انا مانيب متشائم وراضي بالقدر يارب=ولكن شفتلي شيٍ فؤادي قام يشقابه
اشوف الصدق ياربّي يموت ويستبد الكذب=اشوف الفرْح تغتاله ضغينة حقد لعّابه
اشوف ان الغني يضحك على حال الفقير الصعب=غنيٍ لابس الدقله وفقيرٍ رقّع ثيابه
أقاوم قسوة الواقع وتنشب في خفوقي حرب=سيوف الوقت تطعني وشلفا الهم شذّابه
أعيش بدنيتي تايه غريب ومالقيت الدرب=أداري دمعتي وأدري دموع الحزن غلاّبه
أخاوي جرحي الوافي وأسّس للمدامع حزب=أبروز للحزن صوره وهمّي يفتح ابوابه
بلاوي هالزمن واجد وشرقه منحني للغرب=زمانٍ عشت به حاير ودمعي بلّل ترابه
زمانٍ صرت به ظامي وتشربني همومي شرب=زمانٍ صار به جرحي لقلبي اصدق احبابه
زماني يازمان الجرح والفرقى وموت الحب=زمان الهمّ والبلوى وضحكة سن كذّابه
زمانٍ ينصف الغادر ويظلم طيبين القلب=زمانٍ جنّن العاقل خيانة اقرب اصحابه