من خلقتي خاويت جرحي والأحزان=أنا مخاوي الجرح وعندي براهين
انا الحزن مخلوق في صورة إنسان=وانا التعب والجرح فيني من سنين
وانا الفرح مقتول فيني ومنهان=وانا الألم يغرس بقلبي سكاكين
وانا الغريب اللي فقد معنى الأوطان=بأرض الوطن تايه ولالي عناوين
وانا الأسير وجرح الايام سجّان=قلبي وفكري تحت أسره مساجين
وانا اليتيم اللي جهل معنى الإحسان=غنيّ نفس وعايشٍ بإسم مسكين
شربت حزني كاس وللحين عطشان=عجزت أنا أروى من ظما وقتي الشين
وعجزت انا أزرع للأمل روض بستان=وأحصد به ورود وزهور ورياحين
وتعبت أجابه جور ظالم وخوّان=وصبرت لين الصبر فاق الموازين
بكيت دمعٍ عجزت تشيله أجفان=ورثيت قلبٍ في الهوى يشكي البين
من شافني قال امتعافي على شان=شكلي يبيّن للملا حالي الزين
وانا فؤادي من عنا الوقت تعبان=ذاق المراره والعذابات ضعفين
مرّت عليّ ازمان وازمان وازمان=وانا مثل ماانا حزينٍ الى الحين
لكني بصبر لو نوى الفرْح هجران=وبخفي همومٍ خلّت الليل ليلين
وقلبي ولو تكثر جروحه فلا لان=بعلمّه وشلون يخفي الوجع لين
يزيّن الله كل ماكان قد شان=الواحد اللي يعلم السر ويعين
شخصٍ يخاوي جرح قلبه والأحزان=إسمه مخاوي الجرح وساق البراهين