مضا اسبوع وصناديق الضلوع ايهزّها طاريـك = ويدفعني عليك اللـي مثـل ماجابنـي جابـك
دفعك الشوق والشوق اقشر ولايعترف بـ ( بريك) = بعد ماهبّت ارياح الزعـل واشتالـت اطنابـك
اخذت اديرها في راسي آراضيك ما آراضيـك = انا انعم في وصالك والا اذوق النـار فغيابـك
وفيما آنا بحيرة وقفتي مابيـن ذيـك و ذيـك = ليا هـاذي ركابـك مقبلـه حـيّ الله اركابـك
لو إنك قبل لا تتعِب ركابك فـي رضـا مغليـك = قعدت شوي؟؟ سقت ركابي وناخت على بابـك
لإنك باختصار اتشدّني في الحـب منـك إليـك = مثل مانيب اشـدّك بالغـلا و اوتّـر اعصابـك
خصوصا ً كل ماجرّدك سوء الظنّ و التشكيـك = مع اللي والله انّه مايسـاوي حفنـة اترابـك
انا ماودّي آبكّيـك جعـل العيـن مـا تبكيـك = هذاه اليوم سابع يوم لـك مـا جـفّ صبّابـك
هلا يامرحبا .. مكانـك القلـب .. الله يحيّيـك = عدد مـادق مـن حبّـك و رحبّـك و هلاّبـك
معزّب وانت ضيف ولازم آعشّيـك و آغدّيـك = هذا حقك ومن حقّـي عليـك اتنـادي أقرابـك
نبا نسهر على نور القمر ماهوب نور اتريـك = بعيداً عن مشاريه الغـرام و قسـوة اعتابـك
خفوقي مجّره لك قبل عـام إيجـار بالتمليـك = وذا الحين إنتهى عقده واخذ صكّه من احبابـك
نقلت اشواقي من اعماق قلبـي نقـل تلّفريـك = مت الله لا يهينك كان طحت و مـت باسبابـك
صرفت الك المحبّه و المودّه مثل صرف الشيك = وقطّعت الكتاب اللي يعـارض فكـرة اكتابـك
غرامك سوق وآنـا سهـم ٍ ينزّلـك و يعلّيـك = مثل مايرفع السوق السعوديّـه سهـم سابـك
انا لو قلت ابا اخلّيك والله مـا اقـدر اخلّيـك = مادام الروح ماتقدر تعيـش و تسعـد الاّ بـك
ترى لولا ودادك كان مافكّـرت كيـف آجيـك = لإني مهما اروح ابعيد منك اقرب مـن ثيابـك
عليّه بالحرام إن العيـون اللـي تناظـر فيـك = آحسد اصحابها يوم إنّها تبحـر مـع اهدابـك