|
قناة الوئام الفضائية (2)
استمرت المحاولات الحثيثة في استوديوهات قناة الوئام لتسجيل حلقة واحدة فقط من أي برنامج من البرامج التي وردت في الرسالة السابقة عن تلفزيون الوئام، ولكن الحال استمر كما هو لمدة شهرين على الرغم من الاجتماعات العديدة لحلحلة الوضع، والمفطحات التي جندلها الأستاذ خلف، والذي قرر في النهاية اتخاذ قرار نهائي ومصيري وهو إيقاف المحاولات وتسريح العاملين. تاثر الأستاذ خلف بسبب الخسائر المالية التي تكبدها بسبب مشروع القناة الذي لم ينجح، وأصبح يردد دائماً: "يا من شرا له من حلاله علّة". وبينما هو جالس بعد العشاء مع واحد من أصحابه "يدقون" نفرين مندي مع اللبن (بالعافية عليهم)، سأله صاحبه: وش فيك يالغالي شايل الدنيا على رأسك؟ قال له الأستاذ خلف: الصراحة هالقناة حيرتني، ما قدرنا نسجل ولا برنامج . . وما أدري وش أسوي بها. قال له صاحبه: لا تشيل هم . . . الحل عندي. خلف: الله يسعدك . . ليمني على الفكرة. صاحبه: يا أخي الشغله بسيطة خلي قناتك خاصة بالرقية وبتفسير الأحلام . . . صدقني هذا أحسن استثمار هالايام. خلف: كيف؟ صاحبه: يا خلف أنت لازم تدرس أولاً عقليات المشاهدين، أنا أقول لك باختصار ثلاثة أرباع شعبنا يحسبون انهم مسحورين ومحسودين (مدري على يش ينحسدون) . . . ومن يوم تعلن عن ان قناتك للرقية الشرعية راح تجي لك اتصالات هاتفية من الناس علشان ترقيهم وتفك عنهم السحر . . . أمّا بالنسبة لتفسير الأحلام فما أكثر اللي راح يتصلون فيك علشان تفسّر أحلامهم اللي زي وجيههم. . . أنا متأكد راح تكسب ذهب من هالاتصالات، ولا تنسى تحط لك كم شريط متحرك على الشاشة للرسائل النصية. خلف: طيب يا فالح . . . منين أجيب أحد يرقي الناس ويفسر أحلامهم. صاحبه: هذي بسيطة . . خلها عليّ. خلف: تراك جننتني . . . كل شيء تقول لي بسيطة. صاحبه: أكيد بسيطة، اثنين من أصحاب أخوي عاطلين عن العمل يعني ما عندهم شغل . . خلني أتفاهم معهم واشتري لهم كتابين عن الرقية وعن تفسير الأحلام وبعد يومين أجيبهم لك جاهزين(نصاب محترف). خلف: والله انك مصيبة . . منتب هيّن. * * * * بعد يومين وصل صاحب الأستاذ خلف ومعاه اثنين من الشباب علشان يعرّفهم عليه، وقال له صاحبه: أعرفك يا أستاذ خلف على حمد الأقشر، واسمه قدام الناس راح يكون الشيخ مبارك المتخصص في الرقية، وهذا الداشر الثاني أسمه سعد أبو رجه، وبرضه راح يكون اسمه في قناتك الدكتور صالح ابن سيرين وهو من أحفاد "ابن سيرين" اشهر مفسري الأحلام.خلف: هاه جاهزين يا شباب؟ حمد الأقشر (الشيخ مبارك): جاهزين من أمس وخاصة بعد ما رحت عند واحد من اللي يقرون على الناس وشفت وش يسوي. سعد أبو رجه (صالح ابن سيرين): أنا قريت كتاب تفسير الأحلام مرتين، والحين أنا جاهز أفسر أي حلم حتى لو كان فلم هندي >>> يعني طويل. بدأ الأستاذ خلف حملة إعلانية عن قناته في بعض الصحف والقنوات اللي تمشي حالها، وفي اليوم المحدد بدأت القناة، وبدأت الاتصالات تنهمر على القناة من الناس اللي يظنون أنهم مسحورين، وبدأ الشيخ مبارك يرقي الناس عن طريق الفضاء، وكان اكثر ما يركز عليه هو "النفث" بكميات كبيرة إلى درجة أن النفث يصل عدسة الكاميرا "ويغبّش" على الصورة. * * * * المهم بعد أسبوعين من بداية القناة، بدأ السرور على وجه الأستاذ خلف وذلك بسبب الإقبال الشديد على القناة من المشاهدين طلباً للرقية وفك السحر. بدأ الأستاذ خلف يستغل الفرصة ويعبي مياه من "البزبوز" ويبيعها على أنها مقري عليها وذلك بعد أن يسوّق لها عن طريق القناة، وبعد كم يوم "طنت" برأس خلف فكرة جهنمية، وهي أن ينزّل دعايات لشامبو شعر مقري عليه يساعد في منع تساقط الشعر، وكذلك لزيت طعام مقري عليه يساعد على تنقيص الوزن عند استخدامه في الطبخ. قبل الإعلان عن هذين المنتجين ذهب الأستاذ خلف إلى مستودعات موردي زيوت الطعام والشامبو وأخذ يجمّع الكميات المنتهية الصلاحية ثم أخذ يعبيها في عبوات صغيرة يضع على كل منها "ستكر" عليه تاريخ صلاحية يمتد لعشرين سنة. بمجرد الإعلان عن هذين المنتجين، بدأت الطلبات "تهطل" على القناة وبكميات كبيرة ما أضطر الأستاذ خلف إلى الاستعانة بكل أصحابه علشان يساعدونه في استقبال طلبات المشاهدين ومن ثم إرسال الشامبو والزيت لهم ( شعب يصدق كل شيء). تحسنت الأمور عند خلف، وبدا يفكر يخلي هذي القناة للرقية فقط، ويضيف قناة ثانية يخصصها لتفسير الأحلام، وبدأ يستقطب كفاءات متميزة على شاكلة حمد الأقشر وسعد ابو رجه، ومنهم أيمن الدبة، وأبو الكلام البنقلاديشي حارس العمارة اللي فيها القناة وذلك باعتباره متخصص في فك سحر الشغالات. وبهذه المناسبة يود الأستاذ خلف بأن ينوّه بوجود خصم خاص ومغري جداً لأعضاء وعضوات منتديات الوئام على الشامبو وزيت الطعام المقري عليه حيث يصل هذا الخصم إلى 2% عند شراء عبوّة واحدة، وفي حالة شراء أكثر من عبوّة يصبح الخصم 1%. (سارعوا فالكمية محدودة). |
رد: قناة الوئام الفضائية (2)
عز الله ان خلف ربح بهالمغفلين وبعونة مين !! ابو رجه والاقشر !! لا وبيسوي عرضه علينا لا اجل تسقط قنااتك :inquisiti ياخلف اول من يحاربك انا:rifle: :: تسلم يمناااك ياعبدالله تصوير وبعد راائع في هذا الخيال |
رد: قناة الوئام الفضائية (2)
الحمد لله وبعد تعب ومعاناة صارت تصب الملايين صب مع ابو رجه والاقشر تحت عنوان(يدا بيد لايبقى بالسعوديه مسحورا)
وفعلا مابيبقى مسحور ان شاء الله ولا محسود والا حلم الا نفسره بعون الله واسألو عبد الله كل الهنود اللي عنده بالشغل كانو محسودين على شغلهم بتنظيف الممرات والمكاتب وتضبيط الشاهي واحيان القهوة جاهم بلا مغير يتبطحون وبعد جابهم عبد الله بسيارة النقل الجماعي<< من كثرهم وقرينا عليهم وخلينا وجيههم ((ترطش))تفال من الفم المبارك:furious3:صارو مثل اول وافضل ويداومون قبل دوامهم بساعتين من الاخلاص والوفاء اقتباس:
ترا البزبوز اللي اعبي منه يجي من الخزان والخزان طابين فيه مشايخنا ومتروشين فيه وقارين ومتفلين يعني مركز 100×100 واحيان تجينا مجمووعه من المرضى ونعمل لهم رش بالماطور من الخزان<<مومبيد حشري خخخخخ ويذكرونا بخير شوف غزاله ورحيل وملكه وشموع تم رشهم بسلام وتعااافوا وعلى راسهم مدير المنتدى وافي تم تغطيسه بالخزان لمدة ساعتين وابشرك انه الحين بصحه جيده وحي يرزق.. خلوكم معنا وبأذن الله مايبقى سعودي مسحور :furious3: |
رد: قناة الوئام الفضائية (2)
....
أحد يعرف رقم الهيئه ياجماعة الخير ؟؟؟؟؟ |
رد: قناة الوئام الفضائية (2)
اقتباس:
برشحك قاريه على الحريم وتفلي عليهم لين مايفلحوا والنص بالنص وخليك ساكته وانا متأكد اكثر المراجعين والمحسودين حريم يعني ارباحك باليوم ملايين<<الي عينتي خير طبعا المحاسبه عندي ارسلي رقم حسابك البنكي ويتم توديك المبلغ في حسابك يوميا <<<افلقيني :( |
رد: قناة الوئام الفضائية (2)
هههههههههههه:grin2:
والله صح يضحكون على عقول الناس بالبرامج هذي والناس تصدق كل شي |
رد: قناة الوئام الفضائية (2)
..
مياسم لو حسيتي شي تعالي نرشك:grin2: |
رد: قناة الوئام الفضائية (2)
ههههههههههه
انت الي يبيلك رشه اطالب انك تقراء على نفسك من باب الاحتياط يمكن يكون فيك شي :chinese: |
رد: قناة الوئام الفضائية (2)
أشكرك أختي شموع لجميل مرورك ولمبادرتك في تزعم محاربة قناة الرقية وتفسير الأحلام، الواقع هو أن الأستاذ خلف يحاول ان يقوم بواجبه كمواطن صالح "يفك" "زنقة" المواطنين الآخرين، ولايمانع أن يربح شيء بسيط مقابل هذه الخدمة وذلك لتغطية المصاريف، مع العلم بأن ربحه فقط (500%) مثله مثل غيره. أختي شموع اسعدني مرورك واسعدتني مداخلتك، دمتِ بحفظ الله |
رد: قناة الوئام الفضائية (2)
اقتباس:
اقتباس:
أخي الحبيب خلف أولاً شكراً على أنك فكيت السحر عن العمال وصاروا مخلصين بعملهم، المشكلة الآن ان العمال صاروا يأكلون أكثر من أول، وزادت علينا المصاريف، ولهذا أرجوك ترجعهم على حالتهم الأولى ولا شف احد يسحرهم من جديد وعلى حسابنا. . على الأقل يخففون علينا مصاريف أكلهم وشربهم اللي زادت. ثانياً: خزانك اللي طابين ومتروشين فيه مشايخكم ذكرني بشيخ مشهور في مزرعة قريب من منطقة صبيا رحت له العام الماضي مع قريب ليّ، وكان الشيخ يقرأ على العشرات من الرجال والنساء بالميكرفون في نفس الوقت، وبعد الانتهاء من "الرقية" قال للحاضرين: ترى فيه موية مقري عليها في الخارج. رحنا إلى مكان الموية ولقينا مستودع بطول 15 متر وعرض 10 أمتار تقريباً مليان قوارير مويه وزيت للبيع. المهم أنا أستغربت . . كيف قدر الشيخ على أن يقرأ على هذي الكميات الكبيرة من القوارير، فسألت واحد من اللي يبيعون الموية: كيف يقرأ الشيخ على هذي القوارير الكثيرة، فقال لي: إذا جاء وايت الماء إلى المزرعة، يطلع الشيخ على الوايت ويقرأ عليه قبل ما يتفرغ في قوارير. ما شاء الله عليك شغاّل بالماطور والنفث والبخاخ وبالريموت كنترول. الصراحة، قاعد أضحك وأنا اتخيل مشايخك يتسبحون في الخزان . . . أتوقع يكون التركيز 1000% إذا كانوا ما يتروشون إلا في هذا الخزان. دمت بحفظ الله. |
| الساعة الآن 22 : 05 AM بتوقيت السعودية |
Powered by vBulletin® Copyright ©2000 - 2024, Jelsoft Enterprises Ltd.
new notificatio by 9adq_ala7sas
[ Crystal ® MmS & SmS - 3.7 By L I V R Z ]