباسكال مشعلاني ..الا كل واحدة ولا الله يستر على بنياتكم ..اجل بنات لهم شنبات وطالع في يديهم شعر واذا قلت ليه قالت لك من الحر ....والا الجينزات ما يدخلونها الا بفازلين ...وفوق هذا كله الواحدة مهرها فوق خمسين ألف وتبي القصر الفلاني لعرسها علشان بنات خالاتها وعماتها البراميل يطامرن فيه وتبي طقاقة بخمسة وعشرين ألف اذا كانت خايسة ..لو مشغلين استريو يكفي ..اصلا من شاف رقصهم تحسف حتى يصفق ..وتبي شقة وشغالة وكل أربعا وخميس عند أهلها تجتمع مع أخواتها ..موتوا حرة هذي عندي سبع أيام في الأسابيع حتى أيام اللي وش اسمه نمشيها بوس ..انقهروا يا عجز أبليس ..



العجوز 1: هو هو وش بلاك من قال لك اننا نحتسي فيك من زينك ولا من زين هالقطوة اللي معك لا وملفلفها يعني هي سعودية ايه من التسذب.



أنا: لا والله ما تحكون عني أجل من تحكون عني ساعتين من يوم جيت من عند محل تومي الى دبنهامز وأنتم دودودو فيني وفي هالضعيفة .أنا اللي قاهرني من لعب عليكم وقال لكم هنا شي بيناسبكم ..راس مالكم المعيقلية وان تطورتوا روحوا شارع الثميري اشتروا ديرم من البسطات اللي هناك.



العجوز 2: أعوذ بالله منك من درى عنك توكل على الله بس صحيح اللي على راسه بطحا ..نحكي عن ولد جيراننا تزوج بنت روسية .ثانيا دوودودو ولا مو دودودو اقضب يد مرتك لا تضيع ومالك شغل بالناس .



أنا: امشي يا حبيبتي يا هويدا قدامي خلينا نخلي هالسوق لهم ..خوفي أكح يموتن هالعجز وأبلش بديتهم ...ريحة الديرم واصلة لآخر السوق ...على فكرة يا نينا وريتا في أخر دبنهامز فوق قسم المايوهات منزلين أطقم بكيني ووووه موت أحمر لايقة عليكم لوق ..وجيه ما حلاها ربي مالت عليكم.

الى هنا وينتهي الجزء الاول

بقلم / بلاك هورس ..

.........

.....






صورة المسخ

قيل عن هذه الصوره انها وجدت عند شاطي ارامكو في السفانيه وهي من الشائعات التي تظهر هنا وهناك بين الحين والاخر



!!!!!