شاعر الاسبوع .. الامير .. بدر بن عبدالمحسن ..

يا مركب الهند .. يابو دقلين .. ياليتني كنت ربانك ..

واكتب على دفتك شطرين .. اسمك حبيبي وعنوانك ..

طال انتظاري وقلبي جريح .. يا مركب الشوق ليت الريح

وقت السحاري .. تملا السواري ..

وابحر بشوقي لنور العين .. وارجع لخلي لأوطانه

يا بحر موجك علي عالي .. وطيفه حبيبي على بالي

والبعد قاسي .. وحبيبي ناسي

والله .. يا ربعي .. وأهلي .. وناسي ..

مشتاق قلبي لخلانه ..

يا مركب الوهم عمري ضاع .. ما بين أمل في لقا ووداع

بحر الأماني .. ماله مواني ..

ضيع زمانك .. وضيع زماني ..

وضاع المركب .. بربانه..

مني السَلام ..وكان لي منك فرقَا = جَمرة غضى حبك لجت داخل الجوف
عيني عليك من اشهَب الدمع شرقا = غيرك فلا حسّيت وغيرك فلا شوف
ما انته امحول كيف انا يمك أرقا = والحَيّ مثلي بتَالي العمر مكتوف
حَبل الصّبر مَشدود والكف عرقا = كيف اتقضت لاغدَت قيض وشعوف
واصيح لك مَا يسمَع المَوج غرقا = واصيح لك مَا يرجّع المَاضي حسوف
يومك لنا مَا أخاف بَردٍ وحَرقا = بَيت العَزا بعدك يبي جدر وسقوف
ويومَك لنَا لون السّمَا منك زَرقا = وللعشب نوارٍ وللمَاطر قنوف
كلٍ يروح ورحمَة الرّبّ تبقى = وكلٍ سِوَاك اليوم يَا شَيخ مخلوف

في الشارع .. عتمه ونور ..

زحمه .. واشارات المرور ..

تاقف على انفاس الطريق ..

مشيت أنا .. وهمي العتيق ..

وقبل التعب .. مايهدني..

سمعت صوتٍ شدني ..

ناي .. في صوتها ناي ..

غني وجرحني الشجن ..

دقات قلبي .. وقفن..

وخطاي

قالت وش الوقت ...

ناظرت ليل اعيونها ...

وصبح الجبين ..

ومرت ثواني صمت ...

وقلت الزمان .. انتى..

وكوني اللي تبين ...

من يومها ماعاد اناظر ساعتي ..

وش حاجتي .. أعد الزمان ..

وهى الزمان الجاي ...

كثـر النهار أشــتـاق و إنــتي بعيـــده = الـين أشـوفـك كثـر ما تـنبت أشجار
ومــثـل الـرمــال أحــس روحـي وحـيـده = الي أجـدبت عامـين مـا طاحت أمـطار
طـال الـسهـر والـليل ينـزف وريــده = في صـدري اهمـــــوم وهـواجـيس وأسرار
كل الـحروف المـبـطيـة والجـديـده = تطــري علي لاشـــك فـي شــوقي احـتـار
قبل الورق وانـتي فـ بالي قـصـيده = وبعـد الـورق ضيـعـت أنـا كل الأشـعار

ياطفلة تحت المطر ..

تركض واتبعها بنظر ..

تركض تبي الباب البعيد ..

تضحك على الثوب الجديد

ابتل وابتل الشعر ...

لو رميتي شالك الدافي على متن السما ..

دفيت الشمس في فصل الجليد ..

لو نثرتي صوتك الحاني .. على صدر الضما

أنبت العشب وأخضرالجريد ..

زينٍ رفعت الراس .. وزينٍ تقضّه = شَعرك سواده ليل ..والخد ياضي
لا يا قمر يا شمس .. يا نهر فضّه = لا يا خزامي الروض .. ورد الفياضي
لا ما بقي لي كود الابهام أعضّه = مستسلمٍ لك .. خاضع النفس راضي
أبني جدار الصبر .. وزينك يقضّه = صعبٍ رحيلي عنك .. صعبٍ مراضي
كل ما أصد بطرف عيني ..وأغضّه = عنك انشبتني العين والدمع فاضي
مديت لي كفٍ صغير ..وبضّه = وقضبتني عن نزعتني وانتفاضي

كل شيئ .. دايم في وقته.. ليه؟؟

كل شي .. حنا نحبه ..

صعب نستعجل عليه ..

طيب .. ليه؟؟

يا ترى انتظار الشيئ ..

هو سفرٍ اليه ؟




احملي اللحظه حجر ..

وطوحيها في المدى ..

تصبح الساعة .. دقيقه

غيري الزمن الحقيقه

طلعيني من الصور ..

من الخطوط .. الحزينه

اطلقيني من الشطوط

ومن مجاديف السفينه

اجمعي الصوت .. الصدى

احملي اللحظة حجر ..

وطوحيها في المدى

( كل شي دايم في وقته

عجيب ..

وكل شي حنا نحبه

كثر ما يظهر يغيب
يا ترى .. منهو البعيد .. منهو القريب )





ما لنا وقت .. وقتنا دايم يجي

الزمان اللي يروح ..

وان سألتيني أحبك ..

كثر ما تشفى الجروح ..

اشطبيني الف ذكرى .. واكتبي ..

اللي يتذكر .. غبي

واللي ما ينسى غبي

ودي اشوفك .. باقي لحظه

هذا كل اللي أبي ..

يا من نشدني علامك ناحلٍ شاحب =اخترت مثلك صديقٍ وأخلف اظنوني
البارحة واعذعب الضاحك الناحب = من الليالي وأهلها شابت عيوني
روحت من صاحبي ما عاد لي صاحب= وأعداي وافين ما قد يوم خانوني
هذا زمانٍ نصيبي منه وأنا أحب = لا من حفظت العهد ازعلت مضنوني

وعدتيني .. بنجم الضي .. بالقمرا ..

تركتيني لجرح الماضي .. للذكرى ..

وليتك ما وعدتيني ..




رسمتي لي الهوى بسمه .. بتشرق في ظلام الأمس ..

وقلتي لي مراكبنا .. بتوصل لو مواني الشمس ..

وانا من فرحتي باحلم .. واصدق حلم ايامي ..

خذاني الحب ما اعلم .. عن الدرب اللي قدامي ..

كفايه .. انك وعدتيني ..



وعدتيني حبيبة عمر .. تقاسمني الهنا والجرح ..

تركتيني لحيرة عمر .. خذت مني المنى والفرح ..

حبيبه ما ابي لأجلي .. ولا حتى قمر ليلك ..

فقدت فـ غربتي إسمي .. وقلت أنسى أناديلك ..

نسيت إنك نسيتني ..

تفداك روحي .. يا مفارق حبايبك = وفداك عمري .. راحتي وابتهاجي
كان الجروح اللي بقلبي سبايبك = أنت الذي بارجى حنانك وأناجي
طيفك إلى مازارني كيف أعاتبك = يا ساكنٍ وسط الحشا .. ومتلاجي
إنت العذاب وكيف أنا بك أعذبك = يامن جرحت القلب .. جرحك علاجي
الله حسيبك قمت أنا أحمل مصايبك = وأنا الغريق وحـــاملٍ هم نـــــاجي
وداعة الله .. والسّلامة تصاحبك = حلــفــت مااعقد في وداعك حجاجي