ثوااااااني



لو سمحتي ثواني واخذي العمر كله
.. .. .. .. .. .. واخذي اللي تبينه في مقابل ثواني

علتي طولت وانتي دواء كل عله
.. .. .. .. .. وانتي اسبابها و اسباب نكبة زماني

قال ابــوي الــولد عقله بدى فيه خله
.. .. .. .. .. قال خالي عليكم بالطبيب الـفلاني

شيخ يقرأ ويظهر علته بالادلة
.. .. .. .. .. اسمه مضيعه ويلقب الاصفهاني

مير لاجيت ذاك الـحي شــف فيه فله
.. .. .. .. .. فلةٍ فارقة ماهيب مثل المباني

قلت معروف اعرفه زين واعرف محله
.. .. .. .. .. بس يا ناس انا مامس عـقـلي جناني

قالوا اسكت وخل الامر حنا نحله
.. .. .. .. .. لايهمك .. بتسكت غصب والا .. تراني

راينا يالكبار ولازم انك تجله
.. .. .. .. .. قلت سمعاً وطاعة في خضوع ولياني

رحت من غير راي ودمع عيني تهله
.. .. .. .. .. ودعي الله عساه لدرب خيره هداني

يوم جينا المطوع وانفتح مجلسٍ له
.. .. .. .. .. مابه الا السلاسل مع كسر خيزراني

وقهوته جابها بكاسات مايعرف دله
.. .. .. .. .. وقبل ياخذ علوم الشيخ قام ودعاني

قلت للجلد ؟ عاد وربي اوجست ذلة
.. .. .. .. .. مير من شي شفته غصب موتي طواني

قال وش فيك ساكت قلت هذي جبلّة
.. .. .. .. .. والبلاء ماسالني و بــسـؤاله دهاني

ثم عود يتمتم في لغة مضمحلة
.. .. .. .. .. وقام يجهر يالين الصوت فجر لاذاني

وان قدامي اوراق وبقايا مجلة
.. .. .. .. .. قلت فيها اتسلا لين افارق مكاني

وشفت فيها اسم خل جر قلبي وتــلـه
.. .. .. .. .. لين حتى رماني عند هالمودماني

قلت يالشيخ ظللك الله بيوم ظله
.. .. .. .. .. علتي بين هالـسطرين ذاني وذاني

علتي كلها راع الرموش المظلة
.. .. .. .. .. علتي من حبيب بالمودة كواني

علتي من حبيب ولايته مسـتـقـلة
.. .. .. .. .. بين حدب الظلوع وبين ظل المحاني

علتي من وليـف منه ماشفت زلة
.. .. .. .. .. لين حتى ملكني حبه اللي براني

هي بس القمر والخلق مثل الاهله
.. .. .. .. .. مثلها بالبشر مافيـه مخلوق ثاني

قال يابني علاج الخل في وصل خله
.. .. .. .. .. قلت والنعم بك يالشيخ جزل المعاني

وجيت لك بالسلامة واخذي العمر كله
.. .. .. .. .. وعوضيني عن الموقف بوصلك ثواني


.









.