يعني من قل المصايب صاب هذا الصدر ضيـق = ولاّ يعني من الحظوظ الزينه .. ورِفع المكانـه
ذي حياتي من مضيقٍ ..في مضيقٍ .. في مضيق = و لو بحثت الصبر فيني .. ما اجد للصبـر خانـه
عادتي لا ضقت ادوّر ( حضن وعيون ) الرفيـق = مشكله .. لا صار ضيقي منه واحزاني عشانـه
يوم قال: (اسمح لي بارجع) وانت كمّل هالطريق = لازم تقدّر .. وتنسى .. وننتهي .. كـلٍ وشانـه
قلت: صبرك (يرحم الله والدينك) .. مـا اطيـق = ماني ناقص فوق جرح اقدارنا .. جرح الخيانة
حاجتي لـك حاجـة الايتـام وايديـن الغريـق = طالبك طلبه تراني اعشقك : صـون الامانـة
و راح ماكنـه سمعنـي و التفـت لفتـة طليـق = وقال : اخيراً ما بغينا .. ثم غنّـى ليـل دانـه
عندها أدركـت فعـلاً ..قيمـة الحـب العتيـق = و قلت : هذي آخرتها.. مـا تجـاوزت امتحانـه
ضيق صدر وجرح قلب و دمع عين و نشف ريق = هذا كل اللـي جنـاه ( الشاطـــر ) بآخـر زمانـه
مدري كن الحزن فيني شاف له نِعـم الصديـق = مدري يمكن كنت فعلاً كفـو للحـزن و تكانـه
و الفرح كالثوب لكـن لبْستـه لـي مـا تليـق = دام لبسـه لاي خاسـر مـا وراه الا الإهانـه
آه ياحزني ترفّـق.. صاحبـك جرحـه عميـق = اشهد انك .. يا رفيـق العمـر طيّحـت الميانـه
مثلي مثل اللي يراهن كل خلـق الله .. بعشيـق = والبلا.. راهن و يدري خاسرٍ عشقـه و رهانـه
و يعني من قل الخساير صاب ذاك الشاب ضيـق = يكفي لا هالوقت و قته ... ولا مكانه هو مكانـه