:: روائع الراحل (( طلال الرشيد )) ::

~*¤ô§ô¤*~.بعضاً من روائع الشاعر طــلال الــــرشــــــــــــــــيد (رحمة الله ).~*¤ô§ô¤*~








بــــعـــــض أحـــــــــوال

أنا مقدر أكون .. اني حبيب في بعض أحـوال
أنا كلي أجـي .. والا أروح بعزتـي .. كلـي
تخيرت الفراق وما دريت إن الفـراق وصـال
أقول اني نسيتك بس مدري كيف تاصـل لـي
خذاني لك سؤال في عيونك و الجواب محـال
خذاني منك دمع في عيونـي مارضـى ذلـي
رحلت انت وتركت بداخلي طيفك و صبر طال
غدت ذكراك شمس ما تغيب و صورتك ظلـي
حكيت و مالقيت من الحكـي الا النـدم مـوّال
سكت ومت بالحسره ولا ادري وشهو احسن لي
أحبك كل مـا فينـي يحبـك يـا خلـي البـال
تخيلتك دواي و صرت جرحي الصعب يا خلّي
تعبت أرحل مع وجيه البشر بانساك بالترحـال
و لا ادري وش يجيبك في وجيه الناس واهلّـي




آخـــر حــب

كنت احسب اني عرفت الحب قبل اعرفك
وعشقت قبل اعشقك واشتقت قبل التقيـك

وكنت احسب اني لقيت احباب قبل اوصلك
واثري توهمت في غيرك وانا كنت ابيـك

تعال نعطـش وتشربنـي وانـا اشربـك
تعال قبـل الوعداجلـس معـي نحتريـك

تعال شفني وانا استنـاك .. كـم اشبهـك
يطري علي ألف راي وراي واحتار فيـك

اجي مكان الوعـد والا اسبقـه انطـرك
والا اخذ الموعد اللـي يحتريـك واجيـك

يااخر الحـب ذقـت الحـب فـي اولـك
ويااول الشوق اقصى الشـوق ماينتهيـك

علمتني كيف اعرفك لين صـرت اجهلـك
ضيعتني فـي متاهاتـك وكنـت ارتجيـك

حبيـب الاحـلام يابـعـدك ويامقـربـك
حـرام يكفـي تبعثرنـي وانـا احتويـك

ان شفتك بحلـم صدقتـه وانـا اتوهمـك
وان شفتـك بعلـم كذبتـه اليـن انتشيـك

اخاف اغمض عيوني وإن رمشت افقـدك
واخاف افتح وتصبـح حلـم ولا التقيـك




بعــض الأحـبــاب


ما قلت احبك ولا قد قلت ما حبك ... احب مالي عيونـي وانـت تسواهـا

لو تدري اش كثر تعني لي تعرف انك .... اخر امل في حياتي واول مناها

ياكثر احس ان بك مني وبي منك ... روح قسمها على شخصيـن مولاهـا

لا تقول وش تحب فيني اعشقك كلك .... من ليل شعرك لكلك واخر اقصاها

سميتني نصفك الثاني ويا شحـك ... انـا بسميـك كلـي وانـت معناهـا

تعبت اوديك له يا قلب ويردك ... لا اخـذ حلومـي ولا خلانـي انساهـا

كل الحمام استراح وناح في ظلك ... والورد الاصفر سقته الروح من ماها

ليتك بعمري ثلاثة اشخاص ماملّك .... واحد معي دوم وواحد روحي يملاها

والثالث بجفن عيني لا فقد حسك ... او غمض الجفن جاني فيـك يتباهـى

مو بس احبك انا والله من حبك ... احب حتى ثـرى الارض اللـي تطاهـا






جَـــــتـــــنـــــي

جتني وشافتهـا عيـون حايـرات
ذا شعاع الشمس او هـذا سناهـا
ضاعوا اللي جوا معاها مسيـرات
واقبلت تمشي تقـل محـدٍ معاهـا
يا سنا الفضه ويـا جيـد المهـات
يا شذى نبت الخزامى في وطاهـا
قلت كن بوجنتـك زهـر النبـات
قالت ان الرمش يجرح لي صفاها
تجـرح الظلمـا عيـون ناعسـات
سلهمت وأغضت تغطرس في بهاها
حققوا بالشوف فـي لـون الشفـاة
هو خذا منها الشفـق والا عطاهـا
ولو ظـلام الليـل يعطينـا ثبـات
فيه من لون الشعـر والا كساهـا
كيف أباصف زين كاملة الصفـات
كيف أباصل في حروفي منتهاهـا



حـبـيـبتي

حبيبتـي لا مـن غديتـي لـي سـراج اتبعـه
وكني غديت من الظما اركض ويطردني السراب
لا تبخلين اليـا شربتـك ماشربتـك مـن سعـه
دامي من جروح الهموم الموجعه كلي صـواب
اليـوم مرتنـي السوانـي والفصـول الاربعـه
اليـوم مريـت الموانـي والمبانـي والسحـاب
اليـوم ماكنـي لقيتـك مـر صوتـك ماسمعـه
اليوم ما كنـي فقدتـك مـن سؤاليـن وجـواب
يابنت في خدك وهج سيل الشمـوس الساطعـه
احرق بداخل داخلـي انسـان ماهـو للتـراب
واللي خلـق ظلـم الليالـي بالعيـون الهاجعـه
اني من الحرمـان اتسائـل وحرمانـي جـواب
يـوم الـوداع تخيلـي مالـي حبيـب اوادعـه
محروم انا وتخيلي محروم حتى مـن العـذاب
ليتـك بعمـري ثلاثـة اشـخـاص مامـلّـك
واحـد معـي دوم وواحـد روحـي يمـلاهـا
يابنـت لـي قصـه تطـول بكلمتيـن موجعـه
هي باختصار اني انا اركض ويطردني السراب




العواذل


حبيبتي كل العواذل تشابه ..... قلـبٍ ظـلام ووجـه يشبـه للأصحـاب

ولا ما غدى لك صاحبٍ ينحكى به ..... لا تسمعي أن كان لك قلب وأحباب

إلى مشيت الدرب يلهث سرابه ..... وإلى سكنـت الـدار نادانـي البـاب

وشلون أنام وهم قلبي صوابه ..... والشوك ينبت بيـن جفنيـن وأهـداب

تعبت امني .. الأسئلة بالاجابة ..... وانطر شروق الشمس والشمس بغياب

وتعبت أناظر والمعنى عذابه ..... أنـك بعيـده والمـلا دونـك حجـاب

اجمع كلام وما أعرف الإجابه ..... وعندي شعور صدق والوقـت كـذاب

كل النجوم اللي امطرت من سحابه ..... حبيبتي دمعك جرح قلب واتراب

واللي وقف ما بين بابي وبابه ..... قلبٍ ظلام .. ولابس ثوب الأصحـاب



أموت من فرقاك

أموت من فرقاك وأموت بلقاك ********* وأموت من جورك وأمـوت بحنانـك

كلٍ قضاه يموت مرّه .. و يفداك ********* و أنا أمـوت ألفيـن مـرّه عشانـك

أذكرك .. لا مني نسيت إني نسيتك ********* أنساك .. لامني ذكـرت نسيانـك

رضيت أنا بالهم لرضاك مرضاك ********* و ارخصت لك قلبٍ جرحته وصانك

أجيك في صدري عتاب .. وابجفاك ********* وأرجع ألوم الوقت و أقول خانك

أحب فيك ..احساسي إني بلا ماك ********* في عز خوفي منك أحـس بأمانـك

عجزت أفرق بين وصلك وفرقاك ********* ياللي عطيت النـاس بيـدك عنانـك

مر تجيني لين أقول إني إياك ********* و مـر تـروح بعيـد و انسـى أوانـك

أقبل و تقفي واعتذر عن خطاياك ********* و أقول ما عييـت .. عيـا زمانـك

وإن خانتك دنياك أو خنت دنياك ********* إرجـع و تلقابـي .. مكانك،مكانـك







الـيــوم ذكــرى الـفـراق


اليوم ذكرى الفراق ومرت أول سنه ... اليوم لي عام متغرب وحيد وحزيـن

اليوم انا ضيف جرحي جيت بطمنه ... اني جمعت الدموع وجبت امانة امين

ما يجرح الصادق الا غدر من يامنه ... لا جت من احباب قلبك لا تلوم السنين

مليت من هالاماني دام هي مو ممكنه ... لاهي تحقق وانا ياسي بوجهي يبيـن

الوين انا وانت مثل الشمس والازمنه ... مع كل صبح يجددني لشمسك حنيـن

لا قلت احبك .. احبك كنها دندنه ... او كنهـا وردةٍ مابيـن اصابـع جنيـن

يا اجمل الناس لك بين الملا هيمنه ... كثير غيرك ولكن ميـن مثلـك وويـن

ياعاذلي خذ عيوني يمكن تثمنه ... تشوف عيبه وانا اشوفـه مـلاك حسيـن

امس افترقنا وانا احسب مرت اول سنه ... يا طولها ليلة الفرقا سنة للهزيـم



~*¤ô§ô¤*~رَحِمَكَ اللهْ ياَ طَلالْ الرَشيد وأسْكَنك الله فَسيِح جَناته .~*¤ô§ô¤*~

	رحلت انت وتركت بداخلي طيفك و صبر طال غدت ذكراك شمس ما تغيب و صورتك ظلـي

صح لسانك وتسلم يديك على هالأبيات الرائعة...

لكي تحياتي...

مشكور اخوي البرنس بس بعدلها بجيب اشعاره الثانيه انتظر شوي تقراها ..!!

	المشاركة الأصلية كتبت بواسطة دمع الغزال

	بس بعدلها بجيب اشعاره الثانيه انتظر شوي تقراها ..!!

يالله مشتاقين نشوووف إبداعات أخرى...

لا تطولي وراي صلاة جمعة... خخخ

هههههههههههههههههههههاااي امس الجمعه ههههههااي

الحمد لله والشكر يالله عدلت ..!!

..

آآآه طلال الرشيد .. أحتــار اي احاسيس ابداعه أختــار ..

الله يرحمه .. شـاعر البسمه .. شـاعر الضحكه والدمعه والألم ..

..

شكراً دمـوعه ..

..

الله يرحمه رحمه واسعه

كان شاعر عذب ومبدع ورومانسي للغايه

الله يعطيك العافيه دمع الغزال على نقلك الجميل واختيارك الراقي

	المشاركة الأصلية كتبت بواسطة متعاطفه بحدود

	.. آآآه طلال الرشيد .. أحتــار اي احاسيس ابداعه أختــار .. الله يرحمه .. شـاعر البسمه .. شـاعر الضحكه والدمعه والألم .. .. شكراً دمـوعه .. ..

الله يرحمه ويغفر له يارب ..!!

العفو متعاطفه ومشكوره على المرور..!!

	المشاركة الأصلية كتبت بواسطة محمدالفارس

	الله يرحمه رحمه واسعه كان شاعر عذب ومبدع ورومانسي للغايه الله يعطيك العافيه دمع الغزال على نقلك الجميل واختيارك الراقي

الله يرحمه ويرحم المسلمين اجمعين ..

الله يعافيك يارب ..ومشكور على مرورك محمد منور..!!

بسم الله الرحمن الرحيم

دمع الغزال

السلام عليكم ورحمة الله وبركاته


يا سلام عليك
اختياااااااااااااار رائع
وذووووووووووق عالي
وقصائد جمبله لشاعر كان مميزاً
رحم الله شاعرنا طلال الرشيــــــــد
والف شكر على روعة اختيااااااااااااااارك


اخوك
حسام الشعر