شي وثلاثين عام ..
يمكن عمرها غربتي ..
شي وثلاثين عام ..
فيها لو أحسب ضحكتي ..
كم مرة من قلبي ضحكت!؟ ..
ألقاني يمكن ما ضحكت .. إلا قليل ...
مو مستحيل اللي أقوله والدليل
اسئلوا حظي اسألوه .. كم مرة يا حظي وفيت ؟
واسئلو عله يجاوب .. وش علامه ما تجاوب
ليه ..؟ ويا الغير صاحي .. و إن وصل عندي تثاوب !
//
//
شي وثلاثين عام ..
وأنا ما أشبه أحد ..
شي وثلاثين عام ..
وش باقي من عمري بعد ..!؟
مروا سنين كثار .. مروا علي مثل الحلم
مروا سنين كثار .. والغربة لو كانت وطن
يمكن في يوم أرجع إليه
أو أسكنه وامشي عليه
ما غير قلبي .. غربتي .. لو عشت به ما عشت فيه
//
//
شي وثلاثين عام ..
مروا علي وشفتهم
جرح وثلاثين عام ..
راحوا و انا ما عشتهم
ما في أحد مثلي أنا .. والغربة هدت كاهله
ما شافها بس حسها في داخله ..
جريح ما غير الجروح .. هي اللي كانت تنزفه
غريب ما يعرف أحد .. و مرايته ما تعرفه
//
//
هذي فصول حكايتي ...
أكتب وتمضي ساعتي ...
من بعد ما خان الزمن وتنكرت لي مرايتي
ما من جديد .. ما من جديد
إلا أنا وهذا القصيد