.
.
.
.
مصافحه اولى من اخوكم : كلي أمل
عزّاه يابنتٍ خذت قلب رجال=برضاه مادري ماخذته بغصيبه
تستاهله محبوبتي فخر الأجيال=والعمر كله فدوةٍ للحبيبه
اللي سقتني في ضحى السبت فنجال=فنجال يشفي للجروح العطيبه
من لمسة كفوفه برى الجرح بالحال=وطابت جروح اللي محير طبيبه
طفلٍ سنا خده ورى طرقة الشال=كنه مثل بدر الدجى ينسري به
وسحر الهوى بعيونه السود يختال=الله يعين اللي عيونه تصيبه
ونهدٍ بصدره زامي تقل فنجال=ودي امصه مص واشرب حليبه
واليا ضحك في ضحكته ضحك الأطفال=واليا ابتسم يجذب بصورة عجيبه
رغم البعاد ورغم تحطيم الآمال=صيّر صحاري يأسنا ارضٍ خصيبه
ورغم الهجير اصبح لي لحاف وظلال=اللي غمرني في حنانه وطيبه
بنت تساوي عندي رجال ورجال=بنت ولكن ذيبةٍ بنت ذيبه
يجزاك ربي خير والحق ينقال=في ذمتي ماغيرك ارضى حبيبه