منتديات الوئام - عرض مشاركة واحدة - الحلقه الثانيه من ساحة نقاش..(البنات والسوق)!!

24 / 07 / 2006, 13 : 10 AM

اولا احبتي اعتذر عن تأخر تقديم الحلقه..
واجدها فرصه ان اتقدم بالشكر للغاليه غيث السماءفعلا ماقصرت ..
وماقصر الاستاذ ايضا عازف الناي والذي اثرى الحلقه بمداخلته التي سأقف عليها ان شاء الله..
ليس لدي مااضيفه على اسئلة غيث السماء فمحاورها التي طرحتها كافيه واتمنى من
الجميع الاجابه على بعضها ان لم يكن جميعها..

بدايةاود ان اذكر قصه حدثت لي ولعلها مدخل لموضوع الحلقه:

ذات ليله كنا مجتمعين انا وبنات خالاتي وخالاتي.. اختلفنا الى اين ستكون وجهتنا ؟؟
امي ومعها كذا وحده يبون يروحون لزواج احد الاقارب ..والباقي يبون السوق ..
وقعت في حيره لاني بين البينين ..
اخيرا قررت اذهب مع امي للزواج وبالفعل رحت المشغل سويت المكياج لبست فستان
السهره الاكسسوار الخ الخ..

ركبنا كلنا في سياره وحده.. خالي يبي ينزل اللي يبون القصر اول ..
وبعدين يبي يروح السوق مع البقيه.. طبعا طول الطريق البنات زن على راسي يقنعوني..
(( شروق تعالي نروح كذا ..نسوي كذا ..نشوف كذا..)) الا ان قالوا (( نروح نتعشى في المطعم الفلاني ))
واللي كان مطعمي المفضل ..عندها قلت لامي: لا.. خلاص بروح معاهم السوق..
نزلت امي واللي معاها ..عندها طلبت منهم نرجع البيت ابدل ملابسي ..
لان الفستان يعيقني عن الحركه ..وكنت حينها ايضا ارتدي كعب عالي ..
وقدمي يعلوه طلاء اظافر ..بالاضافه الى مكياج السهره اللامع.. والشنطه المبهرجه ..
باختصااااااااااااار شكلي ماكان يؤهل اني انزل السوق ..
طبعا ماامداني اقول : ((خالي رجعني البيت.. )) الا وتعالت الاصوات : ((..يووووووه لا ياشروق
مافيه وقت..ورينا ...لا شكلك عادي ..لا مو باين شي... ياشيخه محد بينظر ومن هذا الكلام ))
المهم نزلت السوق طبعا اتفرقنا كل اثنين او ثلاثه مع بعض ..لااخفيكم اني اوجست خيفه
بسبب انظار من كان حولي..

كانت الفاجعه حين صعدت السلم الكهربائي سبقت من كان معي بسلمين او ثلاثه وكان
الزحام اعلى السلم شديد ..تفاجأت لمن وجدت رجل في الاربعين من عمره ينظر الي
ويصرخ : ((الشنطه يابنتي.. شنطتك.. الشنطه يابنت))
ارتبكت الى اني لم التفت وذلك تطبيقا لو صية امي ..تقول لي دايم الله يخليها الي : ((لاتلتفتين في السوق لو تنفجر
وراك قنبله ))
طبعا ماالتفت لكني رحت اركض على دورة المياه اشوف وش سالفة الشنطه ؟!
نظرت فيها مالقيت شي.. وانا اصلا ماكنت حاطه فيها شيء ثمين علشان اخاف..
بس قلت اطمئنان فتحها واشوف..

وعندها ذهلت..!!
اربع اوراق مطويه في شنطتي فتحتها واذا هي ارقام جوالات ...
بصراحه كانت صدمه انا (شروق الفلاني) عمري في حياتي ماضويقت في اي نزله
الحين القى بشنطتي ارقام كيف جات؟؟ومن مين؟؟وليه؟؟
اخذت شوي انظر في نفسي عرفت ان السبب هيئتي ..
احترت كيف اتصرف ؟؟
ماابي اقول للي معاي ماكنت اتجرأ..
ولا اابي ادق على امي واخوفها..
وفي نفس الوقت خايفه هاللي حطوا الاوراق في شنطتي يكونون وراي..!!

مزقت الاوراق ورميتها ...دقيت على جوال خالتي : ((خاله انا شروق.. ياخالتي الكعب اوجعني ..
والفستان مره مضايقني.. ابي تجيبين لي جزمه سبورت من اللي في الدور الاول..
وابي اي شيء بدله -جلابيه- تايور اي شيء..))
جابت لي خالتي اللي ابيه بدلت ..حطيت في كيس السبورت حذائي الكعب..
وفي كيس التايور فستاني ..وانزلت ماكان يزين يدي من خواتم لامعه واساور..
اعددت هندامي وخرجت اكمل تسوقي..
لكن يعتصر قلبي الم ممزوجا بخوف...وفي عيناي دموع لم تسقط..
والى اليوم لم اذكر هذه القصه الا لامي وانتم.. لانه حقيقة لا يشرفني ابدا ان اذكرها..

وطرحتها هنا لأصل الى ان:
1-ماتجرأ الشباب على البنات من فراغ..
2- من تعلم ان السبب وراء المضايقات بهرجتها فلماذا تخرج للسوق في تمام اناقتها..
3-مو كل انيقه يكون مقصدها الفتنه..
4-مو كل الشباب اقصد..
5-لم يكن السوق ابغض الاماكن عند الله عبثا..