>< رحلـــــــــــــة في الرملــــــــــــــــــــة><

( كوكتيل الصيد : الجزء الاول قصه ساخره & محزنه)

اعزائي الاعضاء

لاتجهلكم هوايه الصيد بانواها ومدى تعلق الشباب عموما بها لدرجه

انها اصبحت ضروره من ضروريات حياتهم فمنذو ان يبداء الطفل يحرك اصابعه وتلقى النبيطه في يده

ومخباته مليانه حصى وهات ياتكسير في هالمبات والنجفات هذى غير تفليق عيال خلق الله .

وشيأ فشيأ يبداء يكبر هذا الطفل وتكبر احلامه من تكسير النجف والتفليق الى تصييد العصيفيرات

(مصغر عصفور ) وايضا تبداء هاذي الاحلام تكبر وتكبر الى ان يصبح هذا الطفل شابا يحمل بدلا من

النبيطه سلاحا وهو البندق وبدلا من تجميع الحصى في مخباته تلقاه محمله علبه فشق وتتطور

طموحاته من تصييد العصافير من مزارع القريبه من بيتهم او من شجر الشوارع الى هوايه تصييد

الدخل والصفارى....الخ من الشعبان والوديان.

وهذا كله بالنسبه لاحدى انواع هوايات التصييد وهي تصييد الطيور ففيه انواع كثير من الهويات

التصييد كلا له موسمه.

مثل تصصيد الجرابيع وتصييد الضبان وتصييد الارانب والصفارى و القميري والحبارى ....الخ

هذا موجز بسيط لمقدمه موضوعي الجديد وهو عموما عن هوايه الصيد وراح أجزاه ثلاث اجزاء عشان ماتملون

فخلونا نحلق مع الجزء الاول


الجزء الاول : قصه (هذي اخرتها ياسلوقي ... اصير في تزدر عراوي )( الجزء الاول )






في مكان ما .. يعشقه الكثير .. ويستهوي نفوسهم .. وتنتشر فيه.

حبيبات الرمال ..الذهبيه ...الصغيره الشقيه.. ومكافخها مع الهواء الرايح والجاي

وترجهن هذه الرمال تقريبا في الليل وتركد .. عن الهجهجه ويصبح الجو رائعا ومثاليا خاصه لمن

يهوى الصيد ولكن اي نوع من الصيد ؟


مع شقشه العاصافير وبدايه ظهور الشمس

تقحص (هديبا) من مرقدها وهي مرتااااعه وتطلع من غرفتها وهي مسرعه للسطح

هديبا : بسم الله العظيم الاعظم وش هالصوت ياربي ترفق علينا بسم الله بسم الله علي وعلى عييلي

وعلى ابونا ياله انك ترده بسلامه .

ويوم طلعت مع باب الطايه العلوي ولا الباب منسد بشحنه رمل وتقعد تنقث بيدينها وتوخر الرمل

ويوم طلعت للسطح ولا ها ماتشووووووووووف الدنيا الجو كله غبار

هديبا : هااااااااااااااااو وش ذا لاسمعنا حس هواء البارح ولا عواصيف وش جاه الجو هالحزه

يومنه تنت شوي ولاتسمع صوت قرقعه سياااااااااره ومااااااااااار في هاللحظه يشخط من عندها

وانيت 98 مليان شباب

ويوم انها شاااافته وهي اللي تطقها الروعه وينزل على عيونها مثل لااله الا الله الهدبدب

وتركض مع دعسوق دارها وتمغط لمكتب ابوهم وتمسك التقويم وتفتح فيه يوم وصلت لتاريخ

../.../1426 هـ

وتطير عيونها في اللي مكتوب في اول الصفحه

بلش

بلش

بلش

وانا اقول وش جايب هالوانيت في محمياتنا اثر موسم صدينا بدا

** وفي هذه اللحظات ترفع هديبا يديها الى السماء وتدعي ربها **

هديبا : يارب انك تستر علي وعلى عييلي وتحفظهم وتخلي لنا ابونا وترده لنا وتعمي عيون

هالجذاعين عنه

ياله ياكريم اللهم حولينا ولا علينا اللهم حول المحميات اللي حولنا وتقلع هالمهبل عنا


وتدخل هديبا غرفه عيالها محماس و مفلح وتقومهم عشان يفطرون


ويجتمعون في الصاله حول السفره وتجيب شعيع (بنت هديبا من رجلها الاولي صنت ) تالي غدى جيرانهم

شوي جرجير وكراث وخس

ويتطامرون العيال على الاكل ويقعدون يعرمشون في هالخضره

وامهم تناظرهم وعيونها مليااااانه حزن وتفكيرها منشغل

شعيع : يمه وش بلاك عسى ماشر وراك ماتاكلين

هديبا : ابد وانا امك ماهنا شهوه

شعيع :يمه عاد هالحتسي مهب علي ان كان ضايقن صدرك عشان ابوي بياخذني الشهر المقبل وبيحطني

عنده لاتشيلين هم هو واعدني كل مااوفي خمس طعش يوم اسير عليكم .

ومار مهب ممديتس تفقديني الا عرسي حول الدعوه وباخذ طلق ولد ام طلق وبصير جارتن لتس

هديبا : (وتغورق عيونها بالدموع ) الله يوفقتس يابنيتي بس والله مهب هاذا اللي مضيقن صدري

بالعكس والله اني فرحتن لتس .

بس اليوم شفت التقويم ولا موسم صدينا (صيد الارانب ) بادي هذاله حول يومين واليوم الصبح شفت

سياره صيادين شاخطه من عند بيتنا وانتي خابرتن يابنيتي ان عمتس ابو محماس اليوم بياصل من

الصمان . وخايفتن عليه من هالشباب الصايدين حسبي الله عليهم لايرحمون ولايخافون ربهم فينا

محماس : يمه لاتشيلين هم ابوي والله ابوي يعجبك شقردي

شعيع : ان شاء الله مايكون الا خير يمه

مفلح : حـــــــــــركه اجل يوم السبت ماهنا دراسه اكيد بيعطون اجازه عشان الموسم بدى

ياهووووووووووووووووووه و الله ماعاد احترك من عند البلاي ستيشن لاخرب الدوري الياباني تخريب

هديبا : شعيع وانا امتس ضفي الفطور وانا بروح ارقد لي شوي واذا جات حول خمس العصر قوميني بروح

اسير على ام طلق وعلمها بهالخبر كودها تخلي شايبها ينتبه لروحه وعياله


** ** ** ** ** ** ** ** الساعه 5:16 عصرا ** ** ** ** ** ** ** ** **

عندما دقت الساعه معلنتن الخامسه والربع عصرا تسبعت هديبا حزمه جرجير على ظهرها وراحت تسير

عند رفيقتها ام مطلق لتتسامر معها اطراف الحديث.

وقالت هديبا لام طلق عن بدايه الموسم وان لازم تعلم الشايب عشان ماعاد يطلع يجتمع مع ارفقاه

ومثلكم خابرين ام طلق مرتن تسبيره ورجلها شايب لاتقرى ولاتكتب وماعندها الا ولد واحد واسمه طلق

(اللي خاطبن بنت هديبا شعيع )

المهم يومنها تقهوت معاها وقرب الوقت من حول المغرب استاذنت هديبا وقالت انها بتروح تزهب

عشاها عشان ابو محماس بايصل حول الساعه ثمان وماودها تصيف على البيت والعيال .

ويوم انها تنقت مع الباب (انتي ياهديبا ) وفي طريقها لبيتها وهي مغير تقصد وتقول:

احاول اخفي احساسي ... ولكن بالعشق مفضوح

تشوف الفرح في عيني ... واحبك بالعقل والروح

في هاذي اللحظات

وهديبا مندمجه بهواجيس وقصايد واغاني مع ابو محماس وتفكر في لحظه لقاها به بعد غياب دام 4

شهور.

يفحـــــــــــــــــط من عندها وانيت نفس اللي شافته الصبح

ويديوررررر ويحط طبلونه وراها



والمسيكينه ماتمت فرحتها حتى ولو بالهواجيس وترتاع وبغت تجيها ام الركب بس ربكم ستر

وتحط رجليها وهات يامقااااااامز ومن رمله لرمله ومن جفره لدحديره

وهالشهبان بوانيتهم وراه وزعاق وتصفير كنه فرحانين يوم لقوها

وهي خلاص ماقدام عيونها الاشوفه رجلها عقب السفر وقلبها اللي خايفن على عيالها

وكل ماتذكرتهم انغرف قلبها وصااااار يضرب وانبيره طااااااااق طننننننننننننننننق

وتسرررررررررررررررع بكل ماوتيت من قوه .

طبعا عيال الذين عندها خطط يلاحقونها بالسياره عشان لما تكون خلاص تعبت وانهد حيلها يطيرون

ويطلقون عليها سلق قريح.

ويومن الشمس غربت والدنيا حول الظلمه

والشباب يبون يلحقون على الصلاه

قالوا مابدهاش ويطيرون السلوقي اللي معهم بالصندوق وراها

ومن هنا تبداء رحله عنا هديبا



وهالسلوقي يوم قام يطاير وراها مابعد قزها زين الايوم ولعوا الكبس عليها

ومن يوم ولع الكبس ويقوم السلوقي ويدعى صقر ويشهق هذيتس الشهقــــــــــــه

ول ول ول عليها قطعــــــــــــــه هالطخمـــــــــــه <<< بيني وبينكم طلع السلوقي داشر وله سوابق في الترقيم

وهو اللي يحط عصاقيله وراه ويناديه يارنوووووبتي يا اجمل وازين واطلق ارنبه شفتها في حياتي

وقفي بس ابي اكحل عيوني ياقمــــــــــــر

وهي يوم سمعت الحتسي وتلتفت عليها

هديبا : وانا بنت ابوي انا هديبــــــــــا بنت الصفيريق ياللي ماتستحي اذلف لابارك الله فيك

انا معرسه وعندي عيال ولانيب راعيه هالحركات ياداااااااااااشر .


السلوقي صقر : يابعد تسبدي ياهديـــــــــبا وانا قول وش ها الهدبدب اللي جا عيوني من يوم
ماشاف عيونك الكحيله .


هديبا : اقول والله ان ماعقلت لانادي الهيئه عليك <<< هيئه وهي ملحوقه مايمديهم

وماتدري هديباء في هالحظات العصيبه وش تسوي تخاف تروح لبيتها يعرفون المكان ويترصدون لها ولعيالها

ويوم شافت انها قريبه لبيت ام طلق قلت بدخل عليها كودها تساعدني

وتركض وتركض هديباء وتركض

وبسرعه خاااااااااطفه تدخل جحر ام طلق وتلقاه متمدده وولدها طلق يهمز رجيلاتها بولازلين

ام طلق : هــــــــــديـــــــبـــــــــا وجعه وش فيتس يامره

طلق : ياخاله وش جاك وراك داخلتن علينا مدرعمه

هديبا : ام طلق ابي الفزعه سلقه معها ربعها يلاحقوني يبون يصيدوني تكفين خليني عندك بس لين يروحون

(طبعا صقر مرتزن عند الباب ومدخلن خشته عليهم )



ويوم شافته ام طلق وهي اللي تقوم الدنيا وتقعدها وتنهبل وتطلع لها قرون الشياطين وتنسى انها
تعرف هديبا

وجعه وجعه وجعه وتبيني اخليك وهالسلوقي ياويز بخشته علينا



اقول ياهديبا اقصري الشر واطلعي مانيب ناقصه افقد ولدي ولاشايبي

هديبا : ام مطلق السلقه عند الباب وين تبيني اطلع معه صعبه صعبه تكفين يام طلق طلبتك وانا رفيقتك

ام طلق : اطلعي طلعت روح العدو مع الباب اللي ورى وخليهم يشوفونكم مهب تنحاشين ويقعدون هم مرتزيين فيذا ترى ياويلك

هديبا : يعني خلاص يام طلق الصداقه الاخوه الجيره ماعدا لها قدر عندك

وترقى هديبا للباب الخلفي ويوم انها وصلت الباب وهي تلتفت على ام طلق وعيونها تدمع وتقول لها هالبيت :


كلن له الله لو تخليت عني ........ محدن يموت ياصاحبي قبل يومه



وتطلق هديبا لعصاااااقيلها العنان وفي لحظتها توقف وتتذكر ان ام طالق قالت لها خلي السلوقي

يشوفك عشان مايرتز عند الباب وتوقف وتناااااظر ولا صقـــــــر شافها وجاااااااااي ماغط وراها

وتستمر في الركض والركض غير مباليه بكلامات صقر الجارحه .



واثنـــــــــــاء ماهديبا مستمره في الركض وجسمها قد ارهقه التعب وارجلها لاتستطيع حملها

اكثر من ذلك . وهي مازلت في مخيلتها تستعيد شريط ذكريات حياتها مع ابو محماس

وفي هذه الحظه



تلمح هديبا شي من بعيد لاكن لاتسطتيع تتميز ماهو فقد كانت منهده الحيل جدا

واثناء ماهي تركض وتسحب جسدها وارجلها على الرمال وكانها تحس بأمل يصوت لها من بعيد

وعندما كانت تقترب وتقترب تلمح عينان يتلاقطان في الظلماء يشع منهما نور تعرفه جيد

وتقترب وكلها لهفه وشوق وتحس انها اقتربت من الفرج وتركض وتركض

وفجاااااااااااااااااءه وعندما اقتربت جدا




ماذاترى!!!!!!!!!!!!!!!


؟
؟
؟
__________________________________________________ __

ماذا سترى هديبا في هاذا الظلام الحالك وماهوا هاذا الاحساس اللذي احست به منذو قربها من هذا المكان

ولمن له هاتان العينان ياترى

اذا اردتم المزيد

** ** ** ** ابقوا معنا في الجزء الثاني من رحله في الرمله ** ** ** **

منقول من الايميل

يووووووووووووووه ياامواج والله اني جاي متحمس عشان اقرا مواضيعك بس والله موضووووووع طويل ,, عشان كذا بغير مجرى دخولي للموضوع واخليه مباركه لك بمناسبة العيد ,,كل عااام وانت بخير بعد الزحمه والله يجعل ايامك كلها سعاده .. وان شاء الله برجع لقراءة موضوعك في وقت لاحق دمتى بود ,,,

هلا ومرحبا

>> صب القهوه ياورع

حياك الله الملك
اجل عقب الاعتراف انحشت
خخخخخخخخخخخ
تعبنا واحنا نقول الحمدلله على السلامه
يلا انتظر تقرا الموضوع
وترا بعد باقي فيه خخخخخخخخ
اقراه عند النوم احسن خخخخخخخخخ

...
وانت بخير
الله يسلمك
..
زين انك تذكرتنا وسيرت علينا

	ماذاترى!!!!!!!!!!!!!!! ؟ ؟ ؟

لا لا لا لا لااااااااااااااااا .. امواج الله يعافيك وش صار نزلي الجزء الثاني بسرررررررررعه دخلت جووو..

	ماذا سترى هديبا في هاذا الظلام الحالك وماهوا هاذا الاحساس اللذي احست به منذو قربها من هذا المكان ولمن له هاتان العينان ياترى اذا اردتم المزيد ** ** ** ** ابقوا معنا في الجزء الثاني من رحله في الرمله ** ** **

تذكرت فلم كرتوني اسمه الرميه الملتهبه اللي فيه الكابتن سامي يقطعوا القصه على اهم شي وبعدين هذا ماسنعرفه في الحلقه القادمه
؟؟؟؟؟؟
روووووووووووووووووووووووووعه..يسلمووووووووووووووو
امواجووووووووووووه .. تقطع قلبي..حاسه كني اتابع فلم اكشن...

شكرا على الموضوع