مائدة الافطار

السلام عليكم ورحمة الله وبركاته

مساكم الله بالخير والصحة والعافية .... وما ادري كم ساعة باقية لكم على مدفع الافطار ... لكن الي اعرفه انو احنا هنا في باريس بتوقيتنا دحين الساعة وحدة ونص الظهر يسير باقي تماني ساعات ع الافطار ان شاالله

طيب يا جماعة يمكن كتيييييير مننا يفتكر الشيخ الرائع والعظيم الي تعودنا في فترة طويلة على تواجده معانا على مائدة الافطار .... غيبه منذ عدة سنوات عن موائدنا الموت .... رحم الله شيخنا الفاضل " علي الطنطاوي " وتغمد روحه فسيح جناته وسائر علماء المسلمين وعامتهم .... أسلوبه البسيط والمتسامح واللين وطرائفه الجميلة .. كان من أوائل من أدخل الأسلوب المتساهل في الدعوة الى الله يشاركه علماء آخرين مثل الشيخ عبدالعزيز المسند ..... وآخرين فما نراه من دعوة مبنية على التساهل الآن من بعض الدعاة ليست وليدة اللحظة بل قادها علماء من حملة العلم والفقه ...

ليس هذا هو موضوعي بل هي كلمات على هامش الموضوع أحببت أن أتصدر بها لمكانة العلماء الافاضل في قلبي ...ولأنني أخذت اسم الموضوع من برنامج شيخنا رحمه الله ....

على مائدة الافطار .... موضوع دئما ما اسأله لكل من أراه في رمضان ؟؟ ليس سؤال لحاجتي الملحة للاجابة بل هي حاجتي لاشباع الفضول ....
وهو ماذا تقدمون على مائدة افطاركم في رمضان ؟؟؟؟

قد يجيب البعض باجابات سريعة لا أجد فيها حقيقة اشباع لهذا الفضول .. فأنا من عشاق التفاصيل .... والاجابات السريعة قد تغيظني فهي تلطمني لاسكاتي ..... او الاجابات المبهمة والعائمة التي تثير التساؤلات أكثر من اشباع الفضول ...

كل واحد فينا ينحدر من مجتمع مختلف تقريبا في بعض العادات والتقاليد ومن اسر مختلفة بذائقاتها .. وقد يكون لكل شخص منا ذوقه الخاص المختلف حتى عن أسرته فتكون مائدته مختلفة عن موائد بقية أفراد عائلته ....

من حبي وعشقي لتقارب الثقافات وصهر الجليد بين الطبقات ... وتمازج الناس ببعضهم أحب أن أتعرف كثيرا على عادات كل واحد هنا في رمضان من خلال موائد الافطار والسحوور ....

اذا كانت الاجابات صعبة على البعض ويحس انها طويلة .... فليس ضروريا ان تكون الاجابة في مشاركة واحدة فقط او في يوم واحد لكن اتمنى ان يكون الجميع بنهاية شهر رمضان قد أخبرنا عن موائد افطاره وسحوره والعادات المتبعة في تقديمها ...

الجوانب التي يهمني كثيرا معرفتها :
- عند الافطار هل يتم تقديم الوجبة دفعة واحدة مع الآذان أم يتم تقسيمها لفترتين قبل صلاة المغرب وبعدها
- هل الوجبة الرئيسية للافطار تتأخر الى بعد صلاة التراويح أم انها مع المغرب
- هل يجب تواجد جميع أفراد العائلة على الافطار
- ماهي الأطباق التقليدية التي يتم تناولها على موائد الافطار
- ماهي المشروبات التي يتم تقديمها
- ما اول ما تأكل وتشرب عند الآذان
- ما هو الطبق الذي لا يمكن الاستغناء عنه غالبا في موائد الافطار
- ما أطباق الحلوى المميزة لموائد افطاركم
- أي الوجبتين أهم الفطور أم السحور
- ما موعد تقديم وجبة السحور
- هل هناك بروتوكل معين أو عادات يجب اتباعها خلال الفطور او السحور
- من الذي يقوم باعداد الوجبات الرمضانية في بيتكم
- ما الوقت الذي تخرج فيه من البيت لشراء بعض الأغراض للفطور مثل الخبز أو التميس أو اللبن أو بعض الضروريات لوضعها على المائدة


أحبتي هي محاولة لمزج العادات بيننا والتعرف على بعضنا أكثر .... ما احب معرفته عن الافطار يجري على السحور .. فأتمنى معرفة موائد السحور بالمثل ....

لا أدري هل هو موضوع مكرر أو سبق طرحه .. لكن ادارة الوئام لن تقصر في اخباري بذلك

من أريده أن يجيب ؟؟!!!
كل شخص يجد في نفسه الثقة ... كل من يعتقد بأهميته ... كل من يفتخر بعاداته ..... كل من يعتبر نفسه عضوا في الوئام

*بدون طلب عليكم لكن أخوكم عزابي في بلد غربة ... فلو واحد حابب يقولي وصفة لطبخة حلوة لا يبخل علي ...

تحية لكم يا وئاميين ..

الحجاج

موضوع رائع كالعادة أخي الحبيب

بما أنك صاحب الموضوع خلنا نبدأ فيك أجل ...

موضووع رائع ومميز

مو غريبة عالحجاج

لي عودة بعد الإفطار...

السلام عليكم ورحمة الله وبركاته

ههههههههههههههههههههه

أخويا الليث الأبيض ... رائع
والله انك صادق تبدوا في .... طيب يا سيدي حابدأ معاكم ...

بالنسبة لنا فأحب أعرف بنفسي بشكل مبسط ...
أنا أنحدر من أحد قبائل الجنوب من منطقة الباحة بالمملكة العربية السعودية .... تقطن عائلتي في مدينة جدة من زمان طويل يقرب مائة سنة تقريبا أكثر أو أقل ... فقد تكون عادات عائلتنا مزيج من هذه وتلك ... رغم حبي الكبير لاكتساب كل العادات الجميلة من جميع أصقاع الأرض وخص نص من وطني الحبيب السعودية والوطن العربي الجميل...

بالنسبة للفطور ....
فإن العائلة والوالد أطال الله عمره يرفض عدم تواجد أي شخص على المائدة ... فالمائدة في رمضان أو غيره شئ مقدس للعائلة ويجب تواجد الجميع ولكن في رمضان يجب بشكل كبير أن يكون الجميع على المائدة قبل الآذان .... خاصة لما يكون فيه بنات البيت لساتهم في المطبخ جالسين يجهزوا فالشي دا يضايقنا لأنو خلاص الكل لازم يكون موجود ...
بالنسبة لنا ... فهناك أكتر من توجه ... لكن حاتكلم عن منزل الوالد وبعد كدا أتكلم عن بعض الشذوذ الي حصل من بعض بيوت العائلة المتفرعة ...
بالنسبة في بيت الوالد الفطور يكون فطورين ... الفطور مع الآذان وبعدين نروح نصلي بالمسجد ولما نرجع يكون الفطور المهم ..... " بالنسبة لي متمسك بالشي دا لأنو عادة العائلة وأنا أحب التمسك بالعادات الي مافيها ضرر لكن عني أحب يكون الفطور كله مرررة وحدة قبل الصلاة والي يبغى يعرف السبب يسألني بعدين "
طيب الفطور الي مع الآذان عبارة عن شي خفيف " بالنسبة لنا احنا السعوديين " بس لما قلت للناس هنا قالوا دا كلو وخفيف ..
عبارة عن تمر ... ولازم تمر يعني لو التمر دا مو موجود ع السفرة أو لو أي واحد حط في فمه شي قبل التمر الله يعينه من الوالد ومن لسانه طول ما انت ع السفرة ... لازم تمر ولازم تكون تمرات فردية يعني هي السنة لكن عندنا سايرة بروتوكول ..... وطبعا القهوة ... والقهوة في رمضان نشربها لازم في فناجين " مدر " ما نشربها في الفناجين العادية ودي مخصصة بس لرمضان ... أبوية وأمي بصراحة يحبوا القهوة " القشر " وأغلبنا في البيت ما نحبها .. عشان كدا القهوة تكون قشر وبن .... زمان مررررررة لما كنت صغير كنا بس ع التمر والقهوة ... بس دحين مع الأجيال الجديدة يا بختهم من كدا 15 سنة سرنا نحط بعض الحلا بس مو كتير يادوب كل واحد قطعة وخاصة الكنافة ... في عندنا جيران حضارم .. الله يسعدهم ويذكرهم بالخير ... بيعملوا شي اسمه " خمير " بصراحة كانوا يرسلوه لنا في رمضان وتعلمت أمي وبعد كدا الشغالات كيف يتعمل وسار الخمير دا شي ضروري على مائدة افطارنا ... بس بصراحة أبويه مازال يحب خمير جارتنا الحضرمية ويفضله ..وبالنسبة لي أنا اللبن مرة مهم على الفطور لأني أحب التمر مع اللبن أكتر من القهوة خاصة وأنا صايم لأني أحس بارتواء من اللبن ....
دا خلونا نقول الفطور الصغير ... يمكن أكون ناسي شي بس لو افتكرت شي حاقوله بعدين ... لساته قدامنا رمضان بطوووله
نجي للفطوور الكبير ... :
بالنسبة لنا السمبوسة دي هي الطبق اللي لا يمكن الاستغناء عنو في الفطوووور الكبير .... والسمبوسة يا رقاق يا عجينة لكن في بيتنا نفضل العجينة على الرقاق وتكون عجينة بيتي وبصراحة أمي تر فض أحد يعملها غيرها ... الطبق التاني الشوربة ... وشوربة " كويكر " وبصراحة أنا ما احبها ... فساروا بيعملوا الشوربات التانية خاصة شوربة الدجاج بالكريمة ودي شي جديد وبصراحة ثانوي وبس يتعمل للبعض مو الكل ... بصراحة بكل بساطة فطووورنا هو سمبوسة وشوربة ... لكن الطبق التاني في الأهمية هو " الفول " فكتير ما يتواجد على مائدتنا ونخرج نجيب الفول قبل الآدان بنص ساعة لازم يكون حار وطبعا تلاقي مشاكل الطوابير والزحمة ...
أطباق تانية ... مكرونة الباشمل والفوتوتشيني ... والمصقع والشوشبرك ... كريمة الفطر ... بيتزا ... عيش باللحم ... صينية دجاج ....
يعني دي الأطباق الأكتر في رمضان ...الي قادر أفتكرها لأني من زمان ما فطرت بالسعودية وناسي والله اشياء كتيييير قاعد باحاول افتكر ...ومتأكد لو أمي والا احد اخواتي قريت كلامي حتقولي ... الي ما ينفع فيك الخير هو دا الي بس نسوي لك هو واحنا نعجن وننفخ ... ما اطول عليكم ... المهم اقول الأطباق الريئسية والضرورية
بالنسبة للمشروبات بصراحة التوت ...ههههههههه وافتكرت بصراحة حاجة .. كل سنة كنت اتضارب انا واخواني على انواع التوت ... كل واحد فينا يقول انو عصير التوت هو الأصلي والنص التاني يقول انو عصير التونو هو الأصلي ولين دحين ما استقرينا على قرار لدرجة انو خاطبنا الشركات المصنعة لمعرفة النتيجة .... ههههههه والله متخيل اخواني كمان عاملين الشي دا دحين .... لووووووول .. وكمان عصير سن كويك رغم اني دايما اقول التانج اطعم واحلى بس خلاص التقليد لازم يمشي .... ومن اهم العصيرات ولازم تواجده عصير " قمر الدين "
نسيت أقول انو الفطور الكبير مباشرة بعد الصلاة وقبل ما تبدا " طاش ماطاش "

طبعا نقعد نستعجل في اننا نخلص بسرعة عشان نلحق صلاة العشا والتراويح ولازم نصلي في مسجد بعيد ...
لما نرجع من التراويح .. عاد دي القعدة حقت التكييف والحلا ... طبعا زمان كان " الططلي " " للي ما يعرفوا الي هو " الكاسترد " .... و" الماسية " و " الجلي " .. بس دحين الحلا الأساسي هو ايسكريم بيسووه في البيت مرررة رووعة وساعات الكريم كرامل ... وطبعا ماتغيب القهوة هنا .... ودا وقت القهوة بالنسبة لي ... أو الشاهي فدا وقتي
طبعا حتسألوني عن الكبسة والرز ... بالنسبة لهذا الطبق فغالبا ما يتواجد على مائدة السحووور...
لكن بصراحة مو طبق رئيسي وما يتواجد الا في المناسبات أو لما نشتاق له ...
السحور غالبا نتسحر في وقت متأخر جدا ... يعني قبل آذان الفجر بساعة الاربع الى نص ساعة
غالبا على مائدة السحور .. يكون شي خفيف يعني تقدروا تقولوا " نواشف " بيض .. جبنة ... لبنة ... زيتون ... قشطة ...
غالبا كدا ...
ما يغيب عن موائد رمضان رغم انو طبق ريئسي في موائدنا في غير رمضان .. السمك والوجبات البحرية ... يمكن لطاقته الي يولدها في الواحد ما تنفع للصايمين في رمضان .... المشروووب الأساسي في السحووور هو الشاهي ..

ما ادري اذا قدرت اجيب كل شي .. بس لو افتكرت شي حاقوله لكم ..

ما نتحرم منكم ومن تواصلكم

الحجاج

ما شاء الله عليك يالحجاج

كل الحاجات اللي ذكرتها يوجد منها نوعية على موائدنا

وأعتقد الحال من بعضه ..

صحيح يوجد اختلاف بسيط من حيث نوعية الأكلات

لكن لا يوجد فوارق تذكر ..

تسلم حبيب الكل ...

مووووضوووووووووووووووووووع رااااااائع ..

>>> انا يبيلي قعده مع طبخاتكم ذي عشان اعرف شنو أهي ..

هههههههههههه ..

راااااااااائع خيي الحجاج ..

تسلم دباتك على هيك أجوبه.. بس شلون الحين وانت بالغربه ؟؟؟

>>> هذي اللي تبي تتكفخ اليوم .. بعد كل هالردح والكتابه وتعصير المخ ..

تبيه يكتب ثاني هههههههههه


^_^ ..


ننتظر الباقيييييين ..

لي عوده ..

مشاء الله عليك الحجاج موضووع رااااائع
اعتقد مافي اي اختلاااف بس الاختلاف بمسميات الاكل ولا العادات كلها وحده تقريبا
لكن في وقتنا هذا صارت العادات والتقاليد الجميله في شهر رمضان شبه معدومه
لكن ماننكر وجود بعضها
افتقدنا للبرامج المفيده مثل البرنامج الي ذكرته على مائدة الافطار فعلا كان برامج مفيد ورائع ...
مشكور الحجاج على هذا الموضوع الراائع خليتنا نحس باجواء رمضان مشاء الله عليك
لي عوده ...

ممماااااشاء الله عليك حجاج
مقدمه راااائعه اخذتنا شوي مع برنامج ما ئدة الافطار اللي توني اعرف اسمه يمكن كنت اعرفه بس نسيته ..!!
قدرت تسسلل بسلاااااسه للي تبي...

وتسترسل وتنتقل من محور لمحور بترابط عجيب
في الاول ذكرتنا بالشيخ الطنطاوي رحمه الله مع اني وقتها ماكنت واعيه للي يقوله بس كان شي مهم ولاازم نتفرج عليه بعد الفطور
وانا كنت اعارض واحب المسلسل اللي بالقانة الثانيه حق البنت اللي اسمها ميشيل
يالله والله كان التلفزيون السعودي له طعم ذيك الايام ..

بعكس الآن والمسخره اللي بتسير والتسابق اللي بين القنوات مين يعرض قبل الثاني بصراحة اتخيلهم >>طبعا الممثلين

كأنهم كانو في سجن وفجأة طلعولنا من كل حدب وصوب وحنا مو قادرين نصدهم ...

سفرة رمضان طبعا غير سفرة اي وقت ثاني ..اووول شي فيها الزمزم والتمر الرطب
واكيد بتكون فيها اطباق موسميه ..اطباق مالها طعم ولا نكهة الا برمضان ..
زي السمبوسه وطبعا السمبوسه زي ماقلت بالعجينه او بالرقاق والشوربه والقطايف اممما الفول تكرم النعمه

لكن فيه ناس مصرييين الا يجيبوه طبعا ذولا اللي من عشاق الزحمة وصف الطوابيرعند الفوال ..

امممم حبذا لوكان ع السفره محشي لاني احب المحشي بكل انواعه ورق عنب ,,ملفوووف,,كوسه بس لازم يكون ع الطريقه المصريه يعني ناشف يتاكل بالملعقه
..
وبرضو المرقوق بس مو طبق رئيسي ممك يكون كل بعد ارب خمس ايام مره..
امما اللقيمات شي اساسي في سفرة رمضان والكاسترد او المهلبية وزمان كنت اسمع بالماسيه بس والله الى الآن ما ادري عنها

لاننا بطلناها ,,
وطبعا ما تخلا السفره من السلطه وانا احب الفتوش يعني لااازم فتوش ,,ومن طبق للحلا اما كنافه او تشيز كيك اواو بقلاوه بيتي اواواو

والعصير طبعا التووووت وغالبا ما يكون سوبيا والسوبيا لاازم من سوبيا الخضري

مافي احد بمكه ما يعرف الخضري والزحام اللي بيسير وطبعا الناس عليه من الظهر >>>>ضريبة الاستمتاع بالطعم الفريد

اما القهوه يمكن حنا العايله الوحيده اللي ما تسأل عنها ابد ما نشربها الا بالمناسبات الكبيره

وهذا كله ما يحلى ولا يكون له طعم الا بالجمعه اول يوم كل المتزوجين لازم يتفضلون ويشرفون بيت ابوي

اما بقية الايام اخوي فطوره يوميا هو وزوجته واولاده عند امي وحتى لو موبرمضان لازم الغدا عند امي

والسفره مره وحده تنحط يعني الحوسه ذي كلها قبل الاذان ,,هذا عدا انو لازم نذوق الجيران احيانا ويذوقونا ولو انها خفت كثيييير ذي العاده بس مازالت

اما السحور لاااازم الوجبه الرئيسية رز وكل يوم شكل يعني على حسب بس لازم ماتكون خفافي ان شالله ما اكل بس لازم اشوف الرز هههه ...

وبعد رمضان او في الايام الاخيره من رمضان لاااازم الدبيازه نسويها وبكميات كبيره ونوزع منها


وبثثثثث انتهيناااا((وباختصااار))>>> ما اقدر امسك نفسي عن الهذره


مشكور والله يا اخ الحجااج فمن خلال موضوعك نتعرف على عادات كثير من الناس
خصوصا انو دولتنا كبير وفيها ناس كثير ومن ثقافات مختلفه البعض الى الان ما تعرفنا عليها

ماشاء الله عليك يالحجاج
عارفه نفسي يكون عندي نفس طويل مثلك

فكرررره رووعه
وموضوعك يبي له على رواقه
لي عووودة ياكونان

عوووووووده ...

اولا حنا عادتنا مدري من وين ابداء يلا نبداء من السفره هي اهم شي في رمضان
ههههههههههههههههههه
طيب اول شي طبعا لازم التمر معروووف شي ظروووري كنا اول تمر لكن الحين رطب مافرقت كثير
ويكون موجود بالسفره طبعا الشوربه بس هذا بالبدايه لان الوالد عنده مسجد يفطر تمر وشوربه بعدين يروح يصلي عشان هو امام لازم يلحق طبعا وبعض المرات عشان ضيق الوقت يروح يفطر بالمسجد لكن بعد مايرجع نحط سفره ثانيه فيها كل الاكل طبعا احنا نستناه عشان نفطر مع بعض مايحلو رمضان الا بجمعة العايله مع بعض يكون فيها الفطاير من سمبوسه وغيرها انواع من الفطاير ومكرونه وسلطه لكن مو دايم تكون موجوده وبعض المرات نخترع طبخات من عندنا يعني مالها اسم خاصه فينا هههههههههههههههههههه
هاذي فترة المغرب طبعا بعد صلاة التروايح بساعه او ساعتين القهوه والحلويااات تقريبا هاذي احسن فتره نكون متواجدين ومتجمعين كلنا وظحك وسوالف يعني رواااقه مايكون ورانا شي ههههههههههههههههههه
نجي للسحور ماتلاحظون اني مركزه اكثر شي على الاكل هههههههههههههههههه
طيب السحور على حسب يعني لو كنا ماكلين قبل السحور شي ثقيل ودسم نفضل يكون خفيف والعكس
ودائما الصراحه يكون رز اغلب الاوقات او محاشي مافي طبق معين

يااااااه اول مره ارد رد طوييل ههههههههههههههه
مشكووووور الحجااج للمره الثاانيه على الموضووع الرراااائع والله