فجر الجروح

كذا يعني .. كذا فجأه .. تغير كل شيِ فات = كذا زالت مواثيق الغلا و الحب من ذاتك
كذا كنتي .. كذا صرتي .. كذا خيبتي الهقوات = كذا .. والا كذا .. ضيعتي دروبي و خطواتك
انا مل الامل فيني .. يدور للشفاه اصوات = عجز صوتي ينادي لك ..قضى قلبي من سواتك
نصيتك و الوفا زادي .. رحلتي و القلوب اشتات = مصايب و الرجا خايب تقود خطاك رغباتك
كبيره طعنتك هذي .. تعودتي على الطعنات = غريبه حيل ذا المره ولا هي مثل طعناتك
سالتك بالذي خلى عيونك تذرف الدمعات = تكف الدمع لاتجني على خديك دمعاتك
انا ماقد خبرت اني تعمدت اجرحك بالذات = وانا ماهمني غيرك اعيش من اجل مرضاتك
سرقتك بالزمن لحظه وعشتك بالفراق اوقات = ولا ادري وش بقى لي بالعمر من دون لحظاتك
احبك .. رحت ادوّر في قواميس البشر كلمات = عجزت القى حروفٍ تستريح بصدر كلماتك
احبك يا ندى فجر الجروح و صحوة العبرات = احبك كلمةٍ تبكي معانيها على شفاتك
تظنين الوفا كلمه عجب واصل الوفا وقفات = صغير الشي في ظنك يصير اكبر معاناتك
تردين الخطا يمي تزيدين الالم شرهات = وانا صمت الشقا فيني حكى من كثر شرهاتك
توالت كلها فجأه تعاظم بالحشا صدمات = يجي يوم و تواري شمسنا من ليل صدماتك
ذكرتك .. و الدروب اللي تعانق خطوتك بسكات = وانا مازلت اسافر بين نظراتك و ضحكاتك
ذكرتك .. و انطفى جمر الكلام و ذابت الشمعات = سهرتك و استفزيت النجوم بليل خصلاتك
تعالي .. و اذرفي دمعك على قلبٍ كثيره مات = تعالي .. و اخذي الباقي يفيد لوقت عوزاتك
تعالي .. لاتخلين السنين المقبله تقتات = من افراحي و لحظاتي و طرباتي .. وسبحاتك
تعالي .. و اوعديني .. لا شقا .. لا كذب .. لا غلطات = ترى ماللصبر باقي على كذبك وغلطاتك
تغيرت ولا ادري وش جرى .. وش غير النيات = سألتك و اعتكف برد الجواب فـ معطف آهاتك
تقولين انت في راحه .. و اقول من القهر هيهااااات = انا لاجيت للراحه .. تطاردني مسافاتك

كالعاده .. جمال لايوازيه جمال

سلمت الايادي سديم

تحيااتي

محمد السبيعي

سرقتك بالزمن لحظـه وعشتـك بالفـراق اوقـات
ولا ادري وش بقى لي بالعمـر مـن دون لحظاتـك

..........................................

ابداع و جمال

هذا ماتعودناه منك ياسديم

صح لسان شاعرهاااا و تسلم يمينك


تحيااااااااااااتي

السلام عليكم ورحمة الله وبركاته
الأخـت المتألـقة ( سديم )
هلا ورحب فيك
أختيار في غاية الروعه والجمال
وبدون أستغراب فهو من أختيارات سديم الإبداع والتميز
صح لسان شاعرها
وسلمت يمينك التي نقلتها لنا لنتمتع بقراءتها
لاعدمناك ولاعدمنا إبداعك المتجدد دائماً
وتقبلي خالص تقديري واحترامي؛؛

يسلمك ربي .. محمد السبيعي ..

شكرا لحضورك الدائم

الليدي عمشا

يسلمك ربي

وشكرا للمتابعه

وعليكم السلام و رحمة الله وبركاته


الله يسلمك ويعافيك .. عازف الناي ..

شكرا للمتابعه والدعم الدائم