مذكرات طالبة جامعية (1)

مذكرات طالبة جامعية (1)


صباحكم سعيد يارب ..

في زحمة الاختبارات قررت إني أكتب مذكرات طالبة جامعية ..
أرجعوا هالرغبة إلى ما شئتم من الأسباب , حتى لو كنتم تفكرون أن السبب زعل على قرب فراق الجامعة لمدة لا تقل عن ثلاث شهور , وأنا وكل اللي يدرسون ناجحين قولوا يااااااارب ..

خلال الأيام الجاية رح أمضي في كتابة سلسلة من المذكرات واللي رح تحتوي على أحداث واقعية 100% , مو شرط كلها صارت معاي , لكن حصلت وعاصرتها ..
في أشياء كثير عانت منها دفعتنا والدفع اللي قبلنا , لكن حصلت تطورات بالجامعة مؤخراً عالجت بعض السلبيات وفي طريقها إن شاء الله لمعالجة البقية ..
لكن هذا ما يمنع من إني أتكلم عن معاناتنا
وفيه مشاكل وصعوبات تواجه كل بنت انتقلت من مجتمع المدرسة المحدود , إلى مجتمع الجامعة الغريب عنها بكل تفاصيله , باعتبار أنه البنت في مجتمعنا نادر جداً ما تندمج مع مجتمع خارج نطاق الأقارب والمدرسة ..
أتمنى بالفعل تكون حاجة تستحق الوقت اللي رح تقضونه في قراءتها ..



كونوا معنا ..

الشمـــــس

[c]حياااك الله ياشموسه

بالتاكيد راح يكون موضوع مهم وشيق
وبالتاكيد راح يفيد طالباتنا العزيزات والي راح يلتحقون مجددا بالجامعه
واللي هم بحاجه ماسة لمعرفة الاجواء الداخليه للجامعات او الكليات
يعيطك العافيه يارررب
وكل الدعوات لكم بالتوفيق والنجاح
و راح نكون بنتظار مذكرات الطالبه الجامعيه[/c]

[c]
....
تحذيـــــــــر ..
يمنع منعاً باتاً نسخ أو اقتباس أي جزء من هذه المذكرات دون إذن خطي من كاتبتها ..
.....



مستجــــــــــدة
[/c]

أول يوم لي بالجامعة .. الجامعة اللي كنت أشوفها خطوة أولى في الطريق اللي رح يوصلني للي أتمناه ..
جا وقت تخرجي من الثانوية في الفترة اللي بدأ المجتمع يتخلى عن نظرته السلبية للجامعة وكل من ينتمي لها من البنات ..
إلى الآن مني قادرة أنسى سالفة البنت اللي قدمت على كل الكليات والجامعات الموجودة هنا بالرياض , أيام ما كان مسموح تتقدم بصورة من شهادة الثانوية العامة , وما قبلت في أي كلية أو جامعة باستثناء جامعة الملك سعود والقسم اللي هي كانت تبيه , ورفضوا أهلها إنها تداوم هناك , وبالتالي جلست بالبيت من دون دراسة , والسبب >>>
|107| " ما عندنا بنات يدرسن بالجامعات " !!! |107|

وجاء تخصصي معارض لرغبة الوالد نسبياً , اللي ما وافق إلا بعد ما أقنعته بإن التخصص هذا هو اللي كنت أتمناه من يوم كنت بالمرحلة المتوسطة وما جبت النسبة اللي جبتها إلا عشان أقدر أتخصص في المجال اللي حبيته من دون منة من أحد , يا هو ولا بلاش من الجامعة كلها , ما رح أقدر أمشي في شي ما اخترته ..

طبعا كنت راسمة لي خطة بعيدة المدى , رح أتخرج وبامتياز , ورح أتعين معيدة , ورح أكمل دراستي حتى أحصل على أعلى شهادة ..
كانت هذي باختصار خطتي , وخطة كل بنت تعتبر نفسها طموحة !!
يعني تخيلوا معي كل بنت تجي متحمسة للجامعة تقول أنا رح أصير معيدة , تخيلوا لو صارت كل بنت معيدة !!!
رح نتابع سوى ونشوف وش نهاية هالحلم ..

أول يوم لي بمكان ما أعرف فيه أحد إطلاقاً , طبعاً كان يوم لا ينسى , مضت ليلته وأنا عاجزة عن النوم , طلعت الشمس وجلست أحسب الدقايق متى تجي الساعة سبعة ونص عشان أطلع ..!!
ومر الوقت , وطلعت من البيت , ووصلت الجامعة .. مكان جديد علي كلياً ..
وااااو وش هذا كله .. كيف أعرف طريقي الحين |13| ؟
وين أروح ووش أسوي ؟!!
سؤال .. ما رح أسأل أحد .. سبق وإن سمعت سوالف فيها تريقة على المستجدات , ومستحيل أسمح لأحد يتريق علي ..


طبعاً إلى الآن أنا واقفة عند البوابة , وعالم داخلة , وعالم طالعة ..
لوحات إرشادية .. ما فيه ..
خريطة بمباني الجامعة ما فيه ..
مكاتب إرشاد سياحي - أووووبس عفواً - أكاديمي .. ما فيه ..
أحد داج مثلي كمان ما فيه ..
أوكي فكرة .. خلاص قررت أمشي مع هاللي يمشون وأشوف وين بيودينا الدرب ..

مشيت مع مجموعة من البنات شكلهم يعرفون بعض .. لا تخافون مو وراهم بالضبط عشان ما يبين شكلي إني ضايعة :D ..

وش هذا ؟ كل هذا طريق ؟!
ليه أتخيل نفسي في شارع الحوامل ؟!
المفروض مسوين لهم مكتب تأجير سياكل , سكوتر , دباب للمستعجلة .. الوحدة مننا تستأجره أول ما تدخل , وتسلمه لهم لما تجي تطلع ..
مشروع رح يدخل ربح أكثر من المعقول .. وطبعا مافيه غير شركة (( ..... )) اللي هي أصلاً محتكرة الجامعة باللي فيها وأنا متأكدة أنه لو يسوون تصويت ياخذون آراء الطالبات في مستوى خدمتها , كان طلعوا بزيرو من الأصوات لصالحها ...
لكن من متى أصلا اهتموا بآراء الطالبات ؟!!

نرجع لموضوعنا .. كنت أمشي ورا البنات وعرفت أخيراً أنهم يتجهون إلى مكاتب الإرشاد الأكاديمي لقسمهم عشان ياخذون ورقة كبيرة اسمها ((إشعار تسجيل المواد))
أوكي .. بس هذا مو قسمي .. ما علي إلا إني أدور على هالمباني حتى أوصل للمبنى الصحيح ..
عادي جداً حتى لو كان في الجامعة 21 مبنى .. لكن المهم إني ما أدخل أماكن معزولة |116|

أبشركم وصلت .. ولقيت ورقة مقاس 4A مكتوب عليها بالقلم الفلوماستر إشعارات التسجيل للمستجدات غرفة 76...
وااااو أخيراً لقيت لوحة إرشادية ..

وبعد ما دخلت الغرفة 76 ..
أنا : لو سمحتِ ...
الموظفة : نعم ؟ مستجدة ؟؟؟
أنا : إيه مستجدة ..
الموظفة : كم رقمك بسرعة ..
أنا : آه رقمي ... اممممم ... امممممم .. أأأأأأ .. مني حافظته ..
الموظفة : شلون منتي حافظته , ما تعرفين أنه الرقم الجامعي أهم من اسمك ؟!!
أنا : ما أحد قال لي ..
الموظفة : طيب شلون تبيني أطلع إشعارك الحين .. ؟!!
أنا : امممم .. عفواً .. بس أقول لو .. لو يعني دورتيه بالاسم , أو خليتيني أنا أدوره , ماينفع ؟
الموظفة : إلا ينفع .. تفضلي دوري , ولما تلاقينه وقعي هنا , واكتبي كل البيانات ..
أنا : طيب .. شكراً ..
الموظفة : ....
أنا : شكـــــــراً ...
الموظفة : ...
(( ولاطالعت فيني حتى , معقولة تكون ماسمعت ؟!! ))

لقيت إشعاري أبشركم .. ووقعت , وما طلعت إلا وأنا متأكدة من إني عبيت كل البيانات .. وبغيت أعبي بيانات اللي بعدي من كثر ما أنا أبي الفكة منها بس ..
طلعت من عندها وأنا ودي أبكي .. أنا شسويت لها عشان تصرّخ علي كذا ..
ما يكفي إني جالسة ساعة أدور في هالجامعة أدورهم ..

دق جوالي .. ميييين .. بابا حبيبي .. صوت لأحد أعرفه .. يا الله أنا في السعودية |121| ..
على بالي في المنفى والله ..
الوالد : هاه حبيبتي شسويتِ ؟
أنا : أبشرك لقيت الإشعار وأخيراً ..
الوالد : بشري كيف الجدول ؟
أنا : توني مابعد شفته بشوفه بعدين أدق عليك ..
باي ألحين ..
الوالد : فمان الله ..

أطالع بالجدول وأحاول أفك الرموز .. والحمدلله طلع فيني شوية مخ و فهمتها .. وقدرت أطلع الأوقات والأيام ..
وش ذا ؟!!
محاضرة 101سلم من الساعة 1 إلى 3 العصر ... !!!!
وأنا وش يجلسني بالجامعة إلى العصر ...

اممممم سمعت أنه فيه بنات يغيرون جداولهم , ليه ما أروح أحاول أغيره ؟!

بس برضو هذي يبي لها بحث وتحري حتى أقدر أتنصت على البنات وأعرف اللي تبي تغير جدولها وين ترووووح ؟!

تمام هنا بنات متحمسات يتكلمون عن مشاكل في الساعات .. مشيت ورا وحدة منهم .. وصلت لمكتب مكتوب عليها رئيسة الإرشاد الأكاديمي ..
تمااااااام .. وصلنا..
مسكت دور بالصف .. ووقفت ساعتين ونص (( والله ما أكذب ))
دخلت عليها ..
الدكتورة : إيه يا بنتي .. إيه مشكلتك ؟
أنا : أبداً يا دكتورة بس أبي أغير موعد المحاضرة للصباح ..
الدكتورة : والسبب ؟
أنا : ما أبي أتأخر للعصر ...
الدكتورة نزلت نظارتها وركزت أنظارها علي , وابتسمت ابتسامة ما تبشر بالخير .. : إديني جدولك يا بنتي ..
أعطيتها الجدول .. وقالت : إيه ده إنت ربعميه وتسعطاشر ؟!!!
أنا : والله ؟
وشو ذا ؟!
الدكتورة : يا بنتي إنت مستجدة ومش عارفة حاجة .. إحنا ما بنغيرش جداول للمستجدات
تفضلي وما تعطليناش ..
أنا : طيب أنا آسفة ..

وطلعت مو مقهورة من شي قد مني مقهورة منها لما قالت لي مستجدة ومش عارفة حاجة ...

طيب ألحين وش تتوقعون مني بالله ..
تتوقعون إني أهج من الجامعة للبيت .. البيت جنة والله ..
طبعا طلعت باتجاه البوابة ورجعت أمشي الطريق اللي مشيته الصباح , لكن فيه فرق .. هالمرة مشيته الظهر , يعني الشمس مررررة كانت باردة .. وطبعا جامعتنا الحبيبة ما شافت انه الوضع يستاهل تظلل لنا الممرات أبدا .. يعني عادي توصل للمكان اللي تبيه وتحس ان كبدك لايعة و راسك مصدع , يعني طبياً أصبت بضربة شمس ..
وصلت وأنا كارهة نفسي و حطيت الشنطة على أول كرسي في صالة الانتظار ..
وطلعت العباية أبي ألبسها , لكن ما قدرت أوقف على رجولي من كثر ما أنا شايلة هم هالجامعة وشايفة إن المسألة ماهي سهلة ..
جلست جنب شنطتي .. إلا وحدة تسألني .. لو سمحتِ إنتِ مستجدة ؟
رفعت راسي وأنا في نيتي إني أخنقها بالطرحة اللي معاي |113| ..
بس تفاجأت بوجه ملائكي قدامي , بابتسامته الهادية |16| ..
وبعد ثواني صمت , جاوبتها وقلت لها على التخصص كمان ..
الملاك : أنا بعد مثلك , أخذتِ جدولك ؟
أنا : إيه , إنتِ ؟
الملاك : أخذته .. , وش اسمك ؟
أنا : الشمس , انتِ ؟
الملاك : ملاك
أنا :اسم على مسمى |121|
ملاك : شكراً .. في أي مدرسة كنتِ تدرسين ؟
أنا : دار السلام ..
ملاك : تعرفين وحدة اسمها .. ولاء ال...
أنا : أعرفها , في ثاني ثانوي صح ؟
ملاك : إيه هذي بنت خالتي ..
أنا : صحيح , صدفة حلوة ..
إنت وين كنت تدرسين ؟
ملاك : في التربية الإسلامية ..
أنا : آها .. تعرفين وحدة اسمها لما ال...
ملاك : إيه كانت معاي بس سجلت في قسم الإنجليزي .. تعرفينها ؟
أنا : سبحان الله .. شفتِ كيف الدنيا صغيرة .. !!
هذي كانت صاحبتي بالمتوسط وإلى الحين أكلمها وأقابلها بين فترة وفترة ..
ملاك : تجين نشوف القاعات وين , ولا بتطلعين ..؟
أنا : بطلع الحين خليها بكرة ..
ملاك : عطيني رقمك لو معك جوال أو البيت لو ما فيه مانع
أنا : لا شدعوة .. تفضلي هذا هو الرقم ..
يالله عاد أنا أستاذن ..
أشوفك على خير .. باي ..

طلعت من الجامعة وأنا مستغربة مرة من نفسي .. كيف ارتحت لها الإنسانة على طول كذا , مو من عادتي أدخل في حوار طويل مع أحد ما أعرفه ..
أبداً ما قد سويتها قبل هالمرة .. ونادر جداً أرتاح لأحد بهالسرعة ..
ملاك وسالفتي معاها نسوني الهم اللي كنت شايلته .. حتى وصلت للبيت وعلى السرير على طووووول نومة إلى المغرب |105| ..



انتهى ..

أول يوم دراسي في عام 1419هـ

....


الشمـــــــــــس |117|

اهلين..الشمس..

الحمدلله بالسلامـه..

فكره جميلـه..يتضح من خلال طرحك..الفـائـده.

استمري..

ربنا يوفقك..

شكراً


تحياتي

ياهلا فيك الشمس منوره وموضوعك راكز عن جد ومفيد استفدنا من الطالبه المستجدة وفي انتظار بقية اليوميات

اما خوش مغامره..:p

يعيطك العافيه شموسه
من صدق الي يشوف حوسة الغير تهون عليه حوسته..
مع اننا وضع الكليه مكان عاجبنا
الا إنه بصراحه يهون عن وضع الجامعات والحق ينقال..ماقصرو معنا..من اول يوم.دخلنا فيه الكليه امسكتنا لجنة الارشاد الاكاديمي..
وهاتك يافر في ارجاء الكليه مابقا شي ما دخلونا اياه..
الا مكتب العميده..<<(والله من وسع الوجه مستجده وتبي تدخل مكتب العميده..صدق ماعندك سالفه )

ما اقول الا الله يعين طلاب وطالبات الجامعات
اثرنا بنعمة وحنا ماندري

يعيطك العافيه شموسه علىالاسلوب الشيق
ومهب غريب عليك..وبانتظار الحلقه الثانيه..

تسلمين


وبانتظاااار المزيد





بالتوووووووووووووووووفيق:D

ههههههههههههه شموووووووووسه.. انا اول ما دخلت الجامعه كنت مثل الهبله....:D بس اول يوم تسجيل ككان الوالد معي.. وصلني لحد اداره القبول والتسجيل :D

<---------------------- لو بعدها بالروضه :D

بس اقولج سر.. انا حتى اليوم مب حافظه رقمي السري... صاروا حافظين شكلي .. كل ما يشوفوني على طول الرقم :D :D :D

وبعدين احمدي ربك انه لحد العصر... والله امس رجعت من الجامعه الساعه 11 بالليل ورايحه لها سبع ونص

بس سوالف الجااامعه وااااااااااااااايد.. ممكن انضم وياج واحكي سوالفي :D :D

صباح الخير شموسه
تراي متابعه هالمذكرات

اكملي
ونحن معاك
اختك

الشمس
اسم مشرق كله تفاءل وامل
وموضوع قيم ومذكرات حنا بإنتظارها انتهينا من الجامعه وهمومها
ربما مذكراتك تفيد المعذبون في الجامعه ..الحمد لله على البشرا انا الاوضاع تحسنت وليس من سيء لأسوء كما هو الحال في جميع الامور

مشكوره الشمس استرسلت لان الموضوع شدني وتعرفين اخوك مشاغب وخاصة مع الحروف .

الشمس دمتي دائمة الإشراق .
أخوك المشاغب:D