شاب راسي عـالم ما عرفت لـه اتجاه

شاب راسي عـالم ما عرفت لـه اتجاه
مـن تحـرينا بـه العـقل عود للجهل
الصغير يهمل العود ما يسمع حـكاه
والكبير إلا حـكا قلت سـنه مـا كمل
لو تخاطب طاعن السن تبحث ما وراه
شفته أصغر عقل وادراك من عقل الطفل
كلهم مـن صاحبه واصل غيضه مداه
ويجـعلون الكلمة الهـينة كبر الجـبل
كــان ما بريوا فأنا طالع منهم براه
مـن جفته الدار شلـع خيامه وارتحل
تصعب العيشة مـع عالم ذا مـستواه
كـل شي تجـتهد فـيه تابى بالفشل
كل ما قلت انت حضوا على فرض الصلاه
فتشوا دعواك واللي مضى لك من عمل
ما يعرفون القـوانين وسـلوم الحـياه
يظلمون ويبهتونك بشي ما حصل
والرفيق اليـوم يشـتك في زاده ومـاه
لو تجيب له العسل قال لك ما هو عسل
الحلـيب أبيض وهوداه من تحت الدواه
لو تذوقه ذوق ياتي لك بسبع العلل
كـاتم جـوه ومـتغير عندك هـواه
وانت لا ازعلته ولا جيت في درب الزعل
لا يبي شوفك ومعروفك الماضي نسـاه
عقب ما هو كان يضر برفقتك المثل
عقب ما انا افرح بشوفه ويسعدني لقاه
انتزح من عقب ذيك المحبة واعتزل
لو تجي تهـديه وتحـاوله يفـهم خطاه
لا تأثر في كلامك ولا عنده زمل
ما تعرف الرجل ويبين طـيبه من رداه
كون بالشدة يبين الحديد من الذحل
الله أكبر كيف ترجي سحاب من سماه
عالم عما يقولون ما فيهم خجل
الفتى لا قـل دينه وقـل الله حـياه
جات به نفسه تقوده على شين العمل
كل مـن وده بفرقاك لا تجـري وراه
عنه غير خط ممشاك والدنيا سهل
من تنزح عن جنابك وبين لك جـفاه
لو تعدل يابس العود ما زيد انعدل
كم هبيل في عروض البشر تدرج رحاه
كل ما جيت انت تطفي محركه اشتغل
كل ما نورت دربه يـعود في عـماه
حطك انت مضيع الدرب وهو اللي يدل
وابن عمك لا تقول إن معك منه غناه
غير عنه احفظ لسانك ورجلك لا تزل
الضعيف يروح حـقه وينزل في حمـاه
لا تضاعفكم خصيم بساحتكم نزل
ادمح الزلات والعيب لا تكشف غطاه
خله يساعد زنودك على حمل الثقل
إن نـواك بقطعة الوصل لا تقطع رشاه
التفرق ذل والعز في جمع الشمل
خاب ظـني في رجال لهم وجـه وجاه
لا سأل هذاك عن ذا وهذا ما سأل
عيشة الوحـدة للإنسان ما فيها طـراه
ما درا انه بيتوفى وشغله ما كمل

الشاعر/عامربن حمد بن نوطان المري (رحمه الله)

الله يرحمه ويسكنه اعلى الجنااان
والله انه شاعر ومبدع ،،،ماشاء الله تبارك الله

قصيدة اتسمت بالصدق بعيدا عن التزييف والخداع وابدع في وصف المتناقضات،،،،ووصف واقعنا وحال الناس بالزمن الحالي وفعلا هذا الزمن يشيب فيه الطفل (من عدم احترام الكبير وجهل الكبير والعالم اللي تسوي من الحبه قبه والرفيق وماأدرئك مالرفيق وهالزمن صعب العيش فيه واذا حثيتهم على الصلاه رجعوك للماضي و..و...وو)،،،وختمها بحكمة جميلة
عيشة الوحـدة للإنسان ما فيها طـراه
ما درا انه بيتوفى وشغله ما كمل

الله يرحمنا برحمته نشتغل بالدنيا ونموت وماكملنا شغلناا ،،،الله يرحمه يااارب رحمة وااسعة

ملكة الله يسعدك دنيا واخرة ولايحرمناا منك ياارب وقصيدة ذووق مرة اعجبتني

شموع
اسعدني مرورك

.................

...

قصيدة لامست الواقع
واشتملت على الكثير من الحكم


ابدع الشاعر
واحسنتي الاختيار



...

كلمات مليئة بالحكم

تحكي عن واقع موجود

رحم الله الشاعر وعفى الله عنا وعنه

اختنا ملكة اختيار في محله

ويعطيك العافية ,,,

	المشاركة الأصلية كتبت بواسطة wafei

	................. ... قصيدة لامست الواقع واشتملت على الكثير من الحكم ابدع الشاعر واحسنتي الاختيار ...

يسعدك ربي يااوفينا

	المشاركة الأصلية كتبت بواسطة أبو خـ البجادي ـالد

	كلمات مليئة بالحكم تحكي عن واقع موجود رحم الله الشاعر وعفى الله عنا وعنه اختنا ملكة اختيار في محله ويعطيك العافية ,,,

الله يعافيك ..