ليه المسا عوق الشقـاوي وطبـه=وليه الهبوب تصحي القلب لا بـات؟
وليه القمر يدعي جريـح المحبـه؟=ويقول له يا هيه..ما فات ..ما مات
جرحك ظهر لو قلت للوجـه خبـه=وللحزن في ضحكك رسوم وعلامات
وليه المطر بالذات ريحه.. وصبـه=كنه رسول بين الاحبـاب بالـذات؟
اشتـاق فيـه لشوفتـك واتنـبـه=للي نسيته مـن مواقـف ونظـرات
لا استانس الخافق ذكر مـن يحبـه=ورجع يراجع فالوناسات مـا فـات
يا مرتع القلـب الحزيـن ومربـه=يزيين بك مثل الذهب صدر الابيـات
هيهات ينسى القلب شخـص لعبـه=وهيات يدله خاطري منـك هيهـات
سبك مديح ومـدح غيـرك مسبـه=تقول واذني صوتها تقول لك هـات
ونبع الغلا عندك وعنـدي مصبـه=ومن الولا .. في خافقي لك ..ولايات
وطيفك حطب عيني..وعيني مشبـه=والشوق برد ما انقطع لو للحظـات
ومكانك الصدر ولـك القلـب شبـه=بين الظلوع اللي فردهـا التنهـات
ولك بيـرق فالقلـب حبـك يهبـه=شامخ ولا هزه من العـذل غـارات
محبتـك فالوقـت ذا مـا تشـبـه=الا بخيمـة بـدو بيـن العمـارات
ان شفتني ضايق واهوجس واسبـه=اخاف غدر الوقت.. والوقـت دورات
لا تحسب ان دمعي نزل دون سبـه=ابكي من الفرقا وهي مابعـد جـات
الـيـوم كــل امورنا..مستتـبـه=وبكره ماندري وش معه من مسرات
ارب قلبـك مثـل قلـبـي اربــه=ما يخلفه شور العرب والمسافـات