يامساء الفل وريحة الخرفان الي صاكة خمشي ومسببتلي حساسية على دخلت العيد..
كل عام والجميع بخير..
الموضوع ياجماعة موضوع مهم ومااشوف انه له داعي للتريقة والضحك والمفروض انكم تتحمدون لعائلتي بالعافية والسلامة..
بتقولون اف اف اف اف سلامات وش صار..
ياجماعة العربان حدثت اليوم احدوثة لم تكن بالحسبان..وايقضت من كان نعسان..وسدت نفس الجوعان<<<<ياهوووووووووو وربي اني تيحيفه..
نرجع للموضوع ..
الي بيدخل حارتنا بيعرف غصب ان بكرة عيد بسبب..
باااااااع بيييييع بوووووع باع بيع بوع ببباع ببوع بيباع..
وخذوا من هالنغمات..
على فكرة جمعت كم نغمة الي يبليه لايرده الا زر كيبورده..وكم خلفيه رايقه لاشكال الخرفان شئ ياجماعه..
نرجع لعمود موضوعنا..
طبعاً بكرة عيد<<والله.؟
والاخ الفاضل اخوي ربي يسعده تبرع بالاضحية ولانه اول مره ينزل للسوق الخرفان..ولد مدينة الله المستعان راح وجاب ذاك النعيمي الي يفتح النفس..
المهم استغربوا الاخوان والجيران عن حجمه وماله قرون؟؟
ياناس ياهو وش قصة الخروف..
الا ويطلع نعجة مسترجلة..
وحدثت مناوشة بين اخواني وبينها..
ياهو يانعجه مايصير لازم نجيب خروف..
صارخت وحلفت وقالت علي الطلاق مااطلع من عندكم..وش هالتفرقه يعني كل شئ للذكور؟؟؟
يالخبلة بنضحي يعني فيها قطع رقاب..
قالت: قدام وماعلي ابيها هالرقاب تطير..
المهم من هنا ومن هنا يمين شمال فوق تحت..
الا وامسكي باب الحوش وحطت رجولها..وتركض.. بل عليها مااسرعها..
المهم واخواني وراها ملاحق..
يابنت الخروف ارجعي خلينا نتفاهم..
انقلعوا الشرهه على الي يجيكم.
المهم ويفزعون ورعان الحارة..
وهي هي عاد ورعان حارتنا شافولهم نعجه هاربة ويالله ملاحق وراها..
وساعه وهي غايبة عن البيت..
حتى انهم نزلوا اعلان..
كان نصه.
بيان من وزارة الحارة..
يوجد خروفه مسترجلة هربانه..من يجدها راح نخلي ورعانه ياخذون فره عليها في الحارة..
المهم وبعد البحث والتقصي وجدت فوق كومة من الرمال..شكلها كانت ناوية تنتحر من القهر..ويحدونها الورعان بالدداسن والسياكل والي طلع برجوله وتم القبض عليها وارجاعها لذويها واستبدالها بنعيمي لااله الا الله عليه من قرون وربي انها تصدع الراس من كبرها ماادري اشلون هو متحملها لاوهو وجه الي كانه وجه خروف يمشي وراسه منتص بل عليه ..
المهم احمدوا ربي على العافية وقفلوا بيبان الاحواش زين وبس..
وكل عام وجعل خرفانكم ماتهرب مثل نعجتناالمسترجلة..