أمشي السالفه من طيب نياتي

أمشي السالفه .. من طيب نيّـاتي
. . . . . . . . . . . . . لو هـي على وجهها و الا مقفّـاها

مدامنـي صح .. لا افكـر ولا احاتـي
. . . . . . . . . . . . . واللي نوا لي بـ نيّـة سـوء يلقاها

أشوف نـاسٍ تضاعفني من سكاتي
. . . . . . . . . . . . . ماتـدري النفس عدّتها من رضاها

وأشوف ناسٍ تبي تكسر طموحآتي
. . . . . . . . . . . . . و الحمدللـه أجيهـآ .. و أتعـدّاهـا

يامدور الشعر يوم تدور أبياتي
. . . . . . . . . . . . . ابشر بمزنة تهل ولا وقف ماها

همت ودمت هوآهآ صرصرً عآتي
. . . . . . . . . . . . . سويتها يوم رب العرش سواها

من مزنة سيلت تمشي بمشهاتي
. . . . . . . . . . . . . يسوقها البدع والمعنى تقفاها

أنا على فطرتي ما صنع بذاتي
. . . . . . . . . . . . . وحلاة طبع البشر على سجاياها

يالله تغفر لحيي وارحم امواتي
. . . . . . . . . . . . . اللي عرفت السنع مع جرة خطاها

وياللي سمعت الوصية جود وصاتي
. . . . . . . . . . . . . القلب مصخي بها والعقل يدراها

يامن تحاول تهد جبال اباناتي
. . . . . . . . . . . . . فكر قبل هدها وشلون ترقاها

انا ولد شايبٍ تكرم شنباتي
. . . . . . . . . . . . . عن مستوى العفن والرديان ولحاها

كم لحيةٍ ماهي بكفو ابتساماتي
. . . . . . . . . . . . . بعض المجامل يحد النفس لقصاها

ولـ أعرف أقول انساتي قبل ساداتي
. . . . . . . . . . . . . كيف افهق رجالها واقلط نساها

لو يزعل اللي زعل هذي قناعاتي
. . . . . . . . . . . . . البنت ماهو مركى الرجل مركاها

البنت يصلح عليها ثوب بناتي
. . . . . . . . . . . . . ماتصير قبل الرجال اللي تعزواها

وياللي تصيد بغلطاتي وزلاتي
. . . . . . . . . . . . . أنا بشر والبشر مااكثر خطاياها

أنا بدوي في بلاد الجود مرباتي
. . . . . . . . . . . . . والناس ترجع لمعدنها ومرباها

بعض الرجال يتبدوا خرط كالآتي
. . . . . . . . . . . . . جيب .. ومعه طير.. وأبشربه.. وشرواها

وشرواك طيب.. وفعل جدي.. وغزواتي
. . . . . . . . . . . . . والمرجلة قال خلوهااااا .. وخلاها

ولازم مبهذل وثوبه وصخ ويهاتي
. . . . . . . . . . . . . ولايعرف البداوة وش معناها

من علمك هاللباس الوصخ يازناتي
. . . . . . . . . . . . . لبس البدو ياضعيف العقل يزهاها

ترا البداوة سلوم وفعل واثباتي
. . . . . . . . . . . . . وثقل وعقل مع رجال عند مبداها

وحشمة وشيمه ووقفه عند كلماتي
. . . . . . . . . . . . . وعزه وهيبة وستر اللي تنخاها

يالله يالله ترزقني بنياتي
. . . . . . . . . . . . . واللي معه نية بالسوء يلقاها




للشاعر / عبدالكريم الجباري

……………


…


قسم انه اختيار موفق


ذوق ياذوق



شكرآ لذوقك الرفيع



كلك ذوق



…

..
الله الله

قصييده من الووزن الثقييييل

ترفع راس شاعرها وناقلها صح لسان الجباااري

رحــيل

ياعسى ربي يسلم ذا الفكر والذوق والايادي على ذا الاختيااار
اعبجتني القصييده بمعانيها سلميلي عليك سلام وااجد

	يالله يالله ترزقني بنياتي

	. . . . . . . . . . . . . واللي معه نية بالسوء يلقاها

الله الله على الذووووق ياذووق صح لسان الشاعر ويسلم لنا انتقائك

رحيل يعجبني ذووقك الله لايحرمنا
تقبلي مروري

رحـــــــــيل

صح السان الشاعر // عبدالكريم الجباري

اشكرك على النقل المميز

واُهنئك على هذه الذائقة الراقية

الله يعطيك العافية